किमको स्वास्थ्य अवस्थाबारे ट्रम्पले दिए सार्वजनिक प्रतिक्रिया

A+ A A-

अमेरिकी राष्ट्रसित डोनाल्ड ट्रम्पले उत्तर कोरियाका नेता किम जोन–उनको स्वास्थ्य अवस्थाबारे पहिलो पटक सार्वजनिक अभिव्यक्ति दिएका छन् ।

अमेरिकी गुप्तचर निकायले उनको अवस्था नाजुक रहेको बताइरहेका बेला ट्रम्पले भने किम गम्भीर बिरामी परेको भन्ने कुरा आफूलाई सत्य नलागेको बताएका छन् ।

कोरोना भाइरस टास्क फोर्सको नियमित पत्रकार सम्मेलनको क्रममा उनले किमको स्वास्थ्य सम्बन्धी टिप्पणी गरेका हुन् । सीएनएनले यसै साता अमेरिकी गुप्तचर अधिकारीको भनाई उदृत गर्दै किमको स्वास्थ्य अवस्था गम्भीर रहेको समाचार सार्वजनिक गरेको थियो ।

तर ट्रम्पले भने किम बारेका समाचार सत्य नभएको बताएका छन् । मंगलबार उनले नेता किमको स्वास्थ्यबारे बुझ्न उत्तर कोरियाका अधिकारीलाई आफूले सम्पर्क गर्न सक्ने बताएका थिए । तर कुनै उत्तर कोरियाली अधिकारीसँग सम्पर्क भएको भने उनले खुलाएका छैनन् ।

गत सोमबार दक्षिण कोरियाको डेली एनके अनलाइनले नेता किमको १२ अप्रिलमा मुटुको शल्यक्रिया भएको र त्यसपछि उनको स्वास्थ्य अवस्था गम्भीर रहेको उल्लेख गरेको थियो ।

उत्तर कोरियाको सरकारी सञ्चारमाध्यमले भने किमको स्वास्थ्य अवस्थाबारे हालसम्म कुनै जानकारी दिएको छैन ।

अमेरिकी सञ्चारमाध्यम सीएनएनले गुप्तचर निकायको स्रोतलाई उद्धृत गर्दै शल्यक्रियापछि किमको स्वास्थ्य अवस्था अति गम्भीर रहेको समाचार सार्वजनिक गरेको थियो । दक्षिण कोरियाका अधिकारीहरुले भने सो समाचार गलत भएको बताएका थिए ।

प्रकाशित मिति: शुक्रबार, वैशाख १२, २०७७ ०७:१८