रामग्राम नगरपालिकाले वितरण गरेको चामल गुणस्तरहीन र ताैल पनि कम भएकाे पुष्टि

रामग्राम नगरपालिकाले वितरण गरेको चामल गुणस्तरहीन र ताैल पनि कम भएकाे पुष्टि

A+ A A-

गरिब तथा विपन्न परिवारका लागि पश्चिम नवलपरासीको रामग्राम नगरपालिकाले वितरण गरेको चामल गुणस्तरहीन भएको प्रमाणित भएको छ । नगरपालिकाले लकडाउनका कारण गरिब तथा विपन्न परिवारका लागि भन्दै राहत वितरण गरेको थियो ।

जनताले समेत नगरपालिकाले वितरण गरेको राहत चामल गन्हाएको भन्दै गत शुक्रबार केही वडाका जनताले नगरपालिकाको गेटमै लगेर फ्याँकिदिएका थिए ।

खाद्य तथा गुण नियन्त्रण कार्यालय भैरहवामा गरिएको नमुना परीक्षणमा राहतको चामल न्यून गुणस्तर भएको र तौलमा पनि कमी भएको कार्यालयका खाद्य निरीक्षक श्रवणकुमार ढुंगानाले बताए । उक्त चामल नेपाल सरकारले तोकेको मापदण्डविपरीत रहेको र तौलमा समेत कमी भएको पाइएपछि कारबाहीका लागि प्रक्रिया अघि बढाइएको छ ।

न्यून गुणस्तर भएको चामलमा क्यालोरी नहुने खाद्य निरीक्षक श्रवणकुमार ढुंगानाले बताए । वितरण गरिएको चामलमा प्रति १० केजीमा ३ सय ७० ग्रामसम्म तौलमा कमी पाइएको गुणस्तर तथा नाप तौल कार्यालयका खाद्य निरीक्षक नुरुल ऐन भाटले बताए ।

खाद्य वस्तुको गुणस्तर कम भए अधिकतम ५० हजार जरिमाना र ५ वर्षसम्म कैद सजाय हुने प्रावधान छ । त्यसैगरी, नापतौलमा लापरबाही भएको पाइएमा ३० हजार जरिमाना र ३ वर्ष कैद सजाय हुने प्रावधान छ ।

नगरपालिकाका २३ सय घरधुरीलाई राहत वितरण गर्न परासीस्थित राजेश राइस मिलबाट नगरपालिकाले २ सय ५० क्विन्टल सोना मनसुली (मोटा) चामल १० लाखमा खरिद गरेको थियो । राहत चामल न्यून गुणस्तर भएको प्रमाणित भएपछि नगरपालिकाले नयाँ खरिद प्रक्रिया अघि बढाएर मसिनो स्टिम चामल वितरण गर्ने नगर प्रमुख नरेन्द्रकुमारले जानकारी दिए ।

प्रकाशित मिति: सोमबार, वैशाख ८, २०७७ २१:४०