हप्तौँ पछि इटाली र फ्रान्समा देखियो आशाको सङ्केत

A+ A A-

कोरोना भाइरसबाट अत्यधिक प्रभावित इटाली र फ्रान्समा हप्तौँ पछि मृत्यु हुनेको संख्यामा कमी आएको छ ।

फ्रान्समा कोरोना भाइरसका कारण मृत्यु भएका ३ सय ९५ नयाँ घटना दर्ता भएका छन्, जसमध्ये २ सय २७ जना अस्पतालमा र १ सय ६८ जनाको मृत्यु नर्सिङ होममा भएको हो ।

यसका साथै फ्रान्समा मृत्यु हुनेको संख्या १९ हजार ७ सय १८ भएको छ । फ्रान्समा कोरोना संक्रमणका कारण अस्पताल भर्ना हुनेको संख्यामा पनि कमी आउन थालेको छ ।

यतिबेला फ्रान्समा करिब ३० हजार संक्रमितको उपचार भइरहेको छ । आइतबार फ्रान्समा २९ जना मात्र कोरोना भाइरसका बिरामी अस्पताल भर्ना भएका बताइएको छ ।

फ्रान्समा पछिल्लो ५ दिनदेखि अस्पताल भर्ना हुनेको संख्यामा कमी आइरहेको छ ।

फ्रान्सका प्रधानमन्त्री एडवार्ड फिलिपले भने, ‘हामी यो महामारीविरुद्ध जीतको दिशामा अघि बढेका छौँ । विस्तारै विस्तारै सुधार भइरहेको छ । हामी अझै स्वास्थ्य सङ्कटको अवस्थाबाट बाहिर आएका छैनौँ ।’

इटालीमा १ सातामा सबैभन्दा कम मृत्यु

इटालीमा आइतबार कोरोना भाइरस संक्रमणका कारण ४ सय ३३ जनाको मृत्यु भएको पुष्टि भएको छ । यो पछिल्लो १ सातामा सबैभन्दा कम मृत्यु हो ।

इटालीमा हालसम्म २३ हजार ६ सय ६० जनाको मृत्यु भइसकेको छ । मृत्युको संख्यामा इटाली अमेरिकापछि दोस्रो नम्बरमा छ । अमेरिकामा संक्रमणका कारण ४० हजार ५ सय ५५ जनाको मृत्यु भएको पुष्टि भएको छ ।