उत्तर कोरियाली नेता किमको अवस्था गम्भीर !

A+ A A-

अमेरिकी अधिकारीहरूले उत्तर कोरियाली नेता किम जोङ उनको स्वास्थ्य अवस्था नाजुक भएको दाबी गरेका छन् ।

नेता किम हालै १५ अप्रिलमा आफ्ना हजुरबाको जन्मदिनको उत्सवमा सामेल भएका थिएनन् । यसपछि उनको स्वास्थ्य अवस्थालाई लिएर चिन्ता व्यक्त गरिएको छ । यद्यपि, उनी हजुरबाको जन्मोत्सवभन्दा ४ दिनअघि एउटा सरकारी बैठकमा सामेल भएका थिए ।

सीएनएनको रिपोर्टअनुसार एक अमेरिकी अधिकारीले किमको स्वास्थ्यलाई लिएर गरिएको चिन्ता विश्वसनीय भएको तर कति गम्भीर हो भनेर भन्न नसकिने बताएका छन् ।

अमेरिकी गुप्तचर विभागको निगरानीअनुसार उत्तर कोरियाली नेता किमको अवस्था मुटुको सर्जरीपछि गम्भीर खतरामा रहेको दाबी गरिएको छ ।

उत्तर कोरियालाई नजिकबाट नियाल्ने दक्षिण कोरियाको एउटा अनलाइन डेली एनकेले उनमा १२ अप्रिलदेखि मुटु र नसासम्बन्धी समस्या देखिएको र मुटुको शल्यक्रिया गरिएको उल्लेख गरेको छ ।

सो समाचारले उनी धेरै चुरोट सेवन गर्ने र मोटाउनुका साथै अत्यधिक काम गर्ने भएका कारण उनमा यस्तो समस्या देखिएको दाबी गरेको छ । उनको ह्यानसाङ्ग काउन्टीको एउटा अस्पतालमा उपचार भइरहेको बताइएको छ ।

किमको स्वास्थ्यमा सुधार आएपछि स्वास्थ्यकर्मीको एउटा टोली १९ अप्रिलमा प्योङयाङ फर्किएको थियो भने चिकित्सकको एउटा टोली उनको उपचारमा खटिएको बताएको छ ।

उत्तर कोरियाले आफ्ना नेतासम्बन्धी समाचारलाई पूर्ण रूपमा नियन्त्रण गर्ने गर्छ । सीएनएनले अमेरिकी गुप्तचर अधिकारीका अनुसार उनको स्वास्थ्यमा समस्या देखिएको उल्लेख गरेपछि आफूले यो समाचार पुष्टि गर्न नसक्ने बताएको छ ।

दक्षिण कोरियाले उत्तर कोरियाली नेता किमको स्वास्थ्य अवस्थाबारे अमेरिकी मिडिया रिपोर्टबारे सूक्ष्म अध्ययनमा रहेको जनाएको छ । उनको अनुपस्थितिलाई लिएर उनको स्वास्थ्यमा कुनै समस्या रहेको अड्कल गरिएको छ ।

उत्तर कोरियामा प्रेस स्वतन्त्र नहेकाले त्यहाँ राज्यको चाहनामा मात्र समाचार छापिन्छ । किम अन्तिम पटक ११ अप्रिलमा मिडिया सामु प्रस्तुत भएका थिए ।

१५ अप्रिलमा उत्तर कोरियाका संस्थापक नेता किम इल सुङको जन्म दिन रहेकाले त्यहाँ ठूलो उत्सव मनाइन्छ ।

तर, उक्त दिन उनका नाति तथा वर्तनमा नेता किम जोङ उन सहभागी भएको र उनले कुनै कुरा व्यक्त गरेको आधिकारिक उल्लेख गरिएको छैन । विशेषज्ञसमेत आफ्ना हजुरबाको जन्मोत्सवमा किमको अनुपश्थितिलाई लिएर आश्चर्यमा परेका छन् ।

प्रकाशित मिति: मंगलबार, वैशाख ९, २०७७ १०:३९