समस्यामा परेकालाई पोखरा महानगरले खाना खुवाउने

A+ A A-

पोखरा महानगरपालिकाले लकडाउनका कारण खाद्यान्नको अभावले समस्यामा परेका व्यक्तिलाई खाना खुवाउने भएको छ ।

महानगरले कोरोना भाइरसको संक्रमणका कारण रोजगारी गुमाएका अति विपन्न, दैनिक ज्यालामजदुरी गर्ने वर्ग र जोखिममा रहेका व्यक्तिलाई निःशुल्क खाना खुवाउने भएको हो ।

महानगरले बनाएको लाभग्राही छनोट मापदण्डअनुसार राहत पाउनबाट वञ्चित भएका तथा समस्यामा परेकालाई आवश्यकताका आधारमा वडा कार्यालयको समन्वयमा खाना खुवाउने व्यवस्था गरिएको पोखरा महानगरपालिकाका प्रमुख मानबहादुर जिसीले जानकारी दिए ।

प्रमुख जिसीले शुक्रबार जारी गरेको विज्ञप्तिमा महानगरले पूर्ण र आशिंक प्याकेज गरी १९ हजार २ सय २० घर परिवारलाई राहत वितरण गरिसक्दा पनि राहत नपाएको गुनासो आएपछि घरघर र बसेकै ठाउँमा पुगेर राहत वितरण गरिएको जानकारी गराएका छन् ।

‘लकडाउनका कारण खाद्यान्न अभाव भएर चुल्हो बल्ने अवस्था नभएका अति विपन्न, दैनिक ज्याला मजदुरी गर्ने वर्ग र जोखिममा रहेका व्यक्तिहरुलाई आवश्यकताका आधारमा वडा कार्यालयको समन्वयमा खाना खुवाउने व्यवस्था गरिएको छ,’ विज्ञप्तिमा भनिएको छ, ‘खाद्यान्न नभएर समस्यामा परेकाहरूलाई पायक पर्ने ठाउँमा पुगेर खाना खान अनुरोध छ ।’

लकडाउन उलंघन नहुने गरी भौतिक दूरी कायम गरी खाना खान सेवाग्राहीलाई अनुरोध गर्दै सोही अनुसार व्यवस्था मिलाउन वडा कार्यालयलाई विज्ञप्तिमा अनुरोध गरिएको छ ।

‘सामान्य दाल, भात र सम्भव भएसम्म तरकारीको व्यवस्था गर्छौं’, मेयर जिसीले भनेका छन्, ‘पोखरा महानगर भित्र बस्ने कोही मान्छे पनि भोकै बस्नु नपरोस् भन्ने हाम्रो चाहना हो, साँझ र बिहान पेट भर्ने व्यवस्था महानगरले गर्छ । यस्तो संकटको बेलामा मीठो नमीठो भन्ने कुरा हुँदैन ।’

महानगरले कसैले राहत वा खाना खान नपाए पैसा नलाग्ने हटलाइन नम्बर ११८१ मा सम्पर्क गर्न अनुरोधसमेत गरेको छ ।

‘विषम पस्थितिमा राहत वितरणलाई व्यवस्थित र एकद्वार प्रणाली मार्फत गर्ने व्यवस्था महानगरपालिकाले मिलाएकाले विभिन्न संघसंस्था तथा व्यक्तिलाई आफूखुसी राहत वितरण नगर्न अनुरोध गर्दछौँ,’ विज्ञप्तिमा भनिएको छ ।

किसानले उत्पादन गरेको तरकारीलगायत खाद्यान्न बिक्री नभएको भए महानगरको कृषि महाशाखामार्फत बिक्रीको व्यवस्था पनि मिलाइएको महानगरले जनाएको छ ।

प्रकाशित मिति: शनिबार, वैशाख ६, २०७७ ०८:०१