खोप उत्पादन र वितरण चुनौतीपूर्ण, अवस्था भयावह बन्न सक्छ : डब्लूएचओ

A+ A A-

विश्व स्वास्थ्य संगठन (डब्लुएचओ) ले कोरोना भाइरसविरुद्धको खोप उत्पादन र वितरण चुनौतिपूर्ण हुनसक्ने बताएको छ ।

डब्लुएचओका महानिर्देशक डा.टेड्रोस एडहानम गेयब्रेयससले राष्ट्रिय र वैश्विक स्तरमा एकजुट नभएमा आगामी दिनमा कोरोना भाइरसको कहर झनै भयावह बन्न सक्ने चेतावनी दिएका छन् ।

उनले भने, ‘यो यस्तो भाइरस हो, जसलाई अहिले पनि धेरै देश र धेरै मान्छेले सही तरिकाले बुझेका छैनन् । केही विकसित देश पनि सही जानकारीको अभावमा गलत निष्कर्ष निकालिरहेका छन् ।’

डब्लुएचओको आपतकालीन कार्यक्रमका कार्यकारी निर्देशक डा.माइकल रायनले कोरोनाविरुद्धको खोप चाँडै बने पनि त्यसको पर्याप्त उत्पादन तथा वितरण अति चुनौतिपूर्ण रहेको बताए ।

विश्वभर कोरोना भाइरसको खोप निर्माणका लागि दुई दर्जनभन्दा बढी कम्पनीहरुले काम गरिरहेका छन् भने केही खोपहरुको प्रि क्लिनिकल परीक्षण समेत सुरु भइसकेको छ ।

अमेरिकाको नेशनल इन्स्टिच्युड अफ एलर्जी एण्ड इन्फेक्सिअस डिजिजका निर्देशक डा.एन्थोनी फाउचीले कोरोना भाइरसविरुद्धको खोप निर्माणका लागि कम्तिमा डेढ वर्ष लाग्नसक्ने बताएका छन् ।

अहिले सही खोपको अनुसन्धानको चरणमा नै रहेको भन्दै आपतकालीन कार्यक्रमका कार्यकारी निर्देशक डा.रायनले सही खोप पत्ता लागेपछि पनि विश्वको माग पूरा हुनेगरी उत्पादन गर्नुपर्ने बताए ।

विश्वका अर्बौ मानिसलाई खोपको आवश्यकता पर्न सक्ने भएकाले सोही अनुसारको उत्पादन हुनु पर्ने उनको भनाई थियो । उनले कोरोनाविरुद्धको खोप पहुँच भएका देशका लागि मात्रै उत्पादन गरिए त्यसको परिणाम भयावह हुने सक्ने चेतावनी दिए ।

सबैलाई र सबै क्षेत्रमा खोप उपलब्धताका लागि लब्लुएचओले काम गरिरहेको उनले बताए । खोप उत्पादनका लागि डब्लुएचओले विश्वभरका सरकार तथा बिल एण्ड मेल्न्डिा गेट्स फाउन्डेसनसहितका गैरसरकारी दातृ निकायसँग पनि परामर्श गरिरहेको उनले जानकारी दिए ।

प्रकाशित मिति: मंगलबार, वैशाख ९, २०७७ ०८:२९