सपनाको विवरण

A+ A A-

कति सजिलै पुगेँ विदेशमा सुतेर
सपनाको पुलबाट-
आफ्नै घरदेशको दैलो खोल्न ।

बाआमाले-
शरीर ओछ्याएर बनाएको घरभित्र पस्न
नचाहिँदोरहेछ
बोर्डिङपास, भिसा, राहदानी र टिकेट पनि ।

उड्दै गरेका हलेसाहरूको देउडा सुन्दै-
हलोमा अनौ ठोकिरहेका माइला बा
सुनाउँदै थिए गाउँलेहरूलाई-
कौरव र पाण्डवको वंश वर्णन
सत्ता खिचातानीमा फसेको हस्तिनापुरको कथा
माइला बाको कथा जब पुग्यो-
भीमले दुशासन बध गरेर
छातीको रगत पिएको घटनामा
तब गाउँलेहरू भन्दै थिए-
धर्मले यसरी नै अधर्मलाई परास्त गर्छ ।

आजको मेरो सपना भङ्ग भयो साथी !
हिजोको सपना त मैले सुनाएकै छुइनँ ।

यति भनेपछि-
मसँगै काम गर्ने विदेशी मजदुर साथीले
सुन्न चाह्यो-
मैले हिजो देखेको सपनाको इतिवृत्तान्त ।

कुरुक्षेत्रको विवरण बताउने सञ्जय बनेर
बताउन थालेँ म उसलाई मेरो सपना-
ओरालो झर्दै थिए चिमल डाँडाबाट- गाउँका आमाहरू
अघिअघि हिँडेका बाख्राहरू कोर्दै थिए गोरेटो- घरसम्म
बिहान पोल्टोबाट निस्केको- घाम
आइसकेको थियो लुक्न- पोल्टोमै ।

डोकोमाथि अर्को डोको खप्ट्याएर बोकेको
पत्करको पहाड बिसाएर धर्मशालामा
हेर्दै हुनुहुन्थ्यो आमा-
हवाईजहाज उड्दै गरेको आकाश
भन्दै हुनुहुन्थ्यो-
‘यो पिलेन फर्केर आउँदा ल्याए हुन्थ्यो नि छोरालाई ।’

हल गोरु नारेर बुबा हेर्दै हुनुहुन्थ्यो-
हलोले बनाएको सियोमा आफ्नै प्रतिबिम्ब
खोज्दै हुनुहुन्थ्यो-
निधारबाट हामफालेको पसिनामा
खुसीको ब्रह्माण्ड ।

जोत्दाजोत्दै थाकेपछि आलीमा टुसुक्क बसेर
पाते बिँडीको धुवाँ उडाइसकेपछि
खोक्दाखेरि थुकसँगै आएको रगत देखेर
झस्किनुहुन्थ्यो एक्कासि ।

ऊ छक्क परिरह्यो-
गाउँलेहरूका फुटेका कुर्कुच्चामा कोरिएको
गाउँको वर्णमाला अनि जीवनदर्शन सुनेर
पानी चुहिरहने छानोबाट
चुहिरहने गरिबीलाई पचाउन सक्ने
धर्मप्रिय मान्छेहरूको धीरता बुझेर ।

अनि उसले भन्यो-
निष्ठामा देश बोकेर जुन भूगोलमा सुते पनि
घरकै जमिन, घरकै आकाश
अनि आमाबुबाभन्दा पर जाँदैन सपना साथी !
धन्य तिमी !
विदेशको ओछ्यानमा
निद्रा नेपालको निदाउन पाइरहेका छौ ।

प्रकाशित मिति: शनिबार, वैशाख ६, २०७७ ०९:२४