बाँझो जग्गा राख्न नपाइने भएपछि धमाधम तरकारी खेती गर्दै स्थानीय

बुटवल उपमहानगरपालिका– ११ देविदेउराली पथमा बाँझो रहेको घडेरीमा काम गर्दै स्थानीय, तस्वीरः विकाश पराजुली

A+ A A-

घरसँग जोडिएका बाँझो खेत लकडाउनको समयमा धमाधम खनजोत हुन थालेका छन् । स्थानीय तहले समेत घर वरपरका जमिन बाँझो नराख्न र तरकारी खेती भएपनि गर्न आग्रह गरेपछि यतिबेला घर छेउका बाँझो जमिनमा खनजोत हुन थालेको हो ।

खनजोतपछि स्थानीयले मौसमी तरकारी लगाउन थालेका छन् । समूह मिलेर प्लट बनाउँदै उनीहरुले तरकारी खेती लगाउन थालेका हुन् ।

बुटवल उपमहानगरपालिका–११ देविदेउराली पथमा ५ बर्षदेखि बाँझो रहेको जमिनमा यतिबेला सघियारले खनजोत गर्न थालेका छन् । उनीहरुले त्यहाँ काँक्रा, घिरौँला, लौका, फर्सी, बोडी लगाएका छन् । देविनगरका जगप्रसाद शर्माले संधियार (छिमेकी) को जग्गा बाँझो देखेपछि लकडाउनमा तरकारी लगाउन सबै मिलेर खनजोत गरेको बताए ।

५–६ बर्षदेखि बाँझो घडेरीमा कोही पनि रेखदेखका लागि अहिलेसम्म नआएपछि टोलका सबै मिलेर तरकारी लगाएको उनले बताए । उक्त पथमा यसरी बाँझो जमिनलाई खनजोत गर्ने जगप्रसाद एक्लो होइनन् ।

सोही पथमा बस्ने प्रकाश पराजुलीले समेत सघियारको जग्गामा तरकारी लगाउनका लागि ३ दिन लगाएर खनजोत गरेको बताए । स्थानीय तहले बाँझो जमिन नराख्न अनुरोध गरेसँगै खनजोत गरी तरकारी लगाएको उनको भनाई छ ।

देविनगरमा मात्र होइन बुटवल–११ कालिकानगर स्थित शान्ता पथमा पनि बाँझो जमिनमा स्थानीयले खनजोत सुरू गरेका छन् । १३ बर्षदेखि बाँझो रहेको घडेरीमा कल्पना कार्कीको नेतृत्वमा ४ घरले तरकारी खेती लगाउन सुरू गरेका हुन् । लकडाउनले फुर्सदिलो पनि बनाएको र सरकारले बाँझो जमिन नराख्न भनेपछि टोलका मिलेर तरकारी लगाउनका लागि छिमेकी मिलेर खनजोत गरेको कल्पना कार्कीले बताइन् ।

देविनगर, कालिकानगरमा जस्तै बुटवल उपमहानगरको बेलवास, नयाँगाउँ, सेमरामा लगाएका स्थानमा अहिले धमाधम सघियारको जग्गामा स्थानीयले तरकारी उत्पादन सुरू गरेका छन् ।

नयाँगाउँका लेखनाथ गौतम पनि अहिले बाँझो जमिनमा तरकारी लगाउन थालेका छन् । वडा कार्यालयले घर अगाडिको जमिन बाँझो नराख्नु भन्ने निर्देशन दिएपछि खेती गरिएको उनले बताए ।

तिलोत्तमा नगरपालिकाले समेत गत साता मात्र बाँझो जमिनमा तरकारी लगाउन र संधियारको तरकारी लैजान अधिकार नहुने उर्दी जारी भएपछि तिलोत्तमामा बाँझो जमिनमा खेती गर्ने अभियान नै चलेको छ । तिलोत्तमा शिवपुर, शंकरनगर, गंगोलिया, दिपनगर, नयाँमिल क्षेत्रमा अहिले बाँझो जमिन जोत्ने अभियान नै चलेको हो ।

तिलोत्तमा नगरपालिकाका प्रवक्ता सुरेन्द्र श्रीले नगरपालिकाको निर्णय अनुसार अहिले बाँझो जमिनमा खनजोत भइरहेको सूचना नगरपालिकामा आएको बताए । कतिपयले अझै पनि अन्यौलता भएको बताए पनि नगरपालिकाले ढुक्क भएर सघियारको बाँझो जमिनमा खेती गर्न आग्रहसमेत गरेको उनले बताए ।

नगरपालिका प्रवक्ता श्रीले बाँझो जमिनमा जग्गाधनी आफैँले खेती नगरे संधियार वा अन्य व्यक्तिले समेत खेती गर्न सक्ने भन्दै अन्यौल नहुँदै खेती गर्न स्थानीयलाई आग्रह गरे ।

१ सय २६ वर्ग किलोमिटरमा फैलिएको तिलोत्तमामा ४१ हजार ४ सय ५० मेट्रिकटन तरकारी उत्पादन हुँदै आएको छ । यो निर्णयपछि तरकारी उत्पादनको मात्रा बढ्ने विश्वास गरिएको तिलोत्तमा नगरपालिकाका नगरप्रमुख वासुदेव घिमिरेले बताए । लकडाउनको समयमा गरिएको निर्णय कार्यान्वयनमा आएपछि घडेरीमा पनि तरकारी खेती उत्पादन हुनेछ ।

रुपन्देहीकै सैनामैना नगरपालिकाले समेत जमिन बाँझो नराख्ने नीतिसहित खेती गर्न आग्रह गरेको छ । नगरप्रमुख चित्रबहादुर कार्कीले कृषि उपजमा आत्मनिर्भर बन्नुका साथै स्थानीयको आर्थिक व्ययभार घटाउन उत्पादनमा जोड दिइएको बताए ।

प्रकाशित मिति: बिहीबार, वैशाख १८, २०७७ ०८:२५