कोरोनाविरुद्धको खोपको आशा बढ्यो, मानवीय परीक्षण सुरु

A+ A A-

अमेरिकी राष्ट्रपति डोनाल्ड ट्रम्पले कोरोना भाइरसको खोप निर्माणमा सफलता नजिक पुगेको दाबी गरेका छन् ।

उनले भने, ‘हामी खोप निर्माणको धेरै नजिक पुगेका छौं ।’ कोरोना भाइरस विरुद्धको खोप बनाउनका लागि अमेरिका, जर्मनी, बेलायत, चीनमा लगातार परीक्षण भइरहेको छ ।

ट्रम्पले भने, ‘केही राम्रा मान्छेहरुले यसबारेमा काम गरिरहेका छन् । तर हामी परीक्षणको नजिक छैनौं किनकि परीक्षण सुरु गर्नका लागि केही समय चाहिन्छ । हामी छिट्टै परीक्षणमा जाने कोशिसमा छौं ।’

संसारका धेरै विज्ञहरुले कोरोना भाइरसविरुद्धको खोप पूर्ण रुपमा उपलब्धताका लागि १ वर्षदेखि डेढवर्षसम्म लाग्ने बताउँदै आएका छन् ।

बेलायतमा भने कोरोना भाइरसविरुद्धको खोपको मानवीय परीक्षण सुरु भएको छ ।

कोरोना भाइरस विरुद्धको सम्भावित खोपको मानवीय परीक्षण युरोपमा पहिलोपटक सुरु भएको हो । सम्भावित खोपको परीक्षण अक्सफोर्डमा सुरु भएको छ ।

खोपको परीक्षणका लागि स्वतन्त्र रुपमा तयार भएका दुईजनालाई खोपको मात्रा प्रदान गरिएको बेलायती सञ्चारमाध्यमले जानकारी दिएका छन् । खोपको परीक्षणका लागि ८ सयभन्दा बढीले नाम लेखाएका छन् ।

त्यसमध्ये आधालाई कोरोना भाइरसविरुद्धको र आधालाई मेनेनजाइटिसविरुद्धको खोप दिइनेछ । जसबाट कोरोना संक्रमण नियन्त्रण गर्जे अपेक्षा गरिएको छ ।

तर खोप लगाउनेले आफूले कोरोनाको खोप लगाएको हो वा मेनेनजाइटिसको भन्ने थाहा पाउने छैनन् । यसबारे डाक्टरलेमात्रै जानकारी राख्नेछन् ।

अक्सफोर्ड विश्वविद्यालयकी भ्याक्सिनोलोजी प्राध्यापक सारा गिल्बर्ट नेतृत्वको टोलीले तीन महिना भित्रै निर्माण गरेको खोपको मानवीय परीक्षण गरिएको हो ।

उनले भनेकी छन्, ‘यो खोपले काम गर्छ भन्नेमा व्यक्तिगत रुपमा म आशावादी छु र हामीले परीक्षण गर्नुपर्छ । मानवबाट तथ्यांक लिएर खोपले वास्तममै काम गर्छ भनेर देखाउनुपर्छ ।’

अक्सफोर्ड विश्वविद्यालयले नै अर्को प्रकारको कोरोना भाइरस मर्सविरुद्धको खोप बनाएको थियो ।

प्रकाशित मिति: शुक्रबार, वैशाख १२, २०७७ ०९:१९