विषम परिस्थितिमा राष्ट्रलाई अग्रपङ्क्तिमा रहेर सहयोग गर्‍याैँ भनेर गर्व गर्नुपर्छ

विषम परिस्थितिमा राष्ट्रलाई अग्रपङ्क्तिमा रहेर सहयोग गर्‍याैँ भनेर गर्व गर्नुपर्छ

A+ A A-

कोरोना भाइरस (कोभिड–१९) को संक्रमणका कारण विश्व नै अहिले त्रास छ । विश्वका कतिपय शक्तिशाली मुलुकसमेत लकडाउनकाे अवस्थामा छन् । हाम्रो छिमेकी देश भारत पनि केही दिनअघिबाट पूरै लकडाउन छ । भारतमा कोरोना संक्रमणका बिरामीहरूकाे संख्या बढ्दो क्रममा छ ।

कोरोनाको कहरबाट हाम्रो देश पनि अछुतो रहन सकेको छैन । ११ चैतबाट सुरू भएको लकडाउन ३ वैशाखसम्म जारी रहनेछ । आज लकडाउनको १७औँ दिन हो । हालसम्म नेपालमा कोरोना भाइरसले ठूलो क्षति नगरे पनि नेपाल उच्च जोखिममा रहेको विश्व स्वास्थ्य संगठन (डब्लूएचओ) ले यसअघि नै बताइसकेको छ । यसकै रोकथामका लागि सरकारले लकडाउन गरेको हो । लकडाउन पालना गराउने कार्यकाे अग्रपंक्तिमा नेपाल प्रहरी छ । यसरी २४सै घण्टा खटिइरहने प्रहरी कर्मचारीलाई प्रोत्साहन भत्ता दिनुको साटो उल्टै उनीहरूकाे तलबसमेत कटौती गरेर कोरोना भाइरस रोकथाम नियन्त्रण तथा उपचार कोषमा जम्मा गर्ने निर्णय गरिएकाे छ । यस निर्णयकाे चौतर्फी विरोध सुरू भएको छ ।

यसै सन्दर्भमा शिलापत्रकर्मी कृष्णसिंह लोथ्यालले प्रहरी प्रमुख प्रहरी महानिरीक्षक (आईजीपी) ठाकुरप्रसाद ज्ञवालीसँग लकडाउनकाे पालना, संक्रमणकालीन अवस्थामा ड्युटीमा रहने प्रहरी कर्मचारीकाे सुरक्षा व्यवस्थापन, डीआईजी बढुवा प्रक्रियालगायत विषयमा कुराकानी गरेका छन् । प्रस्तुत छ, साेही कुराकानीकाे संक्षिप्त सार:

लकडाउनको आज १७औँ दिन हाे । लकडाउनकाे पालना गराउने कार्यमा प्रहरीले कसरी काम गरिरहेको छ ?

नेपाल सरकारले ११ चैतबाट लकडाउन गरेको हो । त्यो दिनदेखि नै हामीले अन्तर्राष्ट्रिय खुल्ला सीमा अझ विशेष गरेर भारतसँग जोडिएका जिल्लाहरू, त्यसरी नै लकडाउनको बेला अत्यावश्यक पर्ने खाद्य वस्तुहरूको ढुवानीमा विशेष जोड दिइरहेका छाैँ । लकडाउन नेपालका लागि पहिलो हो ।

लकडाउनबारे सरकारले पनि विभिन्न माध्यमबाट प्रचारप्रसार गर्‍याे । हामीले पनि पहिलो चरणमा विभिन्न ठाउँमा माइकिङ गरेरै काेराेना भाइरस र लकडाउनबारे जनाचेतना जगायौँ । यति गरेर पनि लकडाउन उल्लंघन गर्नेलाई पहिलो पटकमा हामीले सम्झाएर घर पठायौँ । त्यति गर्दा पनि अटेर गरी लकडाउन उल्लंघन गरी सडकमा हुल बाँधेर, जमात भेला भई मास्क नलगाई हिँड्नेलाई केही समय ‘होल्ड’ गराउने काम गर्‍याैँ, होल्ड गर्दा पनि हामीले दूरी कायम गरेर राखेका थियौँ । यो क्रम अझै जारी छ ।

कोरोना भाइरसको जोखिम हुँदाहुँदै पनि यसरी लकडाउन उल्लंघन गर्ने मानिसको संख्या कस्तो पाउनुभयो ?

कोरोना भाइसरबारे प्रहरीले पनि विभिन्न ठाउँमा जनचेतना जगाउँदै आएको छ । यति हुँदाहुँदै पनि केही मानिसबाट उल्लंघनका घटना भएका छन् । हामीले धेरैलाई सम्झाई बुझाई गर्‍याैँ । यो प्रहरी र देशका लागि मात्र होइन, आफ्नो लागि पनि हो भन्ने महसुस गरायौँ । यति गरेर पनि ११ चैतदेखि हालसम्म ३५ हजार मानिसलाई होल्ड डाउन गराएर घर फर्काएका छौँ । त्यसबाहेक पास र अत्यावश्यक सामग्रीको ढुवानीबाहेक लकडाउन उल्लंघन गर्ने ३० हजार सवारी साधनलाई होल्ड डाउन गराएर सवारीधनीलाई बुझाइएको अवस्था छ । योबाहेक ७ हजार अझै होल्ड डाउनमै छन् ।

एकातिर प्रहरीको लकडाउन पालना गराउनुपर्ने जिम्मेवारी छ, अर्कोतिर आफैँलाई पनि काेराेनाकाे संक्रमण हुन सक्ने जोखिम छ । यस्तो बेलामा प्रहरी आफैँ कसरी खटिएका छन् ?

