प्रदेश १ का ३१ संक्रमितकाे स्वास्थ्य अवस्था स्थिर, क्वारेन्टाइनका लागि ७५ स्वास्थ्यकर्मी

प्रदेश १ का ३१ संक्रमितकाे स्वास्थ्य अवस्था स्थिर, क्वारेन्टाइनका लागि ७५ स्वास्थ्यकर्मी

A+ A A-

विराटनगरस्थित कोसी अस्पतालको कोभिड–१९ उपचार केन्द्रमा उपचाररत ३१ जना कोरोना संक्रमितको अवस्था सामान्य छ । अस्पतालका अनुसार १८ देखि ६५ वर्षसम्म उमेर समूहका संक्रमितको कोभिड–१९ उपचार केन्द्रमा उपचार भइरहेको छ ।

अस्पतालमा उपचार गराइरहेका उदयपुरका २८, भोजपुरका १ र झापाका २ जना संक्रमितकाे अवस्था सामान्य रहेको काेसी अस्पतालका मेडिकल सुपरिन्टेन्डेट डा. संगीता मिश्राले जानकारी दिइन् ।

अस्पतालमा रहेकाहरूमा कोरोनाको सामान्य लक्षण पनि देखा नपरेको चिकित्सकले बताएका छन् । सामान्यतः कोरोना सङक्रमितमा उच्च ज्वरो, घाँटी दुख्ने तथा सास फेर्न गाह्रो हुनेजस्ता लक्षण देखिन्छ । तर, प्रदेश १ का संक्रमितमा यस्ता कुनै पनि लक्षण नदेखिएकाे मेडिकल सुपरिन्टेन्डेन्ट डा. मिश्राले बताइन् ।

उनका अुनुसार अस्पतालमा उपचाररत ३१ जना कोरोना सङक्रमितमध्ये २९ जना मुस्लिम समुदायका हुन् । उनीहरू सबैको नियमित परीक्षण र उपचार भइरहेको छ । संक्रमितमध्ये ६० वर्षमाथिका ३ जनामा मधुमेह र १ जनामा उच्च रक्तचापको समस्या भए पनि उनीहरूमा समेत काेराेनाकाे लक्षण देखिएकाे छैन ।

संक्रमितहरूमध्ये पहिलो चरणमा भर्ना भएका उदयपुरका १३ जनाको शुक्रबार स्वाबको नमुना संकलन गरी परीक्षण गरिएको थियो । सोमबार पुनः दोस्रो पटक परीक्षण गरिएकाे मेसु डा. मिश्राले जानकारी दिइन् । उनले रिपोर्ट अहिले नै सार्वजनिक गर्न नमिल्ने बताइन् ।

संक्रमित बिरामीको हरेक १४ दिनमा स्वाब परीक्षण गर्ने गरिन्छ । यो परीक्षणमा पोजेटिभ रिपोर्ट आए थप १४ दिन उनीहरू अस्पताल बस्नुपर्ने हुन्छ भने नेगेटिभ रिपोर्ट आएमा लगातार दुई परीक्षण गरी डिस्चार्ज गरिन्छ ।

७५ स्वास्थ्यकर्मी क्वारेन्टाइनमा

उपचारमा खटिएका स्वास्थ्यकर्मीहरूले पूर्ण सुरक्षा र सर्तकताका साथ कोरोना संक्रमित बिरामीहरूकोे उपचार गरिरहेका छन । यद्यपि, उपचारको क्रममा चिकित्सक तथा स्वास्थ्यकर्मीहरू स्वयम् पनि कोरोना संक्रमणको उच्च जोखिममा रहेको मेसु डा.मिश्राले बताइन् ।

कोभिड १९ उपचार केन्द्रमा संक्रमितको उपचारमा खटिएका ७५ जना स्वास्थ्यकर्मी क्वारेन्टाइनमा बसेका छन् । संक्रमितको नियमित जाँच तथा रेखदेखमा खटिएका चिकित्सक तथा नर्ससहितका स्वास्थ्यकर्मी क्वारेन्टाइनमा रहेको मेडिकल सुपरिन्टेन्डेन्ट डा. मिश्राले जानकारी दिइन् ।

डा. मिश्राका अनुसार पहिलो पटक ५ गते मध्यरातमा उदयपुरबाट १२ जना संक्रमित ल्याएदेखि स्वास्थ्यकर्मीको टोली परिचालित रहेको छ । त्यसयता हालसम्म केन्द्रमा १ हप्ताको फरकमा २६ जनाको ३ वटा टोली प्रत्यक्ष रूपमा संक्रमतिको उपचारमा संलग्न रहँदै आएको छ । उनीहरूको शुक्रबार स्वाब नमुना परीक्षण गर्दा नेगेटिभ रिपाेर्ट आएको डा. मिश्राले बताइन् ।

उदयपुरबाट संक्रमित भर्नासँगै पहिलो साता खटिएका चिकित्सकहरूको सुरुवाती १ साताको क्वारेन्टाइन समयको गणना नहुने भएकाले दोस्रो साताबाट मात्र उनीहरूको क्वारेन्टाइन समय जोडिने डा. मिश्राले बताइन् । सबै स्वास्थ्यकर्मीको क्वारेन्टाइन बसाइको समय पूरा भइनसकेको बताउँदै डा. मिश्राले क्वारेन्टाइनमा प्रक्रिया पूरा भएपछि सबै जना काेसी अस्पतालको नियमित काममा फर्कने बताइन् ।

३ ठाउँबाट स्वाब परीक्षण, २ ठाउँबाट उपचार

संक्रमणको जोखिम न्यूनीकरण तथा रोकथामका लागि प्रदेश सरकारले विराटनगरमा कोभिड–१९ उपचार केन्द्र तथा धरानको बीपी कोइराला स्वास्थ्य विज्ञान प्रतिष्ठानमा कोरोना विशेष उपचारकाे व्यवस्था गरेकाे छ ।

आवश्यक परेको खण्डमा धरानको बीपी कोइराला स्वास्थ्य विज्ञान प्रतिष्ठानको बेड क्षमता वृद्धि गरेर १ हजार बेडको कोरोना विशेष अस्पताल बनाउन सकिने प्रदेशकाे सामाजिक विकास मन्त्रालयका जनस्वास्थ्य महाशाखा प्रमुख डा. सुरेश मेहता बताउँछन् ।

उनले विराटनगरस्थित कोभिड अस्पताल, पशु क्वारेन्टाइन ल्याब र बीपी प्रतिष्ठान धरानबाट नियमित स्वाबको नमुना परीक्षण भइरहेको जानकारी दिए ।

कोरोना संक्रमणको जोखिम न्यूनीकरण तथा रोकथाम गर्न प्रदेश सरकारले विशेषतः आफ्नो उपचार क्षमता बढाउने विषयमा जोड दिएको छ ।

प्रकाशित मिति: सोमबार, वैशाख २२, २०७७ १४:४०