कोरोना लागेर विदेशमा ३ जना कामदारकाे मृत्यु, के छ क्षतिपूर्ति पाउने व्यवस्था ?

कोरोना लागेर विदेशमा ३ जना कामदारकाे मृत्यु, के छ क्षतिपूर्ति पाउने व्यवस्था ?

A+ A A-

वैदेशिक रोजगारीमा गएका ३ जना नेपाली कामदारकाे कोरोना भाइरसकाे संक्रमणबाट मृत्यु भएको छ । यूएईमा २ र टर्कीमा १ जना गरी ३ जना नेपालीको कोरोना भाइरसको संक्रमणका कारण मृत्यु भएको वैदेशिक रोजगार प्रवर्द्धन बोर्डले जानकारी दिएको छ ।

गैरआवासीय नेपाली संघअन्तर्गतको स्वास्थ्य समितिले संकलन गरेको तथ्यांकअनुसार बेलायतमा ३३, अमेरिका १०, यूएई २, आयरल्याण्ड १, जापान १, टर्की १ र नेदरल्याण्डमा १ जना गरी ४९ जना नेपालीको कोरोना भाइरस लागेर मृत्यु भएको हो ।

संघका अनुसार विश्वभर १ हजार ९ सय ८३ जना गैरआवासीय नेपालीहरू कोरोनाबाट संक्रमित भएका छन् भने तीमध्ये ४ सय ३४ जना कोरोनाबाट निको भएको एनआरएनएले जनाएको छ । सरकारले विदेशमा रोजगारीका क्रममा कोरोना भाइरस लागेर मृत्यु भएका कामदारका परिवारलाई आर्थिक क्षतिपूर्ति दिने विषयमा हालसम्म केही आधिकारिक निर्णय गरेको छैन । सरकारले वैदेशिक रोजगारीका क्रममा मृत्यु भएका कामदारका परिवारलाई ७ लाख रुपैयाँ आर्थिक क्षतिपूर्ति दिँदै आएको छ ।

वैदेशिक रोजगारीका क्रममा मृत्यु भएका कामदारका परिवारले बीमाबापत १४ लाख, सरकारबाट ७ लाख, नि:शुल्क ढुवानी र नि:शुल्क छात्रवृत्ति पाउँदै आएका छन् । सरकारले नियमअनुसार विदेशमा मृत्यु भएका कामदारलाई दिँदै आएको क्षतिपूर्ति पाउने वैदेशिक रोजगार बोर्डका कार्यकारी निर्देशक राजनप्रसाद श्रेष्ठले बताए । कोरोना भाइरसका कारण विदेशमा मृत्यु भएका कामदारकाे परिवारलाई कस्तो र कसरी क्षतिपूर्ति दिने भन्ने विषयमा छलफल गर्नुपर्ने बोर्डका कार्यकारी निर्देशक श्रेष्ठले बताए ।

‘कोरोना भाइरस लागेर मृत्यु भएका कामदारका विषयमा अहिलेसम्म केही आधिकारिक निर्णय भएको छैन । बोर्डले सरकारसँग कोरोनाका कारण मृत्यु भएका कामदारले क्षतिपूर्ति पाउनका लागि प्रस्ताव भने लैजानेछ । सम्बन्धित निकायले के निर्णय गर्छ,’ उनले भने, ‘बोर्डले कोरोना भाइरसपछि विदेशमा रहेका कामदारका परिवारलाई मनोसामाजिक परामर्श दिने काम गरिरहेको छ । जसमा हाल मृत्यु भएर शव रोकिएका परिवारलाई धेरै केन्द्रित भएर परामर्श दिने काम भइरहेको छ ।’

लकडाउन खुल्नेबित्तिकै शव ल्याउन काम सुरु गरिने उनको भनाइ छ ।

९२ शव लकडाउनका रोकिए, ४ जना रोजगारदाता देशमै अन्त्येष्टि

कोरोना भाइरसकाे नियन्त्रण गर्न सरकारले गरेको लकडाउनका कारण अन्तर्राष्ट्रिय उडान बन्द हुँदा ९२ जनाको शव रोजगारदाता देशमै रोकिएको बोर्डले जानकारी दिएको छ ।

कोरोना लागेर मृत्यु भएका ३ जनासहित ९६ जना नेपाली कामदारको गत फागुन महिनामा नेपाल ल्याउन नसकिएको बोर्डले जनाएको छ ।

साउदीमा ३०, मलेसियामा २९, कुवेतमा ८, कतारमा ९, यूएईमा १७ (२ जना कोरोनाका कारण ज्यान गुमाउनेसहित), बहराइनमा १, साइप्रसमा १, सेसल्समा १, टर्कीमा १ (कोरोनाका कारण) र दक्षिण कोरियामा १ गरी ९६ जना कामदारको रोजगारीका क्रममा मृत्यु भएको बोर्डको तथ्याक छ ।

विदेशमा मृत्यु भएका ९६ जनामध्ये ४ जनाको रोजगारदाता देशमै परिवारको सहमतिमा अन्त्येष्टि गरिएको बोर्डका कार्यकारी निर्देशक श्रेष्ठले जानकारी दिए । १० देशमा ९५ जना नेपालीको शव भने लकडाउनका कारण उतै रोकिएको छ ।

कोरोना सङ्क्रमण भन्ने पुष्टि भएकी रुपन्देहीकी बिनु पराजुलीको शव परिवारको सहमतिमा यूएईमै अन्त्येष्टि गरिएकाे छ भने सेल्ससमा १ जनाऽ कोरियामा १ जना र साइप्रसमा १ जना गरी ४ जनाको अन्त्येष्टि उत्तै गरिएको बोर्डले जनाएको छ । यूएई र टर्कीमा पनि २ जनाको परिवारको सहमतिमा अन्त्येष्टि गर्ने बोर्डले जानकारी दिएको छ ।

वैदेशिक रोजगारीका क्रममा वार्षिक करिब १ हजार कामदारले रोजगारदाता देशमा ज्यान गुमाउँदै आएका छन् भने वार्षिक करिब ६ सय अंगभंग भएर फर्किने गरेको बोर्डको तंथ्याक छ ।

प्रकाशित मिति: बुधबार, वैशाख १७, २०७७ १४:३८