भारतमा रहेका नेपालीको पुकार : भोकले मर्नै लाग्यौँ, सरकार बचाइदेऊ !

A+ A A-

रोजगारीको सिलसिलामा भारतका रहेका नेपाली भोकभोकै बस्न बाध्य भएका छन् । कोरोना भाइरस न्यूनीकरण तथा रोकथामका लागि लागू गरिएको लकडाउनका कारणले उपभोग्य सामग्री अभाव भएपछि उनीहरू भोकै बस्न बाध्य भएका हुन् ।

भारतमा रोजगारी गरेरै परिवारका लागि आवश्यक वस्तुको व्यवस्थापन गर्ने नेपाली अहिले कोरोना भाइरसका कारणले भोकभोकै बस्नुपर्ने अवस्था आएको बताएका छन् । भारतको उत्तराखण्ड राज्यको अल्मोडा जिल्लामा मजदुरी गर्ने ९० जना ४ दिनदेखि एउटा स्कुलमा बस्दै आएको र खाद्यान्न पनि सकिएकाे दैलेख गुराँस गाउँपालिका–७ का कर्ण थापाले बताए । ‘४ दिन भयो खाना पनि खाएका छैनौँ,’ उनले भने, ‘बाहिर निस्कन पनि दिएको छैन । राहतका लागि भारतमा पहल गर्दा कुनै ठाउँबाट खाद्यान्न पाएनौँ ।’

काम गरेर खाने गरेका उनीहरू लकडाउनका कारण काम बन्द हुँदा भोकै बस्न बाध्य भएको बैजनाथ गाउँपालिका–३, बाँकेका रामबहादुर थापाले बताए । ‘मजदुरी गरेर केही पैसा बाँचेको थियो । त्यो पनि सकियो,’ उनले भने, ‘हामी कर्णालीका गरेर ९० जना जति छौँ । हामी भोकले मर्न थाल्यौँ ।’

नेपाल सरकारले गर्ने जुनसुकै निर्णय मान्न आफूहरू तयार रहेको बताउँदै सरकारले उद्धार गरेर नेपालमा लैजान शिवालय गाउँपालिका–४, सल्यानका लालबहादुर रावतले माग गरे । ‘नेपाल सरकारले गर्ने जुनसुकै काम मान्न हामी तयार छौँ,’ उनले भने, ‘नेपालमा जाने वातावरण मिलाउन सरकारसँग आग्रह गर्छौं ।’

भारतमा आफूहरूलाई भोकै मर्न लागेको र खान बस्नको समस्या भएको ढुङ्गेश्वर गाउँपालिका–१, दैलेखका उदय खत्रीले बताए । ‘भारत सरकारसँग राहत माग्न ६ दिन जाँदा नि पाइएन,’ उनले भने, ‘हामीलाई सरकारले नेपाल झिकाउनुपर्‍यो, स्वदेश आउन चाहन्छौँ । कि हामीलाई भारतमा खानको व्यवस्थापन गरिदिनुपर्‍यो ।’

भारत र नेपाल सरकारले खाद्यान्नको व्यवस्था नगर्दा भोकले मर्न थालेको, अब बाँच्ने आस पनि मरिसकेको गुराँस गाउँपालिका–६, दैलेखका रमेश थापाले बताए । ‘कोरोनाभन्दा हामी यहाँ भोकले मर्न थाल्यौँ,’ उनले भने, ‘नेपाल सरकारले भारत सरकारलाई भनेमा केही हुन्छ कि ?’

भारत र नेपालमा आफ्ना कुरा सुन्ने कोही नभएको शेरबहादुर बिसीले बताए । नेपाल सरकारले भारतमा रहेका नेपालीको उद्धार गरेर बचाउन पर्ने अवस्था आएको लालबहादुर बुढाले बताए । ‘यहाँ त हामी मर्न लाग्यौँ सरकार,’ उनले भने, ‘हामीलाई बचाइदेऊ ।’

प्रकाशित मिति: शनिबार, चैत २९, २०७६ १५:५७