म्यानमारमा १२ नेपाली महिला अलपत्र, उद्धारका लागि पहल नगरेको आफन्तको गुनासो

म्यानमारमा १२ नेपाली महिला अलपत्र, उद्धारका लागि पहल नगरेको आफन्तको गुनासो

फाइल तस्विर

A+ A A-

रोजगारीका लागि दुबई, कतार, ओमान पुर्‍याउने भन्दै मानव तस्करले अबैध बाटो हुँदै भारत हुँदै लगिएका १२ नेपाली महिला ओमानमा अलपत्र परेका छन् ।

गत मंसिरमा भारतको दिल्ली हुँदै लगिएका अलपत्र ती नेपाली महिलालाई म्यानमार प्रहरीले पक्राउ गरेर फागुनदेखि एक गैरसरकारी संस्थाको जिम्मामा राखेको छ

भारतीय नागरिक नेपाली एजेन्ट आकाश थापा नाम गरेका व्यक्तिले मोरङकी गोमा दुनुवार, स्मिता माझी, मुना गुरागाई, बाँकेकी कमला कडायत, तारा बिक, सर्लाहीकी दुर्गा थापा, पर्मिला सार्की, पर्वतकी हिरा पौडेल, माया क्षेत्री, झापाकी आशा मदी, सरस्वती मदी र कपिलवस्तुकी पुष्पा खातुनलाई दुबई, कतार र ओमानमा रोजागारी दिने भन्दै दिल्लीबाट म्यानमार लैजान खोज्दा बर्माको प्रहरीले उनीहरुलाई पक्राउ गरेको थियो ।

बर्मा प्रहरीले ती महिलालाई पक्राउ गरे पनि एजेन्ट भने भाग्न सफल भएका थिए । अहिले मणिपुरको एउटा आश्रयस्थलमा रहेकी बाँकेकी कमला कडायतले गत शनिबार आफूहरु दलालको फन्दामा परेर एउटा गैरसरकारी संस्थाको आश्रयमा बसेको बताइन् । ‘हामी एउटा गैरसरकारी संस्थाको आश्रयमा बसेका छौं ।’ उनले भनिन्, ‘हामीलाई शनिबार बाहेक अन्य दिनमा फोनसमेत गर्न दिइन्न ।’

कडायतले आफूहरुलाई भारतको बाटो हुँदै लगिएको र अहिले म्यानमार प्रहरीले पक्राउ गरेर गैरसरकारी संस्थाको जिम्मामा राखिएको बताइन् । ‘अहिले यहाँ हामी १२ जना नेपाली महिला रहेका छौं ।’ उनले भनिन्, ‘खान बस्नकोसमेत समस्या भइरहेको छ ।’

अलपत्र अवस्थामा रहेकी पर्वतकी हिरा पौडेलले आफूहरु दलालका कारणले ठगिएको र नेपालमा आउन चाहेको बताइन् ।

आफन्तको गुनासोः सरकारले हाम्रो कुरा सुनेन

म्यानमारमा अलपत्र परेका महिलाका आफन्तले आफूहरुले नेपाली दूतावास, माइती नेपाल र परराष्ट्र मन्त्रालयलाई जानकारी गरेको भएपनि कुनै सुनुवाई नभएको बताएका छन् ।

लामो समयदेखि भारतमा रहेको नेपाली राजदूतावास, परराष्ट्र मन्त्रालय, माइती नेपाल र अन्य सरोकारवाला निकायलाई जानकारी गराएको गराउँदा पनि कुनै सुनुवाई नभएको बिचल्लीमा परेका महिलाका एक आफन्तले बताए । ‘हामीले लामो समयदेखि सरोकारवाला सबै निकायलाई जानकारी गरायौँ ।’ उनले भने, ‘कुनै सुनुवाई नै भएको छैन् ।’

सरकारी निकायले ती महिलालाई उद्दार गरेर नेपालमा ल्याउनका लागि अदालतमा मुद्दा गर्नुपर्ने बताएको बाँकेकी कमला कडायतका श्रीमान् राजकुमार कडायतले बताए ।

‘हामीले उद्दारका लागि नेपाली दूतावास, परराष्ट्र मन्त्रालय लगायत अरु निकायलाई जानकारी गरायौँ ।’ उनले भने, ‘अदालतमा मुद्दा गरे मात्र उनीहरुको उद्दार हुने भनेका छन् । तर, हामीसँग पैसा छैन ।’

प्रकाशित मिति: सोमबार, वैशाख १, २०७७ १२:३६