‘लकडाउन’मा पनि रोकिएन भैरहवा विमानस्थलको काम

A+ A A-

कोरोना भाइरस (कोभिड–१९) नियन्त्रणका लागि घोषणा गरिएको ‘लकडाउन’का कारण अहिले सबै क्षेत्र प्रभावित छ । मानिसहरू घरभित्रै छन् । उद्योग, बजार, यातायात सबै बन्द छन् । विकास निर्माण पनि ठप्प छ ।

योजनाहरू सबै प्रभावित भएका छन् । तर, भैरहवामा निर्माणाधीन गौतमबुद्ध अन्तर्राष्ट्रिय विमानस्थल निर्माणको काम भने जारी छ । ‘लकडाउन’को समयमा सबै क्षेत्र प्रभावित हुँदा विमानस्थलको काम भने जारी रहेको हो ।

विमानस्थलमा काम गर्ने कामदारलाई भित्रै क्याम्प खडा गरी आवश्यक सुरक्षा प्रबन्धका साथ काम भइरहेको आयोजना प्रमुख प्रवेश अधिकारीले जानकारी दिए । ‘लकडाउन’ अघि स्टक रहेका सामाग्री प्रयोग गरेरै काम भइरहेको उनले बताए ।

आयोजनाभित्र कसैलाई प्रवेश गर्न दिइएको छैन् । चिनियाँ मजदुर र नेपाली मजदुरलाई छुट्टाछुट्टै क्याम्पस खडा गरेर राखिएको छ । २९ जना चिनियाँ र १ सय ३ जना नेपाली मजदुरले निर्माणको काम गरिरहेको आयोजना प्रमुख अधिकारीले बताए ।

विमानस्थलमा पुरानो धावनमार्ग लाइट जडान, टर्मिनल भवनको फिनिसिङ, सेन्ट्रल एसी जडान, टायल लगाउने र तारबारको काम भइरहेको बताइएको छ । सिभिल निर्माण र फिनिसिङको काम भइरहेको भए पनि निर्माणमा नदीजन्य पदार्थको अभाव भने हुन थालेको छ । धावनमार्गको केही लाइट र ब्यागेज ह्यान्डलिङ सिस्टमका उपकरण चीनमा रोकिएका छन् । जसका कारण आयोजना समयमा नै सम्पन्न नहुने संकेत देखिएको छ ।

हालसम्म विमानस्थल निर्माणको काम ९० प्रतिशत सम्पन्न भइसकेको छ । सन् २०१५ बाट निर्माण सुरू भएको विमानस्थल निर्माणको काम पटकपटक थपेर गत ३१ मार्चसम्म सम्पन्न गर्ने लक्ष्य लिइएको थियो ।

अझै १० प्रतिशत काम कोरोना भाइरसको सन्त्रास हटेर वातावरण सामान्य भएपछि पनि कम्तीमा ३ महिना लाग्ने देखिन्छ । आयोजना प्रमुख अधिकारीले पनि कोरोनाको अवस्था हेरेर म्याद थप हुने बताए ।
गत डिसेम्बरमा चीनको वुहान शहरबाट फैलिएको कोरानाका कारण घर गएका धेरै कामदार आउन पाएका छैनन् । स्थानीय तह र प्रशाससँग समन्वय गरेर आवश्यक नदीजन्य सामग्री ल्याउनका लागि पहल भइरहेको आयोजना प्रमुख अधिकारीको भनाइ छ ।

कुनै बेला सुस्त गतिमा भइरहेको विमानस्थल निर्माणको काम स्व. रवीन्द्र अधिकारी पर्यटन मन्त्रीमा नियुक्त भएपछि तीव्र गतिमा बढेको हो ।

६ अर्ब ८२ करोडको लगानीमा सम्पन्न हुन लागेको आईसीबी–१ स्तरको यो विमानस्थल आयोजनामा एडीबीको ४०.५ प्रतिशत ऋण तथा १८ प्रतिशत अनुदान, ओपेक फन्ड फर इन्टरनेसनल डेभलपमेन्ट्सको ३०.५ प्रतिशत ऋण र नेपाल नागरिक उड्डयन प्राधिकरणको ११ प्रतिशत लगानी छ । यस्तै, आईसीबी–२ अन्तर्गत विमानस्थलमा जडान हुने उपकरणका लागि पनि करिब ५० करोड लगानी छ ।

प्रकाशित मिति: आइतबार, चैत ३०, २०७६ १०:३६