सरोकारवाला भन्छन्ः एसईई, ११ र १२ को परीक्षा तत्काल सम्भव छैन

A+ A A-

लकडाउन खुलेर पूर्ण रूपमा वातावरण शान्त नभएसम्म एसईई, कक्षा ११ र १२ को परीक्षा गर्न नसकिने सरोकारवाला निकायहरूले बताएका छन् ।

बुधबार राष्ट्रिय परीक्षा बोर्डले गरेको छलफलमा प्याब्सन, एनप्याब्सन, शिक्षक महासंघ, हिसानलगायतका प्रतिनिधिले तत्काल परीक्षा गर्न नसकिने बताएका हुन् । उनीहरूले विभिन्न विकल्पबारे सोच्न बोर्ड प्रतिनिधिलाई सुझाएका छन् ।

परीक्षा सम्भव छैन, विद्यालयको मूल्यांकनलाई मान्यता दिऔँ
बाबुराम थापा, अध्यक्ष, नेपाल शिक्षक महासंघ

राष्ट्रिय परीक्षा बोर्डले परीक्षा कसरी गर्ने ? के गर्ने भन्नेबारे सुझावका लागि बोलाएको हो । बैठकमा विभिन्न विकल्पका विषयमा छलफल भए । तत्काल परीक्षा गर्न सकिने स्थिति छैन ।

यस्तो समयमा विद्यालयले ल्याएको नतिजालाई नै मान्यता दिँदा उपयुक्त हुन्छ । यदि परीक्षा नै गर्ने हो भने स्थिति सामान्य भएपछि छिटो नजिता निकाल्ने गरी गर्नुपर्छ ।

जेठ–असारसम्म परीक्षा नभए पनि शैक्षिकसत्र व्यवस्थापन गर्न सकिन्छ । जेठ–असारसम्म पनि गर्न सकिएन भने समस्या हुने हो । यदि त्यसपछि पनि महामारी झन् फैलियो भने परीक्षा हुने कुरै भएन । स्वास्थ्यभन्दा ठूलो परीक्षा होइन ।

लकडाउन खुलेको १५ दिनपछि गरौँ
कुमार घिमिरे, महासचिव, प्याब्सन

वातावरण सहज नबनेसम्म परीक्षा गर्न सम्भव छैन । जेठभरमा परीक्षा भएमा होम सेन्टरबाट पनि दिन सकिने विकल्प छ । लकडाउन लामो समयसम्म गयो भने विद्यालयको आन्तरिक मूल्यांकनलाई आधार मान्न पनि सकिन्छ ।

प्रदेशस्तरीय परीक्षा गर्दा के हुन्छ ? भन्ने विषयमा पनि छलफल भएको छ । तर, लकडाउन कति समयसम्म जान्छ भन्ने हो । परीक्षा लिनु मात्र ठूलो होइन । कक्षा १ देखि ९ सम्मको परीक्षा सकिएको छ । तर, रिजल्ट निकाल्न सकिएको छैन ।

रिजल्ट पनि अनलाइनबाट निकाल्न सकिन्छ । तर, विद्यार्थीलाई विद्यालयमा बोलाएर पढाउने वातावरण छैन । त्यसैले यो समयमा परीक्षा नै महत्त्वपूर्ण होइन ।

लकडाउन खुलेको १५ दिनपछि परीक्षा गर्ने गरी तयारी गर्दा उपयुक्त हुन्छ । यो समय हाम्रो लागि महत्त्वपूर्ण पनि छ । समग्र शैक्षिक प्रणालीलाई सुधार गर्न सकिन्छ । त्यसतर्फ सबैले सोच्न जरुरी छ ।

राय सुझाव लिँदै छौँ
चन्द्रमणि पौडेल, अध्यक्ष, राष्ट्रिय परीक्षा बोर्ड

परीक्षा कसरी गर्ने ? के गर्ने भन्ने विषयमा सरोकारवाला निकायहरूसँग छलफल गरिरहेका छौँ । आज पनि परीक्षाका विकल्पका विषयमा छलफल भएको छ । विभिन्न निकायबाट विभिन्न सुझाव आएका छन् । स्थिति सामान्य नभएसम्म परीक्षा गर्न नहुने सुझाव धेरै आएको छ । सबै पक्षसँग छलफल गरेर बोर्डले निर्णय गर्छ ।

एसईई ६ चैत, १२ को परीक्षा ८ वैशाख र ११ को परीक्षा २१ वैशाखमा गर्ने तालिका सार्वजनिक गरिएको थियो । कोरोना भाइरस (कोभिड १९) का कारण अन्तिम समयमा आएर परीक्षा स्थगित गरिएको थियो ।

प्रकाशित मिति: बुधबार, वैशाख १०, २०७७ १६:१२