विरामी र चालकको दूरी कायम राख्न एम्बुलेन्समा पनि क्याविन

A+ A A-

कोरोना भाइरसको संक्रमण रोक्न सरकारले जारी गरेको लकडाउनले १ महिना पार गरेको छ । अहिले निजी तथा सार्वजनिक सवारी साधन ठप्प छन् । उद्योग, व्यवसाय, शिक्षण संस्था पनि बन्द छन् ।

कोरोनाको उपचार र विरामी बोक्न एम्बुलेन्स र अस्पताल भने खुल्ला छन् । खुलेका अस्पतालमा सुरक्षा सर्तकता अपनाइएको छ । एम्बुलेन्स चालकले पनि सुरक्षा सर्तकता अपनाउँदै आफ्नो सेवा दिइरहेका छन् ।

एम्बुलेन्स चालकले पीपीई, मास्क, ग्लोब्स लगाएरै सेवा दिइरहेका छन् । कोरोना संक्रमणबाट बच्न पछिल्लो समय एम्बुलेन्समा सेफ्टी क्याविनसमेत जडान गर्न थालिएको छ ।

कोरोनाका विरामी बोक्नुपर्ने अवस्थामा जोखिम हुन सक्ने भएकाले एम्बुलेन्समा धमाधम क्याविन बनाउन थालिएको हो । यसो गर्दा विरामीमा भएको संक्रमण चालकसँग नआउने र सुरक्षित भइने एम्बुलेन्स चालक बताउँछन् ।

राप्ती गाउपालिका–५ का सुवास चौधरी स्वास्थ्य शिक्षा तथा सामुदायिक स्वाथ्य संस्थाको एम्बुलेन्स चलाउँछन् । २ बर्षदेखि एम्बुलेन्स चालाउन थालेका चौधरीले अहिले एम्बुलेन्समा क्याविन राखेका छन् । ‘पेसा नै सेवामुलक पर्‍याे । जस्तो परिस्थितिमा पनि सेवाबाट पछि हट्ने कुरा आएन । त्यसैले संक्रमण नहोस् भनेर पाटेशन गरेको हुँ ।’ उनले भने ।

चौधरीले कोरोना संक्रमणको डरले परिवारले काममा नजानजा भने पनि सुरक्षा सर्तकताका लागि एम्बुलेन्स नै पाटेशन गरेर भए पनि सेवा दिइरहेको बताए । उनी काठमाडौं, चितवन, पाल्पा, गुल्मी, दाङ, बुटवलसम्म यो अवस्थामा विरामी ल्याउने पुरार्याउने गरिहरको छन् ।

लु १ च ४७५५ नम्बर एम्बुलेन्सका चालक हरि कार्कीले जोखिमपूर्ण अवस्थामा खटिनुपर्ने भएकोले क्याविन जडान गरिएको बताए ।

विरामीसँगको दूरी कायम गर्न जिल्ला प्रशासन कार्यालय र जनस्वास्थ्य कार्यालयले गाडीमा पाटेशन (क्याविन) राख्न निर्देशन दिएपछि चालकले सुरक्षा सावधानीका लागि पाटेशन गर्न थालेका हुन् ।

विरामी र चालकसँगको दूरी कायम राख्न निर्देशन गरे अनुरुप एम्बुलेन्समा पाटेशन भइरहेको संयुक्त एम्बुलेन्स चालक संघ रुपन्देहीका अध्यक्ष सुरज तिवारीले बताए । ‘कतिपय स्थानिय तह आफँले पार्टेसन गराइदिएका छन् । कतिले आफैँ गर्नुभएको छ’ उनले भने । तिवारीले रुपन्देहीका ४० बढी एम्बुलेन्समा पाटेशन गरिएको बताए । कोरोना सन्त्रास हटेपछि भने अहिले एम्बुलेन्समा जडान गरिएका क्याविन हटाइने चालकले बताएका छन् ।

रुपन्देहीमा ८० बढी एम्बुलेन्स सञ्चालनमा छन् । पश्चिम नवलपरासीको सुनवल नगरपालिकाले आफ्ना नगरभित्रका १० वटा एम्बुलेन्समा पार्टेसन गरिदिएको छ ।

सुरुवातमा पीपीई र मास्कबिना नै विरामी ओसारपोसार गरेका एम्बुलेन्स चालकले अहिले सुरक्षा सावधानी अपनाइरहेका छन् । तर, उनीहरुले कोरोनाको जोखिम झन् बढ्दै गए पनि सरकारले पर्याप्त मात्रामा पीपीई र आवश्यक सुरक्षा सामग्रीको प्रबन्ध नभएको गुनासो गरेका छन् ।

प्रकाशित मिति: बुधबार, वैशाख १०, २०७७ १०:१४