लकडाउनको प्रभाव : पेट्रोलको कारोबार ठप्प, डिजेलको ६६ प्रतिशत घट्यो

A+ A A-

विश्‍व्यापी रूपमा फैलिएको कोरोना भाइरसको फैलावट कम गर्नका लागि सरकारले लिएको नीतिले व्यापारमा उल्लेख्य कमी आएको छ । नेपालले अन्तर्राष्ट्रिय बजारबाट सबैभन्दा बढी आयात गर्ने पेट्रिलियम पदार्थको कारोबार ८० प्रतिशतसम्म कमी आएको छ ।

मुख्य रूपमा डिजेल, पेट्रोल, ग्यास र हवाई इन्धनको कारोबार नेपाल आयल निगमले गर्छ । तर, लकडाउन सुरु भएपछि हवाई इन्धन र पेट्रोलको कारोबार ठप्प प्राय रहेको निगमले जनाएको छ । ‘डिजलको कारोबार केही हदरसम्म भएको छ । तर, पेट्रोल र हवाइ इन्धनको कारोबार नगण्य मात्रै देखिन्छ । अहिले कारोबार नै छैनभन्दा पनि हुन्छ’ निगमका कार्यकारी निर्देश सुरेन्द्र पौडेलले भने ।

निगमका अनुसार सामान्य अवस्थामा पेट्रोलको दैनिक २० लाख लिटर कारोबार हुने गरेकोमा अहिले केही हजार लिटर मात्रै कारोबार हुने गरेको छ । घटेको मूल्यको पेट्रोलको अहिले निगमले आफ्नो क्षमता अनुसारको भण्डारण गरिसकेको छ ।

निगमका अनुसार अहिले डिजेलकोको कारोबार औषत दिनको अवस्थामा ३३ प्रतिशतसम्म कारोबार भएको छ । सामान्य अवस्थामा प्रतिदिन ६० लाख लिटर डिजेलको कारोबार हुने गरेकोमा अहिले २० लाख लिटरसम्म हुने गरेको छ ।

पेट्रोलियम पदार्थ अत्यवश्‍यक खाद्यन्न बोक्ने साधन तथा केही अत्यावश्‍यक क्षेत्रका उद्योगहरू सञ्चालन गर्दा ३३ प्रतिशतसम्म डिजेल खपत भएको कार्यकारी निर्देशक पौडेलले बताए । सरकारले आवतजावत नगरी राष्ट्रि गौरवका आयोजना र अन्य आयोजनासमेत सञ्चालन गर्न सक्ने निर्णय लिएपछि डिजेलको माग केही बढेको निगमले जनाएको छ ।

निगमले सबै क्षेत्रमा आफ्नो डिपोहरू खुला नै राखेको जनाएको छ । हवाई इन्धनको कारोबार भने ठप्प नै रहेको निगमले जनाएको छ । ‘सुर्खेत माथितर्फ र केही विकट जिल्लामा खाद्यन्न ढुवानी गर्न केही उडान भयो होला । हैन भने आकाश पूर्णरूपमा बन्द छ । त्यसको प्रभाव हवाई इन्धनको खपत भएकै छैन’ पौडेलले भने ।

ग्यासको कारोबार अहिले पनि बढी

ग्यासको कारोबार भने सामान्य अवस्थाको तुलनामा बढी भएको निगमले जनाएको छ । बढी माग भएको समानुपातिक वितरण गर्न नसकेपछि निगमले करिब २ साता आधा सिलिण्डर ग्यास नीतिसमेत लिएको थियो ।

अहिले पनि सामान्य अवस्थाको तुलनामा धेरै भए पनि मागअनुसारको पूर्ति गर्न सकिने भएपछि भरी सिलिण्ड आइतबारबाट दिन थालिएको जनाइएको छ ।

‘केही समय समानुपातिक वितरणमा अलि समस्या देखियो’ पौडेलले भने ‘विकल्पको रूपमा हामीले आधा सिलिण्डर नीति ल्यायौँ । यसो हुँदा सबै सिलिण्डर बाहिर निस्किए अब समस्या नपर्ने भएपछि भरी सिलिण्डर वितरण गर्ने भनिएको हो ।’ ग्यास विक्रेता महासंघका वरिष्ठ उपाध्यक्ष चन्द्र थापाले अघिल्लो २ साता वितरणमा केही समस्या देखिए पनि अहिले नरहेको बताए ।

प्रकाशित मिति: शुक्रबार, चैत २८, २०७६ १४:४६