कोरोना सङ्कटबीच मस्जिद खोल्ने सरकारको तयारी

A+ A A-

कोरोना भाइरसको महामारीका कारण एसियामै सबैभन्दा बढी प्रभावित बनेको इरानले मस्जिदहरू खोल्ने तयारी गरेको छ ।

इरान सरकारले कोरोना भाइरसको सङ्कट कम हुँदै गएका क्षेत्रमा मस्जिद खोल्ने तयारीमा रहेको जनाएको छ । राष्ट्रपति हसन रुहानीले विस्तारै अब लकडाउनको प्रतिबन्धमा छुट दिन सुरु गरिने जानकारी दिएका हुन् ।

इरानी राष्ट्रपतिको वेबसाइटअनुसार इरानलाई संक्रमित र मृतकको संख्याको आधारमा सेतो, पहेँलो र रातो क्षेत्रमा विभाजन गरिएको छ ।

सोही आधारमा यी क्षेत्रमा हुने गतिविधिमा नियन्त्रण राखिनेछ । लगातार संक्रमित र मृत्यु हुनेको संख्या नभएका क्षेत्रमा ह्वाइट जोन मा राखिएको छ ।

राष्ट्रपति हसन रुहानीका अनुसार मस्जिदहरू खोलेर मानिसहरूले अब नमाज पढ्न सक्नेछन् । उनले रङका आधारमा बाँडिएका यी क्षेत्रको अवस्था कुनै पनि समयमा परिवर्तन गर्न सकिने उनले बताएका छन् ।

यद्यपि, राष्ट्रपतिले यो कोडिङ कहिलेबाट लागू हुन्छ भन्नेबारेमा केही बताएका छैनन् । उपस्वास्थ्यमन्त्री इराज हरिरचीले सरकारी टेलिभिजनलाई दिएको अन्तर्वार्तामा यतिबेला देशका १ सय १६ क्षेत्रलाई व्हाइट जोन र १ सय ३४ क्षेत्रलाई येल्लो जोन मानिएको जानकारी दिए ।

इरानमा १४ अप्रिलपछि मृत्यु हुनेको संख्यामा कमी आउन थालेको छ । स्वास्थ्य मन्त्रालयका प्रवक्ता किआनुुस जहाँपुरले पछिल्लो २४ घन्टामा ६० जनाको मृत्यु भएको जानकारी दिएका छन् ।

यसका साथै इरानमा कोरोना भाइरसका कारण मृत्यु हुनेको संख्या ५ हजार ७१० पुगेको छ भने ९० हजार ४ सय ८१ जना संक्रमित रहेका छन् । अर्थ व्यवस्था र सार्वजनिक स्वास्थ्यमा सन्तुलन कायम स्थापित गर्ने कोसिसमा लकडाउनले धक्का लागेको छ ।

प्रकाशित मिति: सोमबार, वैशाख १५, २०७७ ११:३८