जुम्ल्याहा लवकुशको सेन्सर डिजाइनमा स्यानिटाइजिङ स्टेसन निर्माण

A+ A A-

डेढ वर्षअगाडि ‘गोगो रोबोट’ बनाएर चर्चामा आएका तिलोत्तमा योगीकुटीका जुम्ल्याहा दाजुभाइ लवकुश पन्थीले स्यानिटाइजिङ स्टेसनमा प्रयोग गर्न सकिने सेन्सर डिजाइन गरेका छन् । यो स्टेसनमा सवारीसाधनलाई स्यानिटाइजेसन गर्ने गरिन्छ ।

कोरोनो भाइरसको संक्रमणबाट बच्न सवारीसाधनलाई स्यानिटाइजेसन गर्न मिल्ने गरी तिलोत्तमा नगरपालिकाको प्रवेशद्वारमा यो स्टेसन बनाइएको हो । शंकरनगर खानेपानी उपभोक्ता तथा सरसफाइ संस्थाको लगानी र प्राविधिक सहयोगमा स्टेसन निर्माण गरिएको हो ।

स्टेसनमा जुम्ल्याहा दाजुभाइले बनाएको ‘सी प्राेग्रामिङ ल्याङ्ग्वेज’ मार्फत गेटमा प्रवेश गर्ने सवारीसाधन वा मानिसलाई सेन्सरले मोसन डिटेक्ट गर्ने गर्दछ । मोसन डिटेक्ट गर्नेबित्तिकै प्रवेशद्वारमा जडान गरिएका १२ वटा नोजलबाट सवारीसाधनलाई १० सेकेण्डसम्म अटोमेटिक स्यानिटाइजर छर्कर्ने गर्दछन् ।

प्यासिभ इनफारेट सेन्टर (पीआईआर) जडित सेन्सरले आफैँ डिटेक्ट गर्नासाथ १ एचपीको मोटरसमेत खुला गराएर १२ वटा नोजलमार्फत सवारी साधनलाई स्यानिटाइजर छर्कन मिल्ने सेन्सरका डिजाइनकर्ता कुश पन्थीले बताए ।

डेढ वर्षअघि बनाएको ‘गो गो रोबोर्ट’ ले हात मिलाउँदा प्रयोग गरिने सेन्सरलाई मोडिफाइड गरेर स्टेसनमा जडान गरिएको लव पन्थीले बताए ।

स्टेसन निर्माण तथा डिजाइन भने खानेपानी संस्थाकै इन्जिनियर दीपक पाण्डे र प्राविधिक सहयोग सुनील गौतमले गरेका हुन् । मानिसले स्यानिटाइजरले हात धुँदा सुरक्षित मान्ने भएपछि सवारीसाधनबाट पनि कोरोना संक्रमण हुन सक्ने भएकाले संस्थाले यो स्टेसन निर्माण गरेको खानेपानी तथा सरसफाइ उपभोक्ता संस्थाका अध्यक्ष हरि तिवारीले जानकारी दिए ।

स्टेसनमा १ हजार लिटरको खानेपानी ट्यांकीसमेत जडान गरिएको छ । इन्टरनेट, विद्युतको प्रयोगसमेत भएको स्टेसनमा विश्व स्वास्थ्य संगठन (डब्लूएचओ) को मापदण्डअनुसार स्यानिटाइजर बनाइने इन्जिनियर पाण्डेले बताए । एनएस स्ट्याण्डरको क्लोरिन र डब्लूएचओको मापदण्डअनुसार लिक्विड क्लोरिन मिश्रण गरेर स्यानिटाइजर बनाइने उनको भनाइ छ ।

स्टेसन निर्माणका लागि सुरुवातमा १ लाख रुपैयाँ लगानी लागेको छ । क्रमशः सवारीसाधनको प्रवेशका आधारमा स्यानिटाइजर बनाइने हुँदा लागत बढ्ने इन्जिनियर पाण्डेले बताए ।

सो स्टेसनको तिलोत्तमा नगरपालिकाका नगरप्रमुख वासुदेव घिमिरेले उद्घाटनसमेत गरेका छन् । उनले नगरपालिकाको ओमसतिया सिमानामा नगरपालिकाकाे आफ्नै लगानीमा स्टेसन निर्माण गरिने बताए ।

प्रकाशित मिति: शनिबार, वैशाख १३, २०७७ १२:००