लकडाउन कहिलेसम्म ? कुन देशमा कति समय लकडाउन ?

A+ A A-

हिले कोरोनाको फैलावट कहिलेबाट रोकिन्छ वा नियन्त्रण कहिलेबाट होला भन्नेजस्तै देशहरूले लगाएको लकडाउन कहिलेबाट अन्त्य गरिन्छ भन्ने विषय पनि चासोको विषय भएको छ । लकडाउन कहिले सकिएला र काममा फर्कने भन्ने विषयमा धेरै नेपालीमा चासो बढेको देखिएको छ ।

कतिपय देशहरूले लकडाउन नलगाउने निर्णय गरिरहेको सन्दर्भमा विश्व स्वास्थ्य सङ्गठन (डब्लूएचओ)ले कोरोना भाइरसको संक्रमण रोक्नका लागि संसारभर लागू गरिएको लकडाउन चाँडै हटाउनु झनै खतरनाक हुन सक्ने चेतावनी दिएको छ ।

डब्लूएचओका महानिर्देशक टेड्रोस एडहानम गेहब्रेससले लकडाउन हटाउन हतार गरेमा संक्रमित हुने र मृत्यु हुनेको संख्यामा थप तीव्रता आउन सक्ने चेतावनी दिएका हुन् ।

लकडाउन कहिलेसम्म लगाउने भन्ने विषयमा कसैसँग वैज्ञानिक आधार छैन । नेपालमा पनि कहिलेसम्म लकडाउन लागू हुन्छ भन्ने निश्‍चितता छैन । ९ जना कोरोना संक्रमित देखिइसकेको नेपालमा ३ हप्ताका लागि लकडाउन लगाइसकेको छ । थप लगाउनुपर्ने सङ्केत सरकारले दिएको छ । विश्वका धेरै देशहरूले ३ हप्ताभन्दा बढीको लकडाउन अवधि पार गरिसकेका छन् ।

कहाँ कति लकडाउन ?

चीन

सबैभन्दा पहिले कोरोना संक्रमित चीनमा देखिएको थियो । सन् २०१९ डिसेम्बरमा कोरोना संक्रमित देखिएको चीनमा संक्रमति भेटिएको करिब १ महिनापछि १० जनवरी २०२० मा पूर्ण रूपले लकडाउनको घोषणा गर्‍यो । वुहान शहरलाई केन्द्रित गरि २० वटा शहरहरूमा लकडाउनको घोषणा गरेको थियो । चीनले २ महिना १६ दिन अर्थात ७६ दिनपछि लकडाउन अन्त्य भएको घोषणा गरेको छ ।

इटाली

हालसम्म कोरोनाको संक्रमणको कारणले सबैभन्दा बढी मृत्यु हुने राष्ट्र इटाली हो । इटालीले ढिलो गरी लकडाउन नीति अवलम्बन गरेको थियो । १० मार्चदेखि लागू हुने गरी लकडाउनक घोषणा गर्‍यो र लकडाउनको अवधि १३ अप्रिलसम्म राखिएकामा पुन: बढाएर ३ मेसम्म पुर्‍याएको छ । यस हिसाबले इटालीमा करिब ५३ दिन लकडाउन हुनेछ तर यो अन्तिम मिति भने होइन ।

स्पेन

स्पेनमा जनवरीको सुरुवातमै कोरोना भाइरसको संक्रमण देखिन थालेको थियो । स्पेनले १४ मार्चमा सम्पूर्णमा लकडाउनक घोषणा गरेकामा त्यसलाई लम्ब्याउँदै १२ अप्रिलसम्म पुर्‍याएको छ । १ महिना लकडाउन भइसकेको स्पेनमा फेरि थप्ने तयारी गरिएको छ ।

फ्रान्स

कोरोना संक्रमित फ्रान्समा २४ जनवरीमा संक्रमण देखिएको थियो । सुरुवातमा १४ मार्चमा सम्पूर्ण लकडाउनको घोषणा गरियो र यो अवधि हालसम्म १२ अप्रिलसम्म नै तोकिएकामा त्यहाँ पनि पुन: बढाउने तयारी गरिएको छ । त्यहाँ करिब १ महिना लकडाउन लागिसकेको छ ।

जर्मनी

२७ जनवरीमा जर्मनीमा कोरोना भाइरसका बिरामी फेला पारिएको थियो । २० मार्चबाट निरन्तर लकडाउन लगाइएको छ । यहाँ त सोसियल कर्फ्यूू नै भनिएको छ ।

नर्वे

नर्वेमा कोरोना संक्रमित फेब्रुअरी महिनामा देखिएको थियो । संक्रमित देखिएको २० दिनपछि अर्थात् १६ मार्चदेखि १५ अप्रिलसम्म लकडाउनको अवधि बढाइएको छ ।

बेल्जियम

४ फेब्रुअरीमा कोरोना भाइरसको लक्षण देखिएकामा १७ मार्चदेखि १९ अप्रिलसम्म लकडाउन बढाइएको छ । यो अवधि पार गर्दा यहाँ १ महिना २ दिनको लकडाउन अवधि हुनेछ ।

डेनमार्क

डेनमार्कले पनि लकडाउनको अवधि १८ मार्चदेखि लागू गरेकामा १३ अप्रिलसम्म बढाएको छ ।

आयरल्याण्ड

यहाँ १७ मार्च देखि १९ अप्रिलसम्म बनाइएको छ ।

बेलायत

२४ मार्चमा ३ हप्ते लकडाउनको घोषणा गरे पनि ३० मार्चमा आवश्‍यक परेमा ६ महिनासम्म लकडाउनको अवधि बढाउन सकिने बेलायतले जनाएको छ ।

भारत

भारतले २४ मार्चदेखि १४ अप्रिलसम्म सम्पूर्ण देशमा लकडाउनको घोषणा गरेको छ। भारतले थप बढाउने बताइसकेको छ ।

नेपाल

नेपालले २३ मार्चबाट लकडाउन लगाउन सुरु गरेकामा १५ अप्रिलसम्मको समय थप गरेको छ । कोरोनाको जोखिम रहेसम्म लकडाउनको अवधि निरन्तर थपिने सरकारका प्रवक्ता डा. युवराज खतिवडाले बताएका छन् ।

हालसम्म नेपाल कोरोना सरेको केस एउटा मात्र रहे पनि संक्रमित ९ जना पुगेका छन् । छिमेकी देश भारतमा उच्चदरमा बढेको अवस्थामा नेपाल थप सजग र सचेत हुन आवश्‍यक रहेको औँल्याइएको छ ।

लकडाउन हुँदा विश्‍वभरको आर्थिक क्षति अतुलनीय भए पनि रोगबाट जोगिनका लागि कडा कदम अघि सारिएको छ । लकडाउनकै कारण नेपाल सरकारले १ खर्ब रुपैयाँभन्दा बढीको क्षति व्यहोरिसकेको जनाइएको छ ।

प्रकाशित मिति: शनिबार, चैत २९, २०७६ १३:२०