कोरोना संक्रमणः म्यान्मारमा २५ हजार कैदी मुक्त गरिने

A+ A A-

म्यान्मारका कारागारमा रहेका कैदीबन्दीमध्ये झण्डै १ तिहाइलाई मुक्त गर्न लागिएको म्यान्मारको राष्ट्रपति कार्यालयले शुक्रबार घोषणा गरेको छ ।

कोरोनाभाइरसको संक्रमणबाट कारागारमा स्वास्थ्य संकट उत्पन्न हुन सक्ने भन्दै सो निर्णय गरेको हो ।

म्यान्मारमा कारागारको क्षमताभन्दा ठूलो संख्यामा कैन्दीबन्दी थुनामा रहेका छन् । सामान्यतया अप्रिलको नयाँ वर्षका अवसरमा म्यान्मारमा ठूलो संख्यामा कैदीबन्दीको बाँकी कैद मिनाहा गरी रिहा गर्ने प्रचलन छ । तर, यसपटक कोरोना भाइरसका कारण अहिलेसम्मकै ठूलो संख्यालाई एकैपटक मुक्त गर्न लागिएको हो ।

जेलभित्र कोरोना संक्रमण फैलिन सक्ने भन्दै संयुक्तराज्य अमेरिका, युरोपका केही मुलुक, कोलम्बिया समेतका धेरै मुलुकले बन्दीहरूलाई रिहा गरिरहेका छन् ।

म्यान्मारको सरकारी विवरणमा हालसम्म कोभिड–१९ बाट ८५ जनामा कोराना संक्रमण देखिएको र ४ जनाको मृत्यु भएको उल्लेख छ । तर स्वास्थ्य परीक्षणको अवस्था नाजुक रहेकाले योभन्दा बढी संख्यामा मानिसहरू कोरोना भाइरसबाट संक्रमित रहेको विज्ञहरूको दाबी छ ।

कोरोना संक्रमण फैलिन नदिन हाल देशव्यापी लकडाउन जारी छ र ह्युमन राइट्स वाच (एचआरडब्लू) ले निकै भीड देखिने म्यान्मारका कारागारमा थुनिएका कैदीबन्दीलाई तत्काल रिहा गर्न आग्रह गरेको छ ।

म्यान्मारको राष्ट्रपति कार्यालयले जारी गरेको विज्ञप्तिमा नयाँ वर्षको अवसरमा राष्ट्रपतिले विभिन्न जेलमा रहेका २४ हजार ८ सय ९६ जनालाई रिहा गर्न आदेश दिइएको उल्लेख छ । विज्ञप्तिमा आममाफी पाएका ८७ जना विदेशी नागरिकलाई उनीहरूकै देश फिर्ता गरिने जनाइएको छ ।

म्यान्मारका जेलमा हाल झण्डै १ लाख कैदीबन्दी छन् । एचआरडब्लूका अनुसार म्यान्मारका जेलको क्षमता करिब ६२ हजार मात्र छ ।

प्रकाशित मिति: शुक्रबार, वैशाख ५, २०७७ १४:४५