कोरोनाको खोप सबैका लागि उपलब्ध हुनुपर्छः महासचिव गुटर्रेस

A+ A A-

संयुक्त राष्ट्रसंघका महासचिव एन्टोनियो गुटर्रेसले कोरोना भाइरस (कोभिड–१९) को खोप विश्वका सबै नागरिकका लागि उपलब्ध हुनुपर्ने बताएका छन् ।

उनले शुक्रबार ट्वीट गर्दै भनेका छन्, ‘यो कुनै एक देश वा क्षेत्र विशेषका लागि होइन कि संसारमा सबै मानिसले उति नै दुःख पाएकाले यो खोप विश्वका सबै देशका लागि सुलभ हुनुपर्दछ ।’

यो खोप विश्वका सबै नागरिकले उपभोग गर्न पाउने सार्वजनिक वस्तुजस्तै हुनुपर्नेमा उनको जोड छ । विश्वका केही देशले पछिल्ला केही दिनयता यो खोप मानिसमा परीक्षण गरेको भन्ने समाचार आएपछि महासचिव एन्टोनियो गुटर्रेसको यो भनाइ आएको हो ।

कोरोनाको प्रकोपका विरुद्ध खोप निर्माणको प्रतिस्पर्धा विश्वमा भइरहेकोमा २ दिनअघि बेलायत र संयुक्त राज्य अमेरिकाले यो खोपको परीक्षण मानिसमा सुरु भएको बताएका थिए ।

बेलायतमा कोरोना खोपको परीक्षण सुरु गरिएको समाचार बिहीबार मात्र सार्वजनिक भएको थियो । बेलायतले अक्सफोर्डमा मानिसमा कोरोना भाइरस खोपको पहिलो परीक्षण सुरु गरिएको समाचार आएको थियो ।

महासचिव गुटर्रेसले ट्वीटमा भनेका छन्, ‘अहिलेको सम्पूर्ण विश्वले नै यो कोभिड–१९ को महामारीबाट मुक्ति चाहन्छ । मलाई लाग्छ, यो नै संसारको जनस्वास्थ्यकै सबैभन्दा ठूलो उपलब्धि हुनेछ ।’

उनले विश्वव्यापी चासोको विषय भएकाले यससम्बन्धी तथ्यहरू सार्वजनिक गर्नुपर्ने र संसारका मानिसले पनि यसलाई औषधिका रूपमा प्रयोग गर्ने अधिकार राख्ने पनि बताएका छन् ।

उनले यो नयाँ प्रयासले विश्वका नेताहरू, निजीक्षेत्र तथा सरकारी निकाय तथा क्षेत्रहरू, वैज्ञानिक तथा मानवीय सहायतामा काम गर्ने विश्वका अधिकारकर्मी तथा नागरिक एवं विश्वमा जनस्वास्थ्यका क्षेत्रमा काम गर्ने सबैलाई एकै ठाउँमा ल्याएको पनि बताएका छन् ।

महासचिव गुटर्रेसल यो प्रयासका लागि विश्वका नेताहरूलाई धन्यवाद पनि दिएका छन् । विश्वव्यापी रूपमा फैलिएको यो कोभिड–१९ को महामारीका विरुद्धमा एक भएर लड्न पनि उनले सबैलाई आह्वान गरेका छन् ।