सङ्कटमा जिम्मेवार सरकारको अपेक्षा

A+ A A-

नेपालका कम्युनिस्टहरूले यति धेरै गल्ती गर्दागर्दै पनि पदलोलुपहरू मिलेर पुनः अन्तिम पटक बुद्धिको बिर्को खोलेर नेपालका २ महान् कम्युनिस्ट पार्टी एकै बनाएका छन् ।

विपक्षी, विस्तारवादीहरूलाई दह्रो झापड हान्दै साहसिक निर्णयमा पुगेको देख्दा वाम शुभचिन्तकहरूको खुसीको सीमा नै रहेन । ३ जेठ २०७५ मा एमाले र माओवादी केन्द्र एकीकरण हुने निर्णय भएपछि यो लेखकमा पनि खुसी छाएको थियो ।

हुन पनि किन नहोस्, विश्वबाट कम्युनिस्ट सकिन लाग्दा नेपालबाट कम्युनिस्ट र सर्वहाराको अभिभावक बन्दै नेकपा अध्यक्षद्वय खड्गप्रसाद शर्मा ओली (केपी) र पुष्पकमल दाहाल (प्रचण्ड)हरूले कम्युनिस्टहरूलाई मलजल गर्दै विश्वमा पुनः कम्युनिस्ट शासन अझै छ भन्ने मान्यता स्थापित गर्न लाग्नुभयो भनेर खुसीको सीमा नै रहेन ।

मलाई यो पनि थाहा थियो कि दुवै पार्टीले एकता हनु अगाडि नै टुटफुट व्यहोरिसकेकाले अब त्यस्तो नहोला, सबै वाम एकै ठाम आउने भए भनेर कार्यकर्ता पंक्ति ढुक्क थिए । तर, पार्टी मिल्यो, पार्टीका नेतृत्व तहकै पदाधिकारी मिलेनन् ।

केपी ओली सरकारलाई तुहाउन, असफल पार्न पार्टीभित्रकै शीर्ष अग्रज नेताहरूले अहिले पनि चलखेल गर्दै हुनुहुन्छ । यी नेताज्यूहरूलाई के भन्न चाहन्छु भने, नेकपा र यो सरकार नेपालबाट पतन भए भने नेपाल रहनेछैन । तपाईं हाम्रो अनि हाम्रा छोराछोरी, नातिनातिनाले एकादेशको कथा भनेर नेपाललाई पढ्नेछन्, जस्तै : गढवाल र सिक्किमलाई हामीले बुझेका छौँ ।

यदि राष्ट्र निर्माण र नेपाली जनताका लागि राजनीति गर्दै हुनुहुन्छ भने तपाईंलाई पार्टीले जुन पद दिएको छ, त्यसमा रमाउन सिक्नुहोस् । यदि तपाईं र तपाईंका आफन्त, इष्टमित्रका लागि मात्र राजनीति गर्नुभएको हो भने तपाईंरूलाई यो देशमा बस्ने अधिकार छैन ।

नेपाली जनताले १ सय ४ वर्षे राणाकाल, राजाकाल, कांग्रेसकाललाई फाल्दै अहिले कम्युनिस्टको सकाल भित्र्याएका हुन् । सकाल भनिएको सरकारकै केही व्यक्ति र २-४ जना नेकपाका भरौटे, २ जिब्रे, बेतुके विश्वासघाती, नातावादी, कृपावादीहरूले देशलाई बर्बादीतिर लैैैैजाँदै छन् ।

राजाको कलो खाएर आएकाहरू भने राजासहितको लोकतन्त्र चाहियो भनेर चिच्याउँदै छन् । कोही नेपालमा नचाहिने संघीयताको भरणपोषण गर्दै छन् । प्रभुलाई खुसी पार्न मरिहत्ते गरेका छन् । कोही बर्बाद भएर तराई-मधेसका क्षेत्रीय पार्टीको शरण लिन पुगेका छन् । कोहीचाहिँ जनता भजाएर अन्तिम मुक्तिको आन्दोलन भन्दै जंंगलतिर डेरा जमाएका छन् ।

पछिल्लो समय नेपाली कम्युनिस्टलाई नेपाली कम्युनिस्टले नै सिध्याउने जाल बुनिँदै छ । नेपाल कम्युनिस्ट पार्टी (नेकपा)का शीर्ष व्यक्तिहरूलाई सिंहदरबारमा किन पुर्‍याएका हुन् जनताले ? के जनताले तिरेको करलाई विभिन्न वहाना बनाएर भ्रष्टाचार गर्न पठाएका हुन् र ?

