यस्ता छन् स्पेनमा जनजीवन सामान्य बनाउने चार चरणका योजना

A+ A A-

स्पेनले कोरोना भाइरस संक्रमण फैलिन नदिन लगाएको लकडाउन हटाएर जनजीवन सामान्य बनाउने चार चरणका योजना सार्वजनिक गरेको छ ।

स्पेनका प्रधानमन्त्री पेड्रो सान्चेजले चार चरणमा लकडाउन खुकुलो बनाउने र आगामी जुनसम्ममा जनजीवन सामान्य बनाउने ‘न्यू नर्मालिटी’ योजना सार्वजनिक गरेका हुन् ।

प्रधानमन्त्री सान्चेजले देशका हरेक क्षेत्रमा अलग अलग स्वरुपमा लकडाउन खुकुलो पार्दै लगिने जानकारी दिएका छन् । कोरोना भाइरस महामारीको अवस्था अनुसार क्षेत्रहरुमा लकडाउनको अवस्था कस्तो हुने निर्धारण गरिनेछ ।

स्पेनका चार आइल्याण्डमा ४ मेदेखि लकडाउन केही खुकुलो पारिनेछ । पहिलो चरणमा ती क्षेत्रमा लकडाउन खुलाएपछि स्पेनका अरु क्षेत्रमा त्यसको एक हप्तापछि मात्रै लकडाउन खुकुलो पार्न सुरु गरिनेछ ।

स्पेनमा हालसम्म कोरोना भाइरसका कारण २३ हजार ८२२ जनाको मृत्यु भइसकेको छ भने २ लाख ३२ हजारभन्दा बढी संक्रमित भइसकेका छन् ।

कोरोना संक्रमण तीव्र रुपमा फैलिएपछि स्पेनमा १४ मार्चदेखि लकडाउन लगाइएको छ । लकडाउनका कारण त्यहाँका मानिसहरु घरभित्रै सीमित छन् ।

यसै साताको सुरुमा त्यहाँ दिनमा १ घन्टा बालबालिकाका लागि बाहिर निस्कन पाउने व्यवस्था गरिएको थियो । स्पेनमा पछिल्लो एक सातादेखि कोरोना भाइरस संक्रमित र मृत्यु हुनेको संख्यामा कमी आउन थालेको छ ।

संक्रमण तथा त्यसका कारण हुने मृत्यु घट्ने क्रम जारी रहेमा २ मेदेखि वयश्कहरुलाई पनि घर बाहिर निस्कन दिइने छ । स्पेनले १३ अप्रिलदेखि नै उत्पादन तथा निर्माण क्षेत्रलाई काम गर्न छुट दिएको छ ।

प्रधानमन्त्री सान्चेजले सार्वजनिक गरेको नयाँ योजनाअनुसार लकडाउन हटाउने हरेक चरणबीचको अवधि दुई साताको हुनेछ । कोरोनाका कारण युरोपमै सबैभन्दा बढी संक्रमित भएको स्पेनमा जनजीवन सामान्य बन्न कम्तिमा पनि ६ देखि ८ सातासम्म लाग्नेछ ।

चार चरण सुरु हुनु पूर्व ४ देखि ११ मेसम्म फेज जिरो कायम रहने छ । यो समयमा स्वीकृति लिएर सैलुन तथा अरु व्यवसायहरु खोल्न पाइने छ । ११ मेदेखि सामाजिक दूरी कामय गरी साना व्यवसाय र होटलहरु खोल्न पाइने छ ।

केही विद्यालयहरु मे को अन्त्यमा खुल्नेछन् भने अधिकांश विद्यालयहरु सेप्टेम्बरसम्म बन्न रहनेछन् ।

मे को मध्ये देखि ३० प्रतिशत क्षमतामा रेस्टुरेन्टहरु खुल्न पाउने छन् । यस्तै मे ११ देखि भवनको क्षमताको एक तिहाई मानिसको उपस्थिति हुने गरी धार्मिक गतिविधि गर्न पाइने छ भने मे को अन्त्यदेखि एक तिहाइ क्षमतामा चलचित्र हल पनि खुला हुनेछन् ।

प्रकाशित मिति: बुधबार, वैशाख १७, २०७७ ०७:२५