प्रदेश–५ मा आरडीटी रिपोर्टकै आधारमा क्वारेन्टाइनमा रहेका १२ सय बढी घर फिर्ता

प्रदेश–५ मा आरडीटी रिपोर्टकै आधारमा क्वारेन्टाइनमा रहेका १२ सय बढी घर फिर्ता

A+ A A-

प्रदेश–५ मा र्‍यापिड डायग्नोस्टिक टेस्ट (आरडीटी) रिपोर्टकै आधारमा १२ सय बढी क्वारेन्टाइनमा रहेकालाई घर पठाइएको छ ।

मंगलबारसम्म याे प्रदेशका १२ सय ७ जनाको आरडीटी किटको माध्यमबाट स्वाब परिक्षण गर्दा सबैको रिपोर्ट नेगेटिभ देखिएपछि उनीहरुलाई घर पठाइएको सामाजिक विकास मन्त्रालय, स्वास्थ्य निर्देशनालयका तथ्यांक अधिकृत मनबहादुर वलीले जानकारी दिए ।

आरडीटी किटबाट स्वाब परिक्षणको विश्वसनियतामा प्रश्न उठिरहेका बेला आरडीटी रिपोर्टकै भरमा धमाधम क्वारेन्टाइनमा बसेकालाई घर पठाइएको हो ।

‘उहाँहरुलाई १४ दिनसम्म क्वारेन्टाइनमा राखेपछि आरडीटी किटबाट स्वाब परिक्षण गर्दा नेगेटिभ आएपछि घर पठाएका हौँ’ तथ्यांक अधिकृत वलीले भने, ‘घरमा पुग्न साथ पनि होम क्वारेन्टाइनमा बस्न र शंकास्पद केही लक्षण देखिए पुनः जाँच गर्न भनेर पठाएका छौँ ।’

मंगलबार साँझसम्म प्रदेश–५ का १२ जिल्लामा अझै १ हजार ६ सय ४६ जना क्वारेन्टाइनमा रहेका छन् । प्रदेशमा आरडीटी किट र पीसीआर परिक्षणबाट अहिलेसम्म कसैको पनि रिपोर्ट पोजेटिभ आएको छैन ।

हालसम्म प्रदेश–५ मा २ सय १४ जनाको पीसीआर परिक्षण गरिएको छ । जसमध्ये २०१ को रिपोर्ट नेगेटिभ र १३ जनाको रिपोर्ट आउन बाँकी रहेको स्वास्थ्य निर्देशनालयका बरिष्ठ जनस्वास्थ्य प्रशासक रोशनलाल चौधरीले जानकारी दिए । अन्य प्रदेशको तुलनामा यहाँ पीसीआर परिक्षण भने दुत्र गतिमा अगाडि बढ्न सकेको छैन ।

चरणमा काठमाडौंमा पीसीआर परिक्षणका लागि स्वाब पठाइने गरिएकोमा २४ चैतदेखि भैरहवामा रहेको प्रदेश प्रयोगशालाबाट पीसीआर परिक्षण भइरहेको छ । सीमित जनशक्तिका कारण भैरहवामा पनि पीसीआर परिक्षण द्रुत हुन नसकेको बताइएको छ ।

प्रयोगशाला स्थापना भएको ८ दिनमा जम्मा ९० वटा स्वाब परिक्षणका लागि आएकोमा मंगलबारसम्म ८१ वटा स्वाब परिक्षण गरिएको र सबै रिपोर्ट नेगेटिभ देखिएको प्रदेश जनस्वास्थ्य प्रयोगशालाका निमित्त प्रमुख डा. राजेन्द्र गिरीले जानकारी दिए ।

जनशक्ति नहुँदा परिक्षण सुस्त

प्रदेश जनस्वास्थ्य प्रयोगशालामा १४ जनाको स्वीकृत दरबन्दी हो । प्रयोगशाला स्थापना भएको ८ दिन भइसक्दा पनि जनशक्ति व्यवस्थापन नहुँदा कोभिड–१९ को परिक्षण द्रुत गतिमा अगाडि बढ्न सकेको छैन ।

