बेलवामा गाउँभरि तरकारी, ग्राहकसम्म पुर्‍याउने कसरी ?

A+ A A-

कोरोना संक्रमण नियन्त्रणका लागि घोषणा गरिएको लकडाउनका कारण किसानको तरकारी बारीमै कुहिन थालेको छ । लकडाउनको म्याद थपिएसँगै उत्पादित तरिकार बजारसम्म पुर्‍याउन नसक्दा बारीमै कुहिन थालेको हो ।

रुपन्देहीको शुद्धोधन गाउपालिका–१ बेलवामा गाउभरि तरकारी खेती छ । बारीमा काँक्रा, करेला, बडी, साग, बन्दागोपी, टमाटर फलेका छन् । तर, लकडाउनका कारण बजारसम्म पुर्‍याउन नसक्दा यहाँका धेरै किसान समस्यामा परेका छन् ।

अझै पनि बुटवल, भैरहवाका शहरमा भारतबाट रातरात तरकारी आइरहँदा नेपाली किसानको तरकारी भने बारीमै कुहिएर जाने अवस्था आएको किसान बताउँछन् ।

लकडाउनका कारण न्यून मूल्यमै भए पनि व्यापारीसँग आफूहरूले तरकारी बिक्री गर्नुपरेको बेलवाका कृषक सीताराम लोधले बताए ।

सिङ्गो गाउँ नै कृषिमा होमिएको बेलवामा उत्पादन भएको तरकारी सहज रूपमा बजारीकरण नहुँदा त्यसको प्रत्यक्ष फाइदा विचौलियाले उठाइरहेकाे कृषक बताउँछन् ।

न्यून मूल्यमा किसानको तरकारी खेतबाट उठाएर विचौलियाले भने बुटवल, भैरहवा, पाल्पासम्म महँगो भाउमा बेच्ने गरेका किसानको गुनासो छ ।

लकडाउनको अवधिभन्दा पहिला यहाँका कृषक गाउँमा उत्पादन भएको तरकारी बुटवलको हाटबजारलगायतका स्थानमा लगेर बिक्री वितरण गर्दै आएका थिए ।

किसान लोधका अनुसार हरियो तरकारी बिक्री भए पनि होटल तथा रेष्टुरेन्टमा प्रयोग हुने बन्दागोपी, टमाटर भने बेच्न निकै समस्या भइरहेको छ । ‘अरु तरिकार सस्तो मूल्यमा भए पनि खेतमै बिक्री भए पनि टमाटर र बन्दागोपी बेच्न समस्या भइरहेको छ,’ उनले समस्या सुनाए ।

उत्पादित वस्तु सहज रूपमा बिक्री गर्नका लागि गाउँपालिका तथा सरकारले पर्याप्त पिक अफ भ्यानको व्यवस्था गरेमा २/४ रुपैयाँ बढी भाउ पाउनेमा आफूहरू विश्वस्त रहेको यहाँका किसानले बताएका छन् ।

मायादेवी कृषक गाउँ ब्लकसमेत निर्माण गरिएको बेलवा गाउँमा हाल डेढ सयभन्दा बढी किसान छन् । ब्लक समितिका अध्यक्षसमेत रहेका किसान सुनीलकुमार लोधका अनुसार गाउँमा १ सय २८ हेक्टर क्षेत्रफलमा व्यावसायिक रूपमा तरकारी खेती भइरहेको छ ।

उनका अनुसार गाउँबाट प्रतिदिन ५० क्विन्टल बढी तरकारी बजारमा जाने गरेको छ । गाउँमा २ वटा मात्रै पिकअप भ्यान रहेकोमा अहिले लकडाउनका कारण बजारमा तरकारी सहज रुपमा पुग्न नसकेको कृषक लोधले बताए ।

‘किसान कम मूल्यमा तरकारी बिक्री गर्न बाध्य छन्, उनले भने, ‘तर के गर्नु लगानी नउठे पनि सस्तोमा बिक्री गर्नुको विकल्प छैन ।’

लकडाउनको म्याद निरन्तर थपिए पनि किसानको उत्पादित कृषिउपज बजारसम्म पुर्‍याउनका लागि हालसम्म कुनै पनि निकायले पहल नगरेको यहाँका कृषकले गुनासो गरेका छन् ।

प्रकाशित मिति: मंगलबार, वैशाख १६, २०७७ १०:४३