पश्चिमाञ्चल अस्पतालमा स्यानिटाइजर टनेल, ५ सेकेन्डमा होलबडी स्प्रे

A+ A A-

विश्वव्यापी महामारीको रूपमा फैलिएको कोरोना भाइरसको संक्रमण रोक्नका लागि पोखरा महानगरपालिकाले पोखराका विभिन्न ठाउँमा स्वचालित स्यानिटाइजर टनेल सञ्चालनमा ल्याएको छ ।

महानगरले यसै क्रममा पोखरा स्वास्थ्य विज्ञान प्रतिष्ठानअन्तर्गतको पश्चिमाञ्चल क्षेत्रीय अस्पतालको पूर्वपट्टिको गेटमा स्वचालित स्यानिटाइजर टनेल जडान गरिएको हो ।

प्रोग्रेसिभ इन्जिनियर्स एसोसिएसन गण्डकीले उक्त स्यानिटाइजर टनेल निर्माण गरेको हो । उक्त टनेलको प्रतिनिधिसभा सदस्य तथा पूर्वस्वास्थ्यमन्त्री खगराज अधिकारीले सोमबार शुभारम्भ गरेर पोखरा स्वास्थ्य विज्ञान प्रतिष्ठानका उपकुलपति डाक्टर बुद्धिबहादुर थापालाई हस्तान्तरण गरेका हुन् ।

कार्यक्रममा बोल्दै सांसद अधिकारीले प्रोग्रेसिभ इन्जिनियर्स एसोसिएसनले गरेको साे कार्य प्रशंसनीय रहेको बताए । उनले इन्जिनियरहरूले नयाँ खोज र अनुसन्धना गर्नुपर्ने बताउँदै कोरोना रोकथाममा प्रविधिको प्रयोगलाई जोड दिन आग्रह गरे ।

पोखरा स्वास्थ्य विज्ञान प्रतिष्ठानका उपकुलपति डाक्टर बुद्धिबहादुर थापाले स्यानिटाइजर टनेलले अस्पतालमा कोरोनाको संक्रमण फैलिन नदिन सहयोग पुर्‍याउने बताउँदै यसको संरक्षणमा प्रतिष्ठानले ध्यान दिने बताए ।

प्रोग्रेसिभ इन्जिनियर्स एसोसिएसन गण्डकीका कार्यवाहक अध्यक्ष इन्जिनियर महेन्द्रबहादुर गोदारले टनेलले होलबडीलाई स्यानिटाइज गरी मानिसको कपडामा भएको भाइरसलाई मार्ने बताए । अस्पतालमा भीडभाड हुने भएकाले एसोसिएसनले टनेल निर्माण गरी अस्पतालमा जडान गरिएको बताए ।

५ सेकेन्डमा होलबडीलाई स्यानिटाइज गरिसक्ने स्वचालित स्यानिटाइजर टनेल १ लाख ५० हजारमा तयार गरिएको हो । एसोसिएसनका इन्जिनियरले प्राविधिक शिक्षाको उपयोग गरी टनेल निर्माण गरेको एसोसिएसनका सचिव इन्जिनियर सुरेश तिमिल्सेनाले बताए ।

सामाजिक दूरी कायम गर्दै आयाेजना गरिएकाे कार्यक्रममा प्रदेश सांसद कृष्ण थापा, मनबहादुर गुरुङ, पोखरा महानगरपालिकाका प्रमुख मानबहादुर जीसी, नेपाल कम्युनिस्ट पार्टीका केन्द्रीय सदस्य राजकाजी गुरुङलगायतको उपस्थिति थियो ।

प्रकाशित मिति: सोमबार, वैशाख ८, २०७७ १३:००