पोखरामा सुत्केरी महिलाको घरैमा पौष्टिक आहार

A+ A A-

पोखरा महानगरपालिकाले लकडाउनबाट प्रभावित ३१ हजार विपन्न नागरिकलाई राहत वितरण गरिसकेको छ । राहत प्याकेजपछि महानगरका जनप्रतिनिधि यतिबेला सुत्केरीलाई पौष्टिक आहारसहित घरघर पुग्न थालेका छन।

महानगरले लकडाउनका माझमा भएका महिलाहरूलाई भेटने र कोसेलीका रूपमा घिउ, हर्लिक्स, तेल, साबुनसहित नगद पाँच सय रुपैयाँ उपलब्ध गराउने अभियान सुरू गरेको छ ।

आफन्तजन र माइतीको अत्यास मेटाउँँदै अभिभावकीय भूमिका निर्वाह गर्न सुत्केरी भेट्ने अभियान सुरू गरेको महानगरले जनाएको छ ।

महागनरले पहिलो दिन पोखराका विभिन्न ठाउँमा रहेका १८ जना सुत्केरी महिलालाई पौष्टिक आहार उपलब्ध गराएको छ । शनिबारसम्म २६ जना सुत्केरीको नाम महानगरको हटाइनमार्फत टिपाइएको थियो ।

आइतबार पोखरा महानगरपालिका वडा नम्बर ९, १० र १५ मा वडा अध्यक्ष, वडा सदस्य र महानगरका कर्मचारी पौष्टिक आहार लिएर सुत्केरी भेट्न घरदैलोमा पुगेका छन् ।

महागनरले उपलब्ध गराएको पौष्टिक आहारमा एक किलो घिउ, एक किलो हर्लिक्स, एक लिटर तेल, एउटा साबुन र नगद पाँच सय रुपैयाँ रहेको छ ।

सुत्केरी महिलालाई आवश्यक पर्ने पौष्टिक आहारको अभाव भएको गुनासो आएपछि महागनरले १५ सय रुपैयाँ बराबरको प्याकेजसहित नगद पाँच सय रुपैयाँ दिने निर्णय गरेको पोखरा महानगरका उपप्रमुख मञ्जुदेवी गुरुङल बताइन् ।

‘सुत्तकेरी भएपछि पोसिलो खाना खानुपर्ने महिलालाई हर्लिक्स, घिउ, तेल उपलब्ध गराएका छौँ , उनले भनिन्, ‘हामीले दिएकोबाहेक केही आवश्यक सामग्री किन्न नगद पाँच सय रुपैयाँसमेत उपलब्ध गराएका छौँ ।’

११ चैतपछि सुत्केरी भएका ४५ दिनसम्मका महिलाहरूलाई महानगरले पौष्टिक आहार उपलब्ध गराएको उनले बताइन् ।

आइतबार पोखरा १५ मा वडाअध्यक्ष प्रकाश पौडेल, वडासदस्य पार्वती कार्की, महागनरका कर्मचारी सर्मिला भण्डारी र रेवती भण्डारीले सुत्केरी महिलाको घरमै पुगेर औष्टिक आहार उपलब्ध गराएका थिए । त्यस्तै वडा नम्बबर १० मा वडासदस्य सम्मरबहादुर श्रेष्ठसहित कर्मचारीहरू पुगेर पौष्टिक आहार उपलब्ध गराए ।

प्रकाशित मिति: आइतबार, वैशाख २१, २०७७ १९:२९