निजी विद्यालयले १५ वैशाखदेखि अनलाइनबाट नयाँ शैक्षिक सत्र चलाउने

A+ A A-

निजी विद्यालयहरूले नयाँ शैक्षिक सत्र १५ वैशाखबाट सुरु गर्ने तयारी गरेका छन् । निजी तथा आवासीय विद्यालय सङ्गठन (प्याब्सन), नेसनल प्याब्सनले १५ वैशाखबाट नयाँ शैक्षिक सत्र सुरु गर्ने तयारी गरेका हुन् ।

अनलाइनबाट रिजल्ट, भर्ना र कक्षा

टीका पुरी, अध्यक्ष, प्याब्सन

माध्यमिक शिक्षा परीक्षा (एसईई), ११ र १२ को परीक्षा कसरी गर्ने ? कक्षा १ देखि ९ सम्मको वार्षिक परीक्षाको परीक्षाफल कसरी प्रकाशन गर्ने ? नयाँ शैक्षिक सत्र कसरी चलाउने ? भन्ने विषयमा छलफल चलिरहेको छ ।

मन्त्रालयसँग हामीले अनलाइनबाट परीक्षाफल प्रकाशन गर्न, नयाँ शैक्षिक सत्र सञ्चालन गर्न अनुमति मागेका छौँ । १५ वैशाखसम्म लकडाउन खुले पनि नखुले पनि अनलाइनबाट विद्यालय सञ्चालन गर्ने तयारी गरेका छौँ ।

विद्यार्थीको नजिता तयार पार्ने काम शिक्षकहरूले घरबाट गरिरहनुभएको छ । अनलाइनबाट रिजल्ट प्रकाशन गर्छौं । लकडाउन खुले पनि तत्काल विद्यार्थी र शिक्षकलाई विद्यालयमा बोलाएर पठनपाठन सञ्चालन गर्ने अवस्था छैन । त्यसैले विद्यार्थी भर्नादेखि पढाउनेसम्म अनलाइनबाट गर्नुपर्छ । त्यसका लागि रेडियो, टेलिभिजन, इन्टरनेटबाट भर्चुअल कक्षा सञ्चालनमा जुटेका छौँ ।

अनलाइनबाट रिजल्ट

सुवास न्यौपाने

महासचिव, नेसनल प्याब्सन

कतिपय विद्यालयले भर्चुअल कक्षा सुरु गरिसकेका छन् । सरकारले पनि रेडियो टेलिभिजनबाट कक्षा सञ्चालन गरेको छ । यसले पनि सहयोग गरेको छ ।

कक्षा १ देखि ९ सम्मको रिजल्ट लकडाउन खुल्यो भने अभिभावकलाई बोलाएर दूरी कायम गरेर सार्वजनिक गर्नेछौँ । विद्यार्थीको रिजल्ट तयारी अवस्थामा छ । यदि लकडाउन लम्बियो भने अनलाइनबाट १५ वैशाखपछि रिजल्ट सार्वजनिक गर्नेछौँ अनि कक्षाहरू अनलाइबाट सुरु गर्छौं ।

शैक्षिक सत्र सम्भव छैन

केशव पुरी

अध्यक्ष, अभिभावक संघ नेपाल

१५ वैशाखपछि शैक्षिक सत्र चलाउने गलत कुरा हो । ठूला ३० प्रतिशत विद्यालयले अनलाइनबाट पढाउन सक्लान् । सबै विद्यालयको क्षमता उस्तै छैन । कतिपय निजी विद्यालयले सरकारीसरहको शुल्कमा पढाएका छन् अनि कसरी सम्भव हुन्छ ?

अहिलेकाे अवस्थामा विद्यार्थी भर्ना गरेर शैक्षिक सत्र सुरु गर्नु भनेकाे बालबालिकाको जीवनमाथि खेलवाड हो । निजी विद्यालयलाई अध्ययन, अध्यापनभन्दा पनि विद्यार्थी भर्ना गरेर वर्षभरिको पैसा असुल्न हतार भएको हो । कोरोना भाइरसको अवस्था के छ ? यसले कस्तो असर गर्छ ? भन्नेतिर विद्यालयकाे ध्यान छैन । पैसा उठाउनमा मात्र ध्याउन्न छ । अहिले नै शैक्षिक सत्र चलाउनुहुँदैन ।

सरकारी विद्यालयको टुंगो छैन

सरकारी विद्यालय कहिलेबाट खुल्ने भन्ने टुंगो छैन । सरकारले अनलाइन वा अन्य विकल्पबाट पढाउने विषयमा छलफल चलाइरहेको छ । तर, कसरी पढाउने ? कसरी नतिजा निकाल्ने ? भन्ने विषयमा कुनै निर्णय भएको छैन । लकडाउन नखुलेसम्म शैक्षिक सत्र चलाउन नसकिने सरकारी अधिकारीहरूले बताउँदै आएका छन् ।

नयाँ शैक्षिक सत्र २ वैशाखबाट सुरु हुनुपर्ने हो तर कोरोना भाइरसका कारण लकडाउन भएपछि शैक्षिक सत्र पनि प्रभावित भएको हो । कक्षा १ देखि ९ सम्मको परीक्षा कोरोना भाइरसका कारण अगाडि सारिएको थियो । एसईई, ११ र १२ को परीक्षा भने स्थगित भएको छ । परीक्षा कहिले हुने भन्ने अझै अन्योल छ ।

कोरोना भाइरसका कारण झण्डै ७० लाख बालबालिकाको पठनपाठन प्रभावित भएको छ ।

प्रकाशित मिति: मंगलबार, वैशाख ९, २०७७ १०:४७