हाल प्रयोगशालामा ६ जना मात्र कर्मचारी रहेका छन् । त्यसमध्ये ४ जना मात्र प्राविधिक रहेको र उनीहरुले नै हाल स्वाब परिक्षण गरिरहेका छन् ।

अहिले प्रयोगशालाबाट दैनिक १०/१२ वटा मात्र स्वाब परिक्षण गर्ने गरिएको निमित्त प्रमुख डा. राजेन्द्र गिरीले बताए ।

‘कर्मचारी पुर्ण भएको अवस्थामा दैनिक १८ वटासम्म स्वाब परिक्षण गर्न सकिन्छ’ उनले भने, ‘भएका प्राविधिकले १२/१३ घण्टा काम गर्दा पनि औषतमा दैनिक ८/१० वटा मात्र स्वाब परिक्षण भएको छ ।

एउटा स्वाब परिक्षणका लागि कम्तिमा पनि १ घण्टा लाग्ने गर्छ । कतिपय स्वाब शंका लागेपछि दोस्रो पटक पुनः परिक्षण गर्नु परेकाले पनि न्यून संख्यामा स्वाब परिक्षण भएको उनले बताए ।

आवश्यक जनशक्तिका लागि प्रयोगशालाले मुख्यमन्त्री तथा मन्त्रिपरिषद्को कार्यालयलाई जानकारी गराएर ७ दिने सूचना पनि प्रकाशित भइसकेको बताइएको छ ।

कर्मचारी पूर्णरुपमा ब्यवस्थापन भएपछि २४ घण्टा नै प्रयोगशालामा स्वाब परिक्षणको व्यवस्था गर्ने र कर्मचारीलाई सिफ्टमा राखेर काम गराउने निमित्त प्रमुख डा. गिरीले बताए ।

२८ जना आइसोलेसनमा

प्रदेश–५ मा हालसम्म २८ जना आइसोलेसनमा रहेका छन् । प्रदेश सरकारले स्थापना गरेको कोरोना विशेष अस्पतालमा १६ र अन्य अस्पतालमा १२ जना गरी २८ जना आइसोलेसनमा रहेको स्वास्थ्य निर्देशनालयले जानकारी दिएको छ ।

यो प्रदेशमा ५२ वटा अस्पतालमा ५ सय ३९ बेड आइसोलेसनका लागि राखिएको छ । यहाँ कोरोना विशेष अस्पतालमा मात्र २ सय ३० बेड रहेका छन् ।

कोरोना संक्रमण पूर्व प्रदेश सरकारको तयारी

कोरोना संक्रमण रोकथाम तथा नियन्त्रणका लागि प्रदेश सरकारले विभिन्न काम गरिरहेको छ । कोरोनाको सूचना प्रभावका लागि मोबाइल एप, कोभिड–१९ नियन्त्रण तथा उपचार कोष स्थापना, कोरोना विशेष अस्पतालदेखि दैनिकरुपमा मुख्यमन्त्री शंकर पोखरेलले स्थानीय तहका जनप्रतिनिधिसँग निरन्तर सम्पर्क बढाएका छन् ।

भिडियो कन्फरेन्समार्फत् मुख्यमन्त्री पोखरेलले भारतसँग सीमा जोडिएका स्थानीय तहका प्रमुखसँग कुराकानी गरी लकडाउनको पूर्णपालना र सीमामा मानिसको आवजावत पूर्णरुपमा रोक्न आग्रह गरेको मुख्यमन्त्रीका प्रेस सल्लाहकार शेरबहादुर के.सीले जानकारी दिए ।

त्यस्तै, प्रदेश सरकारले कोभिड–१९ को परिक्षणका लागि दाङ र नेपालगञ्जमा प्रयोगशाला निर्माणको कामलाई अन्तिम चरणमा पुर्‍याएको छ ।

प्रयोगशालाका लागि उपकरण आइसकेको र जडानको काम पनि तिव्र पारिएको बताइएको छ । हालसम्म प्रदेश ५ को ‘कोभिड–१९ नियन्त्रण तथा उपचार कोष’ मा १३ करोड बढी रकम जम्मा भइसकेको छ ।

प्रकाशित मिति: बुधबार, वैशाख ३, २०७७ १०:५५