लासको संंख्या घटेसँगै लास जलाउनेहरू समस्यामा

A+ A A-

लकडाउनपछि आर्यघाटमा जलाइने लासको संख्या घटेसँगै त्यहाँ काम गर्ने कामदारहरूको आयमा झण्डै ५० प्रतिशतले कमी आएको छ । यसका कारण त्यहाँ काम गर्नेहरूलाई परिवार चलाउनै मुस्किल हुन थालको छ ।

घाट सेवा केन्द्रका सहसहायक शम्भु पौडेलका अनुसार लकडाउनअघि दैनिक औसत २५ वटा लास आउँथे भने अहिले दैनिक औसत १२ वटा लास मात्र आउन थालेका छन् ।

अहिले घाट सेवा केन्द्रमा ४९ जना कामदार छन्, जसमध्ये २९ जना लास जलाउने पेसामा छन् भने बाँकी २० जना दाउरा बोक्ने काममा । त्यस्तै, ३ जना सहसहायक छन् ।

आर्यघाटमा लास जलाउने पेसामा लागेकाहरूको प्रति लास प्रति व्यक्ति १ हजार ५ सय रुपैयाँ आम्दानी हुन्छ । दाउरा वोक्नेले एक पटकमा ६ सय रुपैयाँ कमाउँछन् । यसरी हेर्दा लास जलाउनेले दैनिक औसत १ हजार ३ सय र दाउरा बोक्नेहरूले दैनिक औसत ७ सय ५० रुपैयाँ कमाउँथे । तर, लकडाउनपछि यी दुवै पेसाका कामदारहरूको झण्डै आधा आम्दानी घटेको छ ।

औसतमा दैनिक करिव ७ जनाको सवारी दुर्घटनामा परी मृत्यु हुने गरेको नेपाल प्रहरीको तथ्याङ्क छ । लकडाउनमा सवारी दुर्घटना शून्यको निकट छ । त्यसैले दैनिक ७ वटा मृत्युका घटनामा कमी आएको छ ।

त्यस्तै, उपत्यकाबाहिरबाट यहाँ उपचारका लागि आउने क्रम पनि रोकिएको छ, जसका कारण उपत्यकाबहिरबाट आएर उपत्यकाका अस्पतालमा मृत्यु हुनेको संख्यामा समेत कमी आएको छ । यसले पनि आर्यघाटमा लासको संख्यामा कमी ल्याएको छ ।

यसका अरू कारणहरु पनि रहेका र ती कारणहरुको खोजी भइरहेको पशुपति क्षेत्र विकास कोष, घाट सेवा केन्द्रले जनाएको छ ।

प्रकाशित मिति: शुक्रबार, वैशाख १९, २०७७ १६:५४