अमेरिकामा छोरी दीक्षालाई पत्र

A+ A A-

मैले मान्छे गुमाएँ भने
मैले संसार पाउनुको कुनै अर्थ छैन
मैले तिमीलाई गुमाएँ भने
मैले आफैँलाई पाउनुको कुनै अर्थ छैन
कोरोनाले जितेर संसार हार्‍यो भने
मैले संसार जिते पनि त्यसको कुनै अर्थ छैन
तिमीले दिने आवाज मैले सुन्न पाइनँ भने
मेरो किताबको कुनै शब्द मलाई काम छैन
म मेरो ढोका बन्द गर्न स्वीकार गर्छु
तर, कोरोनाले तिमीलाई छोयो भने
तिम्रो काल स्वीकार गर्न असमर्थ छु ।

मेरो
अस्त्रको युद्ध हेरेर थाकेको म
कोरोनाको युद्ध हेर्दै छु
मभित्र मौनता थियो
अँध्यारो थियो
मभित्र केके छ अब हेर्दै छु
बस्दै छु भित्र
भित्रै छ तिम्रो प्रकाश
भित्रै छ तिम्रो सूर्य
भित्रै छ तिम्रो शब्द
भित्रै छ तिम्रो नामको आवाज
भित्रै छ तिम्रो भगवान्
अब तिमीभित्र केके छ हेर्दै छु ।

विश्व अर्को युद्धमा छ
जिन्दगी कसले कहाँबाट जित्ने
म पनि खोज्दै छु जित्न
त्यो जेको भए पनि महायुद्ध
मानिस प्रार्थनामा छ
अभयको
मेरो प्रार्थनाको समय
म दुइटा आँखाले जे देखिरहेछु
हेर्न सकिरहेको छैन
रामकृष्णले प्रकाश दिए विवेकानन्दलाई
बुद्धले प्रकाश दिए आनन्दलाई
रामले हनुमानलाई
तिमीले दिएको प्रकाश मैले गुमाएँ भने
मेरो आकाशमा सूर्य उदाए पनि त्यसको अर्थ छैन ।

कृष्ण हेर्दै छु भित्र, क्राइस्ट हेर्दै छु
बुद्ध हेर्दै छु, मोहम्मद हेर्दै छु भित्र
यज्ञ तिम्रो प्रेमको यज्ञमा छ
हेर्दै छु भित्र
म तिम्रो आँखाको खोजी गरिरहेको यो बेला
अब संसार हेर्न
भित्र मलाई हेर्न आँखा खोल ।

कृष्ण हारेको प्रमाण छैन
क्राइस्ट हारेको प्रमाण छैन
काली हारेको प्रमाण छैन
तिमी आफूभित्र छँदाछँदै विश्व कहीँ जाँदैन
प्रेमको हवन छाडेको छैन यज्ञले
मैले तिम्रो नाम दीक्षा दिएँ
म तिमीसित मन्त्र माग्दै छु
संसारभरि कोरोना छ
तिमी अर्की काली भएर लडेको
संसार प्रतीक्षामा छ हेर्न ।

तिमी जीवित भएको म प्रमाण खोज्दै छु
हतियारविरुद्धको युद्ध मैले छाडेको छैन
कोरोनाविरुद्धको युद्ध तिमी नछाड
अब भित्रैबाट हेर संसार
म भित्रैबाट हेर्दै छु ।

प्रकाशित मिति: शनिबार, वैशाख ६, २०७७ ०९:३८