स्वास्थ्यबारे अनेक अड्कल भइरहँदा किमको रेल किन पुग्यो वोनसान ?

A+ A A-

उत्तर कोरियाली नेता किम जोङ उन आफ्ना हजुरबुबा तथा उत्तर कोरियाका संस्थापक नेता किम इल सुङको जन्म दिन १५ अप्रिलको कार्यक्रममा सहभागी नभएपछि उनको स्वास्थ्यलाई लिएर अनेक अट्कलबाजी चलिरहेको छ ।

शनिबार उत्तर कोरियाली सेनाको स्थापना दिवसका दिन उनी सहभागी भएनन् । त्यसपछि उनको स्वास्थ्यलाई लिएर थप अट्कल काट्न थालिएको छ ।

न्युजविकमा छापिएको रिपोर्टअनुसार अमेरिकी गुप्तचर एजेन्सीले कुनै प्रकारको असामान्य सैन्य गतिविधि नदेखेपनि त्यहाँको अवस्थाबारे नजिकबाट नियाल्ने कोशिस गरिरहेको छ ।

न्युजविकले पेन्टागनका एक वरिष्ठ अधिकारीको हवाला दिँदै लेखेको छ, ‘हामीले उत्तर कोरियाली नेता किमको स्वास्थ्यबारे ठोस मुल्यांकन गर्नसकिने आधारका कुनै प्रकारको संकेत या अतिरिक्त जानकारी पाएका छैनौं ।’

तर अधिकारीहरुले वोनसानमा रेल हुनु र समारोहमा अनुपस्थित हुनुले उनी बिरामी भएको विश्वास गर्न सकिने बताएका छन् । उत्तर कोरियाली मिडियाले अन्तिम पटक ११ अप्रिलमा किम पार्टीको पोलिटब्युरो बैठकमा सहभागी भएको समाचार बाहिर ल्याएका थिए ।

वासिंगटनस्थित उत्तर कोरिया मनिटरिङ प्रोजेक्टले स्याटेलाइट फोटोको समीक्षा गर्दै उत्तर कोरियाली रिसोर्ट टाउन वोनसानमा पार्किङमा राखिएको रेल उत्तर कोरियाली नेताले प्रयोग गर्ने रेल नै भएको बताएको छ । मनिटरिङ प्रोजेक्ट ३८ नर्थले रेल २१ अप्रिलमा वोनसानको लिडरसिप स्टेशनमा पार्क गरेको जनाएको छ ।

मनिटरिङ प्रोजेक्ट ३८ नर्थका अनुसार यो स्टेशन उत्तर कोरियाली नेता किमको परिवारका लागि सुरक्षित राखिएको हुन्छ । यो रिपोर्ट रोयटर्सले प्रकाशित गरेको छ । यो रिपोर्टलाई रोयटर्सले स्वतन्त्र रुपमा पुष्टि गरेको छैन । उसले किम वोनसानमै रहेको दाबी पनि गरेको छैन ।

रिपोर्टमा भनिएको छ, ‘रेलको उपस्थितिले किम त्यही भएको र उनको स्वास्थ्यबारे जानकारी पाएको पुष्टि हुँदैन । तर उनी देशको पूर्वी तटीय क्षेत्रमा छन् भन्नेचाँहि भन्न सकिन्छ ।’

दक्षिण कोरियाको राजधानी सोलस्थित न्युज वेबसाइट डेली एनकेको रिपोर्टअनुसार किम जोङ उन प्योङयाङको उत्तरी इलाका रिसोर्ट काउन्टी अफ ह्याङसनमा उपचाररत छन् ।

प्रकाशित मिति: आइतबार, वैशाख १४, २०७७ १०:२०