नेपाल आमाले जति नेता जन्माए पनि के सबै कुबुद्धि भएका जन्माइन् त ? कम्युनिस्टले सर्वहारा वर्गको हितका लागि देश, विदेशमा हजारौँ आन्दोलन गरे तर उही चाल ! अब त गरिबले काँचुली फेर्ने दिन आए भनेको त नेता र मन्त्रीहरूले मात्र काँचुली फेरेर समृद्ध नेपाल बन्ला र ?

नेपाल कम्युनिस्ट पार्टीका सबै १० लाख नेता, कार्यकर्ताले चाहने हो भने देशको विकास ५ वर्षमा हालको विकासभन्दा ७० प्रतिशत ज्यादा हुन सक्छ । ‘समृद्ध नेपाल, सुखी नेपाली’ हाम्रै पालामा हाम्रै हातले बनाउने गरी यो सरकारले जुन अभियान ल्याएको छ, त्यो वास्तवमै नेपालीहरूको हितमा छ । तर, पदका लागि नेपाल कम्युनिस्ट पार्टीका शीर्ष नेताहरू गुटबन्दीमा फसेका छन् । ‘जनता जाऊन् भाँडमा’ भन्ने प्रवृत्ति हावी भएको छ २ जिब्रेज्यूहरूमा ।

प्रधानमन्त्री केपी शर्मा ओली, पुष्पकमल दाहाल (प्रचण्ड) झलनाथ खनाल, माधव नेपाल, वामदेव गौतम, ईश्वर पोख्रेल, नारायणकाजी श्रेष्ठ, रामबहादुर थापा ‘बादल’ सबै आआफ्नो दुनो सोझ्याउन भित्रभित्र जाल बुन्दै छन् ।

प्रधानमन्त्रीलाई अल्पमतमा पार्ने अनि देश धरापमा पार्ने जाल बुनिँदै छ । वामदेव गौतमलाई सांसद बनाउँदा के बिग्रिन्छ र ? वामदेव गौतम महाकाली सन्धि गर्ने बेलामा विपक्षी बनेका थिए अर्थात् नेपालको हितमा काम गरेका थिए । उनी राष्ट्रका लागि एक सच्चा पहरेदार हुन् अनि उनीमाथि किन जाल बुनिँदै छ ?

प्रधानमन्त्रीज्यूले पनि नेपाली जनताबाट चुनिएका जनप्रतिनिधिसँग सोधेर मात्र काम गर्न जरुरी देखिएको छ । अहिलेको समयमा वामदेव र डा. युवराज खतिवडा नेपालको संसदमा चाहिने नेताहरू हुन् । पुष्पलाल र मदन भण्डारीको नेपालको विकास गर्ने अनि सुखी नेपाली बनाउने सपनालाई अहिलेका सबै नेताले बिर्सिएर पद र पैसाका लागि एकले अर्काको खुट्टा तान्नमै तल्लीन छन् ।

मैले सुनेको थिएँ, पढेको थिएँ अनि देखेको थिएँ- कम्युनिस्ट सरकारका मन्त्रीहरू खुट्टाले हिँडेर मन्त्रालय पुग्छन् अनि मितव्ययी हुन्छन्, विकास धेरै गर्छन्, कुर्सीका लागि मरिहत्ते गर्दैनन्, सिस्टमलाई मान्ने गर्छन् । देश, जनता र राज्यको विकास कसरी गर्ने भन्नेमा सदैव होसियारीपूर्वक तयारी गर्छन् ।

