लकडाउनका क्रममा पोखरामा बजार अनुगमन तीव्र

A+ A A-

लकडाउनको समयमा व्यापारीले कृतिम अभाव र कालो बजारी गर्ने आशंकामा अनुगमन समितिले पोखरामा अनुगमन कार्यलाई तिव्रता दिएको छ ।

विश्वव्यापी रुपमा फैलिएको कोरोना भाईरसको संक्रमण रोक्नका लागि सरकारले घोषणा गरेको लकडाउनको समयमा बजारमा कृत्रिम अभाव र कालोबजारी हुन सक्ने भन्दै प्रदेश अनुगमन समितिले अनुगमनलाई तीव्र्र पारेको हो ।

अनुगमन समितिले पोखराका मुख्य बजार क्षेत्रसँगै कास्कीका विभिन्न स्थान र तनहुँका केही ठाउँहरुमा बजार अनुगमन गरेको छ । समितिले प्रदेशका विभिन्न जिल्लामा रहेका घरेलु कार्यालय मार्फत सबै जिल्लामा निरन्तर बजार अनुगमन गरिरहेको उद्योग वाणिज्य तथा उपभोक्ता हित संरक्षण निर्देशनालय गण्डकी प्रदेशका निर्देशक गोकुल शर्मा पौडेलले जानकारी दिए ।

लकडाउनअघिका अनुगमनमा खाद्य वस्तुसंगै बजारमा बिक्रीका लागि राखिएका वस्तुहरुको गुणस्तर र मूल्यलाई प्राथमिकता दिएर हेर्ने गरिएकोमा हाल खाद्य वस्तुको आपूर्तिलाई प्राथमिकता दिएर हेरिरहेको निर्देशक पौडेलले बताए ।

‘उपभोक्ताले दैनिक उपभोग्य वस्तु सहज तरिकाले पाउन भन्ने उद्देश्यले अनुगमनको कामलाई प्राथमिकतामा राखेर काम गरिरहेको छौं,’ उनले भने, ‘दैनिक उपभोग्य वस्तुको अभाबमा कसैले पनि भोकै बस्न नपरोस भन्ने प्रदेश सरकारको चाहना हो ।’

निर्देशक पौडेललले उपभोक्तालाई दैनिक उपभोग्य खाद्य वस्तुको सहज पहुँचसँगै कृषकहरुको उत्पादनलाई बजारसम्म ल्याउन सहज वातावरण निर्माण गर्नतर्फ निर्देशनालय लागिपरेको बताए । उनले गाई वस्तुको लागि आवश्यक चोकर, दाना लगायतका बस्तुको सहज आपूर्तिका लागि समेत काम गरिरहेको बताए ।

‘अत्यावश्यकीय सेवा अन्तर्गत पर्ने पसलहरुलाई मापदण्ड पूरा गरेर वस्तु बिक्री वितरण गर्न आग्रह गरेका छौं,’ उनले भने, ‘व्यवसायीहरुले यस विषम अवस्थामा समेत आवश्यक सेवा प्रदान गरिरहेका छन् ।’

बजार अनुगमनका क्रममा कुनै पनि वस्तुमा मूल्य वृद्धि गरेको नपाइएको पौडेलको भनाई छ । ‘ग्यास लगायतका पेट्रोलियम प्रदार्थहरु यसअघि उपभोक्ताले धेरै संचय गरेका कारण सुरुमा केही समस्या देखिएपनि हाल कुनै समस्या छैन,’ उनले भने ।

आईतवारदेखि भरी सिलिन्डर ग्यास बजारमा आउने भएकाले बजामा सहजता ल्याउने पौडेलको भनाई छ ।

गण्डकी उपभोक्ता हित संरक्षण समितिका अध्यक्ष एवं प्रदेश अनुगमन समितिका सदस्य कपिलनाथ कोईरालाले बजारमा आपूर्तिको अवस्था सहज रहेको बताए ।

उनले अनुगमनको क्रममा बजारमा आपुर्तिको अवस्था पनि सहज रहेको र मृल्यवृद्धि भएको पनि नपाइएको उनको भनाई छ । बजारमा खाद्य वस्तुको स्टक केही समयका लागि पुग्ने अवस्थामा रहेपनि बजारमा आँटाको अभाब रहेकाले मगाउने काम भैरहेको कोइरालाले बताए ।

प्रकाशित मिति: शुक्रबार, चैत २८, २०७६ १३:४६