रसुवागढी नाका तत्काल नखुल्ने, तातोपानी एकतर्फी मात्रै

A+ A A-

चीनतर्फका दुवै नाका तत्काल खुलाउने प्रयास असफल भएको छ । विश्‍वव्यापी रूपमा फैलिएको कोरोना भाइरसको फैलावट रोक्नका लागि नेपाल–भारत दुवै सरकारले लकडाउन नीति अवलम्बन गरेपछि चीनतर्फका दुवै नाका सञ्चालन गर्ने तयारी सरकारले गरेको थियो ।

भन्सार विभागका अनुसार तत्काल दुवै नाका खुलाउन समस्या पर्ने देखिएको छ । चीनले आफ्नो देशमा कोरोना भाइरसको जोखिम कम देखिएपछि नेपाललाई दुवै नाका खुलाउनका लागि अनौपचारिक प्रस्ताव पठाएको थियो ।

नेपालमा पनि केही व्यक्तिमा कोरोना देखिएपछि चीन नाका खुलाउन हिचकिचाइरहेको भन्सार विभागका अधिकारीहरूले बताए ।

‘चीनले आफ्नैतर्फबाट अनौपचारिक प्रस्ताव पठायो, हामीले छलफल गर्‍यौँ, अहिलेको समयमा नाका खुलाउन आवश्‍यक थियो र तयारी पनि गर्‍यौँ,’ भन्सार विभागका एक अधिकारीले भने, हामी अघि बढ्यौँ, चीन पछि सर्‍यो ।

अहिलेलाई रुसुवागढी नाका खुलाउने सन्दर्भमा चीन मौन रहे पनि तातोपानी नाका खुलाउन भने सहमत देखिएको भन्सार विभागका महानिर्देशक सुमन दाहालले बताए ।

दुवैतर्फका भन्सार अधिकारी बसेर नाका खुलाउने विषयमा छलफल भएको र तातोपानीबाट सहज रूपमा सामान आउने उनले बताए । २७ चैतमा नाका खुला गरिए पनि त्यस दिन केही सामान आयात भएका थिए । त्यसपछि पुनः सहज रूपमा नाका खुल्न सकेको छैन ।

गत माघ महिनामा चीनमा कोरोना देखिएसँगै तातोपानी नाका बन्द थियो । ४ महिनापछि तातोपानी नाका एकतर्फी रूपमा सञ्चालन हुने भए पनि रसुवागढी नाका भने अहिलेका लागि नखुल्ने भएको हो ।

नेपालमा पनि केही व्यक्तिमा कोरोना देखिएको र नेपालसँग जोडिएको अर्को छिमेकी देश भारतमा उच्च रूपमा कोरोनाको संक्रमण बढेको अवस्थामा चीनले नाकाहरूमा थप कडाइ गरेको भन्सार अधिकारीहरूले बताए ।

प्रकाशित मिति: शुक्रबार, वैशाख ५, २०७७ १३:२५