मुख्यमन्त्रीको सीडीओलाई निर्देशन : १ स्थानीय तहबाट अर्कोमा जान नदिनू

A+ A A-

कोरोना भाइरस (कोभिड–१९)को संक्रमण फैलिन नदिन लकडाउनलाई क्षेत्रगत रूपमा कडाइ गर्न कर्णाली प्रदेशका मुख्यमन्त्री महेन्द्रबहादुर शाहीले निर्देशन दिएका छन् । उनले कर्णालीका १० वटा जिल्लाका प्रमुख जिल्ला अधिकारी (सीडीओ) सँग भिडियो संवाद गर्दै लकडाउनलाई कडाइ गर्न निर्देशन दिएका हुन् ।

मुख्यमन्त्री शाहीले १ टोलबाट अर्को टोल, १ स्थानीय तहबाट अर्को स्थानीय तह र १ जिल्लाबाट अर्को जिल्लामा हुने आवागमनलाई कडाइ गर्न निर्देशन दिएको मुख्यमन्त्रीको सचिवालयले जनाएको छ ।

मुख्यमन्त्री शाहीले लकडाउनले दैनिकी कष्टकर बनेका कारण उद्धार गरी गाउँ फर्काइएका मजदुर, विद्यार्थीलगायतका सबै नागरिकहरूलाई अनिवार्य क्वारेन्टाइनमा राख्ने व्यवस्था मिलाउन प्रमुख जिल्ला अधिकारीहरूलाई निर्देशन दिएका छन् ।

‘जोखिममा रहेका नागरिकको उद्धार गर्नु सरकारको दायित्व हो,’ उनले भने, ‘अरू देशका सरकारले २/४ जनाका लागि भए पनि जहाजै रिजर्भ गरेर स्वदेश फर्काएका छन् । समस्यामा परेका नागरिकलाई किन गाउँ फर्काएको भनेर तर्क गर्छन् ।’

नागरिक कार्यस्थल तथा डेरामा भोकभोकै हुने र उनीहरूको व्यवस्थापन पनि नगरिएकाे हालकाे अवस्थाले जनतामा राज्यप्रति नै वितृष्णा पैदा हुने भएकाले अति समस्यामा रहेका र प्रदेशको सीमासम्म हिँड्दै आइपुगेका नागरिकलाई स्थानीय तहसँगको सहकार्यमा सम्बन्धित स्थानीय तहसम्म पुर्‍याउन सहजीकरण गरिएको उनको भनाइ छ ।

मुख्यमन्त्री शाहीले सामाजिक दूरी कायम गर्दै एकाघरका परिवार मात्रै सहभागी हुनेगरी किसानहरूलाई मौसमी बाली भित्र्याउने, ब्याड राख्नेलगायतका कृषि कार्य गर्न दिने व्यवस्था मिलाउन पनि सीडीओहरूलाई निर्देशन दिए ।

त्यसैगरी, मेसिन र कम जनशक्तिको प्रयोगबाट हुन सक्ने विकास निर्माणका कामहरूमा पनि निरन्तरता दिनका लागि व्यवस्थापन गर्न उनले निर्देशन दिए ।

प्रकाशित मिति: बिहीबार, वैशाख ११, २०७७ १८:४२