आरडीटीमा पोजेटिभ देखिएकी पोखराकी महिलामा देखिएन कोरोना संक्रमण

A+ A A-

आरडीटीमा शंकास्पद देखिएकी पोखराकी महिलाको कोरोना संक्रमण परीक्षणको नतिजा नेगेटिभ आएको छ ।

पोखरा महानगरपालिका–१२, ठिकालेथरकी ५५ वर्षीया महिलाको आरडीटी किटले परीक्षण गर्दा कोरोना पोजेटिभ देखिएको थियो ।

मंगलबार पोखरा महानगरपालिका–१० र १२ मा ३४ जनाको नमुना परीक्षणका क्रममा ती महिलामा कोरोना पोजेटिभ देखिएपछि पीसीआर प्रविधिबाट स्वाब परीक्षण थालिएको थियो ।

२७ दिनपहिले दुबईबाट पोखरा आएकी महिलाको स्वाब लिएर पीसीआर प्रविधिबाट परीक्षण गर्दा नतिजा नेगेटिभ देखिएको गण्डकी प्रदेश स्वास्थ्य निर्देशनालयले जनाएको छ ।

एक्लै घरमा बस्दे आएकी ती महिला दुबईमा छोरालाई भेटेर ८ चैतमा नेपाल फर्किएकी थिइन् ।

त्यस्तै, गण्डकी प्रदेशमा मंगलबार र्‍यापिड टेस्टका क्रममा ३ जनामा कोरोना एन्टीबडी पोजेटिभ देखिएको थियो । कास्की, बागलुङ र गोरखाका १/१ जनामा र्‍यापिड टेस्टमा पोजेटिभ देखिएपछि उनीहरूको पनि पीसीआर प्रविधिबाट परीक्षण गर्दा रिपोर्ट नेगेटिभ आएको निर्देशनालयले जनाएको छ ।

गण्डकी प्रदेशमा ३ हजार बढीको आरडीटी

गण्डकी प्रदेशका १० जिल्लामा विदेशबाट आएकाको आरडीटी तीव्र पारिएको छ । यो प्रदेशमा हालसम्म ३ हजार १०७ जनाको परीक्षण भएको छ ।

संघीय सरकारले पठाएको ५ हजार किटमार्फत गण्डकी प्रदेशका विभिन्न जिल्लामा कोरोनाको परीक्षण भइरहेको प्रदेश स्वास्थ्य निर्देशक डा. विनोद विन्दु शर्माले जानकारी दिए । गण्डकीका मनाङ बाहेक सबै जिल्लामा आरडीटीबाट कोरोना परीक्षण भइरहेको छ ।

चैतभित्र विदेशबाट आएकाहरू र उनीहरूको नजिकमा रहेकाहरूमा संक्रमण भए नभएको पत्ता लगाउन तीव्र परीक्षणका लागि किटको प्रयोग गरिएको हो ।

गण्डकी प्रदेशको बागलुङमा २ जनामा कोरोना संक्रमण देखिएपछि उपचार भइरहेको छ । उनीहरू दुवैको बागलुङस्थित धौलागिरी अञ्चल अस्पतालको आइसोलेसन वार्डमा उपचार जारी छ । अस्पतालका अनुसार उनीहरूको अवस्था सामान्य रहेको छ ।

प्रकाशित मिति: बिहीबार, वैशाख ४, २०७७ ११:४८