कोरोना संक्रमित युवतीसँग मुख्यमन्त्रीको टेलिफोन सम्वाद, भने : निको भएपछि मात्र घर फर्कनुपर्छ

कोरोना संक्रमित युवतीसँग मुख्यमन्त्रीको टेलिफोन सम्वाद, भने : निको भएपछि मात्र घर फर्कनुपर्छ

A+ A A-

गण्डकी प्रदेशका मुख्यमन्त्री पृथ्वीसुब्बा गुरुङले कोरोना भाइरस संक्रमित बागलुङकी युवतीसँग टेलिफोनमा कुराकानी गरेका छन् ।

धौलागिरी अस्पतालको आइसोलेसन वाडमा उपचार गराइरहेकी बागलुङ कुँडुलेका १९ वर्षीया अंशु सापकोटासँग बिहीबार मुख्यमन्त्री पृथ्बी सुब्बा गुरुङले टेलिफोनमा कुरा गरेका हुन् । कोरोना संक्रमण देखिएपछ १९ वर्षीया सापकोटा विगत १० दिनदेखि धौलागिरी अस्पतालको आइसोलेसन वार्डमा उपचाररत छन् ।

उपचाररत सापकोटासँग मुख्यमन्त्री गुरुङले फोन गरेर स्वास्थ्य अवस्थाबारे जानकारी लिँदै ढुक्क भएर बस्न आग्रह गरेका थिए । उनले कोरोना भाइरसको लक्षणहरू भए नभएको जानकारी लिँदै युवतीलाई नआत्तिन भनेका छन् ।

मुख्यमन्त्रीका प्रेस संयोजक विक्रम न्यौपानेका अनुसार अंशुले आफ्नो स्वास्थ्य अवस्था सुधार हुँदै गएको र चिकित्सकले फोनमार्फत जानकारी लिइरहेको बताएकी छन् ।

मुख्यमन्त्री गुरुङले सापकोटासँगको कुराकानीमा मन दह्रो गरेर बसे छिटै निको हुने बताएका छन् । उनले रोग निख्रेपछि मात्र घर जानुपर्छ, १४ दिन भनेर मात्र हुँदैन, पूरै निको भएपछि घर गए ढुक्क हुन्छ भन्दै उपचाररत सापकोटालाई आस्वस्त पार्ने प्रयास गरेका छन् ।

मुख्यमन्त्री गुरुङले अस्पतालका डाक्टरहरूसँग टेलिफोनमा कुरा गरेको जानकारी गराउँदै नियमित रूपमा तातोपानी पिउन पनि उनलाई सुझाव दिएका छन् ।

युवतीले मुख्यमन्त्रीलाई आफ्नो स्वास्थ्य अवस्था राम्रो रहेको बताउँदै डाक्टर आफ्नो कोठामा नआइकन टेलिफोनबाट सोधपुछ गरेको जानकारी गराएकी छिन् ।

अंशु बेल्जियमबाट कतार हुँदै काठमाडौंदेखि बाग्लुङ पुगेपछि कोरोना संक्रमण देखिएको थियो । उनी पाँचौ कोरोना सैक्रमित हुन् ।