विद्यालयले लिएको परीक्षालाई नै एसईईको मान्यता दिऔँ, कक्षा १ देखि ९ सम्मको नतिजा लकडाउन खुलेपछि

विद्यालयले लिएको परीक्षालाई नै एसईईको मान्यता दिऔँ, कक्षा १ देखि ९ सम्मको नतिजा लकडाउन खुलेपछि

A+ A A-

कक्षा १ देखि ९ सम्म झन्डै ६० लाख विद्यार्थी छन् । ती विद्यार्थी वार्षिक परीक्षा सकेर बसेका छन् । कोरोना भाइसको प्रकोपसँगै सरकारले देश लकडाउन गरेपछि विद्यार्थी घरमै छन् ।

माथिल्लो कक्षामा जान पास वा फेल के भएँ ? भन्ने विद्यार्थीले थाहा पाउन सकेका छैनन् । आफ्नो बच्चाले कस्तो पढिरहेको छ ? कुन विद्यार्थी कस्तो छ ? अभिभावक र शिक्षकले मूल्यांकन गर्ने पनि यही परीक्षाबाटै हो ।

तर, लकडाउनका कारण सुगम क्षेत्रका विद्यालय र शिक्षकले विद्यार्थीको उत्तरपुस्तिका परीक्षण गरे पनि दुर्गम क्षेत्रका विद्यार्थीको उत्तरपुस्तिका परीक्षण नै भएको छैन ।

कक्षा १ देखि ९ सम्मका विद्यार्थी नजिताको प्रतीक्षामा छन् भने कक्षा १०, ११ र १२ का विद्यार्थी परीक्षा कहिले हुने हो, अन्योल कायमै छ ।

लकडाउन लामो समय लम्बिए के नतिजा नै सार्वजनिक नगर्ने त ? नयाँ शैक्षिकसत्र कहिलेदेखि सुरु गर्ने ? शिक्षकहरू के गर्दै छन् ? प्रविधिको माध्यमबाट नतिजा र शैक्षिकसत्र सञ्चालन गर्न सकिन्छ कि सकिँदैन ? यिनै विषयमा हामीले नेपाल शिक्षक महासंघका अध्यक्ष बाबुराम थापासँग कुरा गरेका छौँ ।

उहाँसँग गरेको कुराकानीको अंश

तत्काल १०, ११ र १२ को परीक्षा गर्न सकिँदैन

तयारी पूरा गरेर बसेको कक्षा १० का ४ लाख विद्यार्थीको परीक्षा अन्तिम समयमा रोकियो । ती विद्यार्थी अन्योलमा छन् । कक्षा ११ र १२ को परीक्षा पनि रोकियो । अहिले परीक्षा हुने अवस्था छैन । कोरोना भाइरसका कारण विश्व नै आतंकित छ । यस्तो बेला कसरी परीक्षा गर्ने ?

एसईई विद्यार्थीलाई ७ वटै प्रदेशमा हेल्प डेस्क

एसईई दिने विद्यार्थीलाई विशेष ध्यानमा राखेर ७ वटै प्रदेशमा हेल्प डेस्क खोलेका छौँ । ३५ जना शिक्षकको नम्बर उपलब्ध गराएका छौँ । त्यसबाट विद्यार्थीले तयारी पनि गरिरहेका छन् । कतिपय शिक्षकले अनलाइन कक्षाबाट पनि सिकाइरहेका छन् । अहिले परीक्षा कसरी लिनेभन्दा पनि परीक्षार्थीलाई घरमै राखेर कसरी सिकाउने भन्ने मुख्य समस्या हो ।

विद्यालयले लिएको परीक्षालाई मान्यता दिऔँ

कक्षा १० र १२ को विद्यार्थीका लागि केही विकल्प पनि छन् । अध्यादेशमार्फत शिक्षा ऐन २०२८ को आठाैँ संशोधन ४ ट ले जे प्रबन्ध गरेको छ, त्यसलाई अध्यादेशबाट संशोधन गरेर विद्यालयले लिएको परीक्षालाई आधार बनाउन सकिन्छ ।

त्यो भएन भने वातावरण सामान्य भयो भने होम सेन्टरबाट अहिले तयार पारिएको प्रश्नबाट नै परीक्षा गर्न सकिन्छ ।

विद्यार्थीको नतिजा नरोकाैँ, प्रविधिबाट पढाऔँ

१ देखि ९ सम्मको रिजल्ट लकडाउनपछि

तत्काल कक्षा १ देखि ९ सम्मको नतिजा सार्वजनिक गर्न सकिँदैन । ५ चैतसम्म परीक्षा नै थियो । ११ बाट लकडाउन भयो । यो बीचमा विद्यार्थीको उत्तरपुस्तिका परीक्षण र नजिता प्रकाशनको तयारी हुन पाएन ।

शिक्षकले घरघरबाट उत्तरपुस्तिका परीक्षण गरिरहेका पनि छन् । त्यसैले लकडाउन खुल्नेबित्तिकै नतिजा सार्वजनिक गर्ने तयारी छ । अनुकूल भएका विद्यालयहरूमा नतिजा सार्वजनिक गर्न पनि सकिन्छ । तर, ३६ हजार विद्यालयमा सकिँदैन । हिमाल, पहाड र तराईका जिल्ला छन् । जहाँ परीक्षा सकेपछि टाढाटाढाका शिक्षक बिदामा घर जाने गरेका छन् । अब कसरी अहिले नजिता निकाल्न सकिन्छ ? सबै ठाउँमा सम्भव छैन । लकडाउन खुल्नेबित्तिकै नतिजा सार्वजनिक हुन्छ ।

डाटा सेन्टरबाट पढाऔँ

अब नयाँ शैक्षिकसत्र के गर्ने भन्ने हो । १५ वैशाखसम्म लकडाउन छ । औपचारिक कक्षा सञ्चालन गर्न सकिने अवस्था छैन । यसका लागि सरकारले डाटा सेन्टर बनाउनु आवश्यक छ ।

यदि डाटा सेन्टर विद्यालयलाई दिने हो भने भर्चुअल कक्षा सञ्चालन गर्न सकिन्छ । रेडियो, टेलिभिजन, अनलाइन फोन के बाट हुन सक्छ त्यसैबाट पढाउन सकिन्छ । त्यसका लागि सरकारले तत्काल डाटा सेन्टर खोल्नुपर्‍यो । कक्षा कोठामा मात्र पढाउनुपर्छ भन्ने होइन । अब समयअनुसार भर्चुअल कक्षाका लागि शिक्षक पनि अपग्रेड हुनुपर्छ ।

प्रकाशित मिति: शुक्रबार, वैशाख ५, २०७७ १७:४५