अमेरिकी नाकाबन्दी सहेको क्युबाको यसरी भइरहेको छ प्रशंसा

A+ A A-

क्युबाले २ साताभित्र विश्वका १९ देशमा मेडिकल टोली पठायो । अमेरिकाको नाकाबन्दीका बाबजुद क्युबा कोभिड–१९ विरुद्धको लडाइँमा महत्त्वपूर्ण भूमिका निभाइरहेको छ ।

क्युबाले इटाली, अंगोला, जमाइका, मेक्सिको र भेनेजुएलासमेत १९ देशमा आफ्नो मेडिकल टिम पठाएको छ । जसमा ९ सय डाक्टर र नर्सको टोली छ ।

यसका साथै अर्जेन्टिना र स्पेनजस्ता देशको अनुरोधमा टोली जान बाँकी रहेको छ । क्युबाको मेडिकल टिमले यसअघि केही संकटको समयमा धेरैकाे ज्यान बचाइसकेको छ ।

यसअघि सन् २००४ मा श्रीलंकामा आएको सुनामी, पाकिस्तानमा २००५ मा आएको भूकम्प र सन् २००६ मा इन्डोनेसियामा आएको भूकम्पको समयमा क्युबाको मेडिकल टिमले सहयोग गरिसकेको छ ।

सन् २००६ मा इन्डोनेसिया गएको टिमका सदस्य डाक्टर ओस्कार पतोलले आफ्नो अभियानका बारेमा भनेका थिए, ‘आज एक ज्वालामुखी, भोलि अर्को भूकम्प र त्यसपछि बाढी किन नहोस् क्युबा कुनै पनि देशलाई सहयोग गर्न तयार छ ।’

कोरोनाबाट नराम्ररी प्रभावित इटालीमा क्युबाले ५२ जना डाक्टर र नर्स सहयोगका लागि पठाएको छ । कठिन अवस्थामा काम गर्न माहिर क्युबाका डाक्टर र नर्सले ठूलो सहयोग गरिरहेका छन् ।

करिब ६० वर्षदेखि क्युबा संसारका विभिन्न देशमा डाक्टर र नर्स पठाएर सहयोग गरिरहेको छ । यसलाई पश्चिमा राष्ट्रले मेडिकल डिप्लोमेसीका रुपमा व्याख्या गर्ने गरेका छन् भने क्युबाको अर्थतन्त्रमा पनि यसले सहयोग गर्दै आएको छ ।

क्युबाले शनिबार मात्रै दक्षिण अफ्रिकामा २१६ जना स्वास्थ्यकर्मी पठाएको छ । कोरोना महामारीको उपचारका लागि क्युबाले अन्य २० वटा टोली पठाएको छ ।

वामपन्थी शासन व्यवस्था रहेको क्युबाले अफ्रिकी र क्यारेबियन देशमा करिब १ हजार २ सय स्वास्थ्यकर्मी पठाएको छ । अमेरिकी राष्ट्रपति डोनाल्ड ट्रम्पले सबै देशलाई क्युबाका स्वास्थ्यकर्मी स्वीकार नगर्न आग्रह गरेका छन् । यसका बाबजुद इटलीसहितका युरोपेली देशमा समेत क्युबाका स्वास्थ्यकर्मी खटिएका छन् ।

तर क्युबाले जुन देशमा आफ्ना स्वास्थ्यकर्मी पठाएका छ, त्यहाँ स्वागत भइरहेको छ । क्युबामा हालसम्म १३ सयभन्दा बढीमा कोरोना भाइरस देखिएको छ भने ५१ जनाको मृत्यु भएको छ ।

क्युबामा प्रतिव्यक्ति डाक्टरको उपलब्धता सबैभन्दा बढी रहेको छ । क्युबाको स्वास्थ्य प्रणालीको संसारभरमा महामारीविरुद्ध लड्नका लागि प्रशंसा पाउने गर्छ ।

दक्षिण अफ्रिकाका स्वास्थ्यमन्त्री ज्वेली मखिजले भने, ‘क्युबाको सबैभन्दा राम्रो कुरा भनेको त्यहाँ सामुदायिक स्वास्थ्य सेवा छ । हामी यो मोडल मन पराउँछौँ ।’

दक्षिण अफ्रिकामा ४ हजार ३ सय ६१ जनाभन्दा बढी संक्रमित रहेका छन् भने ८६ जनाको मृत्यु भएको छ । दक्षिण अफ्रिका र क्युबाबीच राम्रो सम्बन्ध रहेको छ ।

क्युबाका सेनाले दक्षिण अंगोलामा युद्ध लडेका थिए भने नेल्सन मन्डेलालाई जेलबाट छुटाउन सहयोग गरेका थिए । नेल्सन मन्डेलाले मुक्त भएपछि क्युबाका नेता फिडेल क्यास्ट्रोलाई धन्यवाद दिएका थिए ।

प्रकाशित मिति: आइतबार, वैशाख १४, २०७७ १४:२४