तर, नेपालको सर्वहारा पार्टीका मन्त्रीहरू र नेताहरू २० करोड रुपैयाँका गाडी चढ्ने, डेढ लाखभन्दा बढी मूल्य पर्ने पलङमा सुत्ने, सुख सयल र चयनमा ध्यान दिन थालेकाले अहिले नेपाली कम्युनिस्टहरू बद्नाम भइसकेका छन् ।

अहिले भ्रष्टाचार कम्युनिस्टको ‘मेनिफिस्टो’मा लेखेको छ कि जस्तो गरेर पार्टीका जननिर्वाचित प्रतिनिधिहरू करोडौँ रुपैयाँ झ्वाम पार्दै छन् । यदि सरकारकै मन्त्रीहरू, नेताहरूबाट आफ्नो हैसियतभन्दा माथि गएर नेपाल आमा र राष्ट्रको ढुकुटी नै बर्बाद गर्ने गरी यस्तै प्रवृत्ति हुँदै जाने हो भने कम्युनिस्टहरूको सरकार नेपालमा यही नै अन्तिम नबन्ला भन्न सकिन्न ।

विश्वमा पुनः कम्युनिस्टलाई ब्युुँताउन नेकपाले मात्र सक्ने भएकाले अब यो पार्टीले भ्रष्टाचारलाई उन्मुक्ति नदिई युवाहरूलाई स्वदेशमै स्वरोजगार बनाउने, विभिन्न विकास निर्माणका योजनामा लगानी गर्ने, ठूला उद्योग स्थापना गर्नेतिर नलागे सरकारले ल्याएको ‘समृद्ध नेपाल, सुखी नेपाली’को अभियान सफल हुन कदापि सक्दैन ।

नेकपाका लागि जनताले दिएको यो नै अन्तिम मौका हो । यस पटक जनताको विश्वास जित्न नसके अब अर्को पटक जनताको जनमतले अवश्य कारबाही गर्नेछ । र, अहिलेका सत्ताधारी दल र नेताहरू पनि भविष्यमा क्षेत्रीय पार्टीतिर टाँसिन जानु नपर्ला भन्न सकिन्न ।

नेकपाले तुरुन्त गर्नुपर्ने काम

क. लिपुलेक, लिम्पियाधुरालगायत सुस्ता अनि मिचिएका सबै भूमि भारतबाट फिर्ता गराउने ।

ख. सन् १९५० को शान्ति तथा मैत्री सन्धि अविलम्ब पुनरावलोकन गराउने अथवा रद्द गर्ने । किनभने ३ असोज २०७२ को नेपालको नयाँ संविधानले सबै मृत बनाइसकेको छ ।

ग. २०५१ सालको एमालेको ९ महिने सरकारको विकास गर्ने तरिकालाई आत्मसात् गरी जल, जमिन र जंंगल बचाउने, विपन्न वर्गको उत्थानका लागि विभिन्न कार्य गर्ने ।

घ. युवालाई विदेश जान नदिन नयाँ विकासको अवधारणा लाउने । अब नेपालले रेमिट्यान्सको भर नपर्ने गरी कार्ययोजना बनाउने ।

ङ. सातै प्रदेशका जनतालाई छुने खालको बजेट विनियोजन गर्ने ।

च. नेपाललाई झनझन् दलदलमा फसाएकाले संघीयतालाई खारेज गरी पुरानै ५ विकास क्षेत्र कायम गर्ने ।

छ. जातीयता र भाषाको राजनीति नगर्ने ।

ज. कोरोना महामारीमा भारतमा रहेका नेपालीलाई नेपाल भित्र्याएर तोकिएको अवधिसम्म क्वारेन्टाइनमा राखी कोरोना नभएकालाई घर पठाउने वातावरण मिलाउने ।

(लेखक प्रवासी नेपाली संघ भारत, महाराष्ट्र, गुजरात संयुक्त राज्य समितिका सदस्य हुन्।)

प्रकाशित मिति: शनिबार, चैत २९, २०७६ ११:३१