बागलुङबाट हेलिकोप्टरमार्फत् उद्धार गरी पोखरा ल्याएकी गर्भवतीको मृत्यु

A+ A A-

बागलुङबाट हेलिकोप्टर चाटर्ड गरी पोखरा ल्याइएकी गर्भवती महिलाको अस्पालल नपुर्‍याउँदै मृत्यु भएको छ । ढोरपाटन नगरपालिका–१ की ३३ वर्षीया भीमा भुषाल पाण्डेलाई प्रसव व्यथाले च्यापेपछि हेलिकोप्टरबाट पोखरा ल्याउँदै गर्दा बाटोमै मृत्यु भएको हो ।

प्रसव व्यथाले च्यापेपछि सोमबार बिहान प्राथमिक स्वास्थ्य केन्द्र बुर्तिबाङ लगिएकी पाण्डेलाई उपचारको लागि पोखरा पठाइएको थियो । पाठेघरभन्दा बाहिर गर्भ बसेर (इक्टोपिक प्रिजेन्सी) गर्भासय नली फुटेर अत्याधिक रक्तश्राव भएको भेटिएपछि बुर्तिबाङको प्राथमिक स्वास्थ्य केन्द्रले धौलागिरी अञ्चल अस्पताल बागलुङ रिफर गरेको थियो ।

अञ्चल अस्पताल बागलुङ पठाउने तयारी थाल्दै गर्दा पाण्डेको अधिक रक्तश्राव भएपछि बडिगाड गाउँपालिकाको पहलमा हेलिकोप्टरमार्फत पोखरा पठाएको हो ।

गण्डकी अस्पताल पोखराका निर्देशक डा. अर्जुन आचार्यले महिलाको अस्पताल नआउँदै मृत्यु भइसकेको बताए । मृतक भुषाललाई बडिगाड गाउँपालिकाको केन्द्र ग्वालीचौरबाट उद्धार गरी हेलिकोप्टरमार्फत पोखरा ल्याइएको थियो ।

डेढ महिनाकी गर्भवती रहेकी पाण्डेलाई जिल्ला प्रशासन कार्यालय बागलुङको समन्वयमा उद्धार गरिएको थियो । ‘दुर्गम क्षेत्रका ज्यान जोखिममा परेका गर्भवती तथा सुत्केरी महिलाका लागि हवाई उद्धारसम्बन्धी कार्यविधी २०७५’ अनुसार हेलिकोप्टरबाट निःशुल्क उद्धार गरिएको जिल्ला प्रशासन कार्यालय बागलुङका प्रशासन प्रमुख गौलोचन शैजुले बताए ।

कार्यविधिमा लगातार लामो प्रसव व्यथा लागेमा, बच्चा जन्मिन कठिनाई भएका, गर्भमानै बच्चाको मृत्यु भएमा, गर्भवस्थामा हात खुट्टा शरीर सुन्निएमा र अधिक रक्ताश्राव भएको अवस्थामा दुर्गम हिमाली र पहाडी ३४ जिल्लाका महिलालाई निःशुल्क हवाई उद्धार गरिने व्यवस्था रहेको छ ।

प्रकाशित मिति: सोमबार, वैशाख १, २०७७ १८:४२