घर फर्कन चाहन्छन् विदेशमा रहेका ७७ प्रतिशत नेपाली

A+ A A-

विदेशमा रहेका अधिकांश नेपालीले स्वदेश फर्किने ईच्छा देखाएका छन् । गैरआवासीय नेपाली संघ (एनआरएनए) ले गत आइतबारदेखि सुरु गरेको २४ सै घन्टा हेल्पलाइनमा फोन गर्ने मध्येका ७७ प्रतिशतले नेपाल फर्किन चाहेको बताएका हुन् ।

संघमा प्राप्त भएका फोन कल गर्ने अधिकांसले मातृभूमि नेपाल फर्किन चाहेको र त्यसको लागि आवश्यक प्रबन्ध गरिदिन संघलाई आग्रहसमेत गरेका छन् ।

संघमा प्राप्त फोन कलका आधारमा सबैभन्दा धेरै समस्या मध्यपूर्वका गैरआवासीय नेपालीमा रहेको नेपाल फर्किन चाहेको गैरआवासीय नेपाली संघ (एनआरएनए)का महासचिव डा. हेमराज शर्माले बताए । ‘मध्यपूर्वमा रहेका अधिकांश नेपालीले नेपाल फर्किन चाहाना राखेका छन्’ उनले भने, ‘मध्यपूर्वमा धेरै नेपालीको जागिर छुटेको वा कम्पनीबाट राजीनामा दिएर नेपाल जानको लागि तयारी अवस्थामा रहेका छन् ।’

संघको हटलाइनमा प्राप्त सूचनाअनुसार ७७ प्रतिशत गैरआवासीय नेपालीले स्वदेश फर्किन चाहेका छन् भने ११ प्रतिशतले विदेश जानको लागि आवश्यक प्रकृया पूरा गरिदिन आग्रह गरेका छन् । अन्य समस्या हुनेमा १२ प्रतिशत गैरआवासीय नेपाली छन् ।

गैरआवासीय नेपालीका बारेमा नेपालमा रहेका अभिवाभक धेरै चिन्तित देखिएको र तीमध्ये धेरैले विदेशमा रहेको आफ्नो छोराछोरीलाई तत्काल नेपाल फर्काउन चाहेका महासचिव शर्माले बताए ।

‘सोमबार साँझसम्म संघलाई प्राप्त टेलिफोनमध्ये भारतको मुम्बई, हैदरावाद, नैनिताल, हरियाना, नयाँ दिल्लीमा नेपालीको ठूलो समूह खान बस्नसमेत नपाएर अलपत्र परेका छन्’ उनले भने, ‘युएई, भारत, मलेसिया, साउदी अरब, दक्षिण कोरिया, मोजाम्बिक, फिनल्यान्ड, अमेरिका, युकेलगायतका देशमा बसोवास गर्ने गैरआवासीय नेपालीले संघ समक्ष आ–आफ्ना समस्या राखेका छन् ।’

विदेशबाट छुट्टीमा नेपाल गएका धेरैको भिसा सकिएपछि तत्काल विदेश जाने व्यवस्था गरिदिनसमेत उनीहरूले गैरआवासीय नेपाली संघसमक्ष आग्रह गरेको संघले जनाएको छ ।