कोरोना संक्रमितको उपचारमा संलग्न स्वास्थ्यकर्मीलाई जोखिम भत्ता दिने गण्डकी प्रदेशकाे निर्णय

कोरोना संक्रमितको उपचारमा संलग्न स्वास्थ्यकर्मीलाई जोखिम भत्ता दिने गण्डकी प्रदेशकाे निर्णय

A+ A A-

गण्डकी प्रदेश सरकारले कोरोना भाइरस संक्रमितको उपचारमा प्रत्यक्ष रूपमा संलग्न चिकित्सक, नर्स र कर्मचारीका लागि जोखिम भत्ता उपलब्ध गराउने भएको छ ।

मंगलबार बसेको प्रदेश सरकार मन्त्रिपरिषद् बैठकले काेराेना रोकथाम र उपचारमा प्रत्यक्ष संलग्न स्वास्थ्यकर्मीलाई जोखिम भत्ता उपलब्ध गराउने निर्णय गरेको हो ।

सरकारका प्रवक्ता एवं भौतिक पूर्वाधार विकासमन्त्री रामशरण बस्नेतले मन्त्रिपरिषद्को बैठकले उपचारमा संलग्न स्वास्थ्यकर्मीलाई जोखिम भत्ता उपलब्ध गाराउनेलगायत ५ निर्णय गरेको जानकारी दिए ।

मन्त्री बस्नेतका अनुसार सरकारले कोरोना संंक्रमित व्यक्तिको उपचारमा संलग्न रहेका व्यक्तिको बिमाको समेत व्यवस्था गरेको छ । कोरोनाकै कारण मृत्यु भएमा जीवन बिमावापत ३० लाख रुपैयाँ नजिकको हकवालालाई उपलब्ध गराउने पनि बैठकले निर्णय गरेको छ ।

प्रदेशमा कोरोना भाइरसको उपचारमा संलग्न स्वास्थ्यकर्मीलाई उपचार गर्न लाग्ने सम्पूर्ण खर्च प्रदेश सरकारले व्यहोर्ने निर्णय गरिएको मन्त्री बस्नेतले जानकारी दिए ।

सरकारले गण्डकी प्रदेशका ११ वटै जिल्लामा सघन उपचार कक्ष (आईसीयू) बनाउने निर्णय पनि गरेको मन्त्री बस्नेतले बताए । ‘प्रदेशमा रहेका अस्पतालहरूमा पर्याप्त आईसीयू नहुँदा कोरोना भाइरसलगायतका विभिन्न संक्रमणको उपचारमा समस्या परेको महसुस गर्दै प्रदेशका ११ वटै जिल्लामा आईसीयू तयार गर्ने निर्णय भएको छ’, उनले भने, ‘गण्डकी प्रदेशमा आईसीयू पोखरामा मात्र छ । अन्य जिल्ला र अञ्चल अस्पतालमा समेत आईसीयू छैनन् ।’

त्यसैगरी मन्त्री परिषद्को बैठकले सामाजिक विकास मन्त्रालयका सचिव संयोजक रहने गरी ५ सदस्यीय गण्डकी प्रदेश स्वास्थ्य बिमा संयोजन समिति समेत गठन गरेको छ ।

गण्डकी सरकारले नेपाल सरकारसँग सशर्त अनुदानका लागि १० योजना थप समावेश गर्न अनुरोध गर्ने निर्णय समेत गरेको छ ।

जसअन्तर्गत गण्डकी प्रदेश प्रतिष्ठान निर्माण आयोजना, पोखराबाट प्रदेशका स्थानीय तह जोड्ने गरी कालोपत्र गर्ने आयोजना, पोखरा महानगरपालिका वरिपरि रिङरोड निर्माण, गण्डकीमा सरुवा तथा संक्रमण रोग नियन्त्रण अस्पताल निर्माण, प्रदेशस्तरीय शिक्षण अस्पताल निर्माण आयोजना रहेका छन् ।

यसैगरी, कास्की र तनहुँको पुडिटारमा प्रदेश औद्योगिक क्षेत्र निर्माण आयोजना, नवलपुरको लोकाहा खोलामा प्रदेशको औद्योगिक क्षेत्र निर्माण गर्ने आयोजना, फेवाताल संरक्षण तथा सौन्दर्यीकरण, संरचना निर्माणलगायत पनि छन् ।

प्रकाशित मिति: मंगलबार, वैशाख १६, २०७७ १९:१३