हामीले पहिला त हाम्रा सुरक्षाकर्मीलाई सुरक्षित राख्नैपर्छ । त्यसका लागि कोरोनाबारे सचेत हुनेदेखि दूरी कायम गर्ने, स्यानिटाइजर प्रयोग गर्ने, पञ्जा प्रयोग गर्ने काम गराएका छौँ । यसरी नै ब्यारेक, मेस, क्यान्टिन र कार्यालयमा ‘ओयल भेन्टिलेटेड’ गर्नेदेखि कोरोनाका आशंका लागेका बिरामीलाई सुरक्षित हिसाबले मात्र छुन निर्देशन गरेका छौँ ।

यतिले मात्र पर्याप्त होला र ?

होइन, अहिले नै हाम्रोमा त्यस्तो भयावह हुने तरिकाले संक्रमण फैलिइहालेको छैन । अहिलेसम्म हाम्रोमा जम्मा ९ जना मात्रै हो कोरोना पोजेभिटिभ देखिएको । तराई क्षेत्रबाहेक अन्य क्षेत्रमा यसकाे त्यति जोखिम छैन । त्यसरी ठूलो भीडभाडमा खटिने प्रहरीलाई पर्सनल प्रोटेक्टिभ इक्विपमेन्ट (पीपीई) प्रयोग गर्न भनेका छौँ । त्यो पनि स्वास्थ्यकर्मीले लगाउनेजस्ताे चाहिँ होइन । अरू बाँकी १ हजार पीपीई हामीसँग तयारी अवस्थामा छ । अर्को साताको सोमबारसम्ममा आवश्यक परेका क्षेत्रमा पठाउँछौँ ।

प्रदेश प्रहरीले कसरी व्यवस्थापन गरेको छ ?

प्रदेश प्रहरीलाई सम्बन्धित प्रदेश सरकारले पनि त्यस्ता सामग्री उपलब्ध गराएको छ । हामीले पनि यो १ हजारबाट आवश्यकताअनुसार प्रदेशलाई उपलब्ध गराउँछौँ । प्रहरी अस्पतालका लागि छुट्टै व्यवस्थापन गरेका छौँ ।

पीपीई नै सबै ठाउँमा उपलब्ध भएको देखिएन । अर्कोतिर प्रहरी सहायक निरीक्षक (असई) देखिका अधिकृतको तलब काट्ने निर्णय गर्नुभएछ । यसले त फिल्डमा खटिने प्रहरीको मनोबल कसरी बढ्ला त ?

नेपाल सरकारकाले सहयोगका लागि आह्वन गरेको हो । हामी राष्ट्रसेवक कर्मचारी हौँ । यसअघि पनि भूकम्पका बेला, बाढी पहिरोका बेला, महारामीका बेला अरू राष्ट्रसेवक कर्मचारीले जस्तै नेपाल प्रहरीले पनि सहयोग गरेको अवस्था हो । अहिले कार्यालय सहयोगी, प्रहरी जवान, प्रहरी हवल्दारबाहेकका प्रहरी अधिकृतको क्षमताअनुसार हामीले दिने भनेका हौँ ।

विरोध त चौतर्फी छ नि ?

विरोध गर्नुपर्ने कारण नै छैन । हामीले मात्रै गरेको होइन । हाम्रो मात्र अलिकति यसरी आएको हो । नेपाल सरकारका सबै कर्मचारीले यसरी नै देशलाई सहयोग गरेका छन् । हामीले त अझ गर्व गर्नुपर्छ, यसरी देशकाे विषम परिस्थितिमा खटिएकाे बेला पनि राष्ट्रलाई आवश्यक परेकाे बेला अग्रपङ्क्तिमा रहेर देशलाई सहयोग गर्‍याैँ भनेर । त्यो पनि सबै प्रहरी कर्मचारीको होइन । जुनियर अधिकृतको ३ दिनको तलब र सिनियरको ५ देखि ७ दिनको न हो ।

अब लकडाउनको कुरा भन्दा थोरै अन्य कुरामा प्रवेश गरौँ ?

हुन्छ ।

प्रहरी नायव महानिरीक्षक (डीआईजी) को बढुवा प्रक्रिया लामो समयदेखि अल्झियो नि ?

यसबारेमा म धेरै बोल्दिनँ । किनभने तपाईंहरूले पनि देखेकै कुरा हो । हाम्रो पहिला रिक्त दरबन्दी २२ थियो । अहिले सरकारले त्यसलाई कटौती गरेर १० मा झारेकाे छ । ४ जना पहिला नै हुनुहुन्छ ।

यसरी अब १४ जना डीआईजी राख्ने सरकारले निर्णय गरेको छ । मैले सरकारको निर्णय कार्यान्वयन गराउने हो । गराउँछु ।

उसो भए कहिले हुन्छ १० जना डीआईजीको बढुवा ?

यो प्रक्रियामै छ । कहिले भनेर सबै मैले भन्ने कुरा होइन, प्रक्रियमा छ ।

प्रकाशित मिति: शुक्रबार, चैत २८, २०७६ १९:४०