भारतसँग सीमा जोडिएका प्रदेश ५ का ६ जिल्ला पूर्ण सिल

A+ A A-

कोरोना भाइरस (कोभिड- १९) संक्रमण फैलिन नदिन भारतसँग सीमा जोडिएका प्रदेश ५ का ६ वटा जिल्लालाई पूर्ण रूपमा सिल गरिएको छ । मानिसको आवतजावत रोक्ने भारतसँग सीमा जोडिएका जिल्लाहरूलाई पूर्ण रूपमा सिल गरिएको हो ।

त्यसका लागि सीमा क्षेत्रमा उच्च सतर्कता बढाइएको छ । प्रदेश ५ का सीमावर्ती जिल्ला पश्चिम नवलपरासी, रूपन्देही, कपिलवस्तु, दाङ, बाँके र बर्दिया जिल्लाका सीमा क्षेत्रलाई पूर्ण रूपमा सिल गरिएको हो ।

सीमा क्षेत्रका विभिन्न स्थानमा अस्थायी त्रिपाल राखी सशस्त्र प्रहरीको अस्थायी सुरक्षा पोस्ट खडा गरिएको छ । सीमा क्षेत्रमाको सीमा सुरक्षा प्रबन्ध, स्थायी तथा अस्थायी सुरक्षा पोस्ट र सीमा अवस्था अवलोकनका लागि प्रदेश ५ सशस्त्र प्रहरी बलका प्रमुख डीआईजी नारायण दत्त नेतृत्वको टोलीले प्रमुख जिल्ला अधिकारी दीर्घनारायण पौडेलसहित कपिलवस्तुको सीमा क्षेत्र निरीक्षण गरेको छ ।

सीमा क्षेत्रको हरेक ५ सय मिटरको दूरीमा २४ घण्टे सुरक्षाकर्मी खटाइएको छ । सीमा क्षेत्रमा अपनाइएको उच्च सतर्कताका कारण नेपालबाट भारत जाने र भारतबाट नेपाल आउने अवस्था पूर्ण रूपमा रोकिएको कपिलवस्तु जिल्लाका प्रमुख जिल्ला अधिकारी दीर्घनारायण पौडेलले बताए ।

सामान्य अवस्थामा प्रदेश ५ का तराईका ६ जिल्लामा ६ वटा गण ३ वटा भन्सार सुरक्षा गुल्म र २८ वटा बीओपी रहँदै आए पनि सीमा क्षेत्रमा हाल २ सय ५० बढी स्थानमा सुरक्षाकर्मीको पोस्ट खडा गरिएको छ । सशस्त्र प्रहरीको प्रदेश ५ को विन्ध्यवासिनी बाहिनी र थप अन्य बाहिनीबाट समेत सशस्त्र प्रहरी ल्याई सीमा क्षेत्रलाई पूर्ण रूपमा सिल गरिएको सशस्त्र प्रहरी बल प्रदेश ५ का प्रमुख डीआईजी नारायणदत्त पौडेलले बताए ।

सीमा क्षेत्रमा भारततर्फका गोरखपुर र लख्खीपुरस्थित भारतीय सीमा सुरक्षाका डीआईजी तहका सुरक्षा अधिकारीसँग पनि नियमित संवाद र समन्वयबाट प्रदेश ५ का नेपाल-भारत सीमामा दुवै देशका सुरक्षाकर्मीबाटै संयुक्त निगरानीसमेत बढाइएको छ ।

सीमामा गरिएको यस्तो सुरक्षा प्रबन्धबाट भारतका विभिन्न शहरबाट नेपाल फर्कने सर्वसाधारणको घुसपैठ रोकिँदा कोरोना भाइरसको संक्रमण फैलन सक्ने उच्च जोखिमबाट भने प्रदेश ५ लाई बचाउने दाबी गरिएको छ ।

प्रकाशित मिति: सोमबार, वैशाख ८, २०७७ १८:२४