गण्डकीमा २५९ जनाको कोरोना नमुना संकलन, २ पोजेटिभ, १३५ नेगेटिभ

A+ A A-

गण्डकी प्रदेशमा विश्व व्यापी रुपमा फैलिएको कोराना भाइरस (कोभिड–१९) का २५९ जनाको नमुना संकलन गरिएको छ । त्यसमध्ये १ सय ३७ वटाको मात्र रिर्पोट आएको छ । २ सय ५९ वटा नमुनामध्ये रिपोर्ट आएका १ सय ३७ मध्ये १ सय ३५ जनाको नेगेटिभ र २ जनाको पोजेटिभ रिपोर्ट आएको छ । अब, १ सय २२ जनाको रिर्पोट आउन बाँकी रहेको छ ।

गण्डकी प्रदेशमा भेटिएका दुवै कोरोना संक्रमणको पोजेटिभ रिपोर्ट भेटिएका बागलुङका हुन् । उनीहरूको धौलागिरी अस्पतालको आइसोलेसनमा उपचार भइरहेको छ । उनीहरू दुवै बेल्जियमबाट चैत ४ गते कतारको दोहा हुँदै काठमाडौं र त्यसपछि बागलुङ पुगेका थिए ।

केही दिनअघि सरकारले पोखरा स्वास्थ्य विज्ञान प्रतिष्ठान अन्तरगतको पश्चिमाञ्चल क्षेत्रीय अस्पतालमा कोरोना भाइरसको परीक्षण गर्न पोर्टेबल आरटी पिसिआर मेशिन सञ्चालनमा आएपछि नमुना परीक्षण र उपचारका लागि संकास्पद बिरामी आउने क्रम बढेको छ ।

क्वारेन्टाइनमा राखिएका ३६ जना घर फर्किए

कारोना भाइरसको संक्रमण फैलिएपछि विभिन्न देशबाट आएका व्यक्तिहरूले तोकिएको क्वारेन्टाइन अवधि सकिएर घर गएपछि कास्कीका क्वारेन्टाइन खाली भएका छन् । विदेशबाट आएका व्यक्तिहरूलाई १४ दिनसम्म क्वारेन्टाइनमा बस्दासमेत कोरोना भाइरसको कुनै लक्षण नदेखिएपछि घर पठाइएको हो ।

कास्कीमा सरकारले बनाएको क्वारेन्टाइनमा बसेका ३६ जनालाई १४ दिनसम्म कुनै पनि लक्षण नदेखिएपछि घर पठाइएको हो । उनीहरूमा क्वारेन्टाइनमा बस्दा कुनै शंकास्पद लक्षण नदेखिएको र मंगलबार कोभिड १९ को नमुना परीक्षण गर्दा पनि नेगेटिभ आएपछि घर फर्किन दिइएको हो ।

कास्कीका विभिन्न स्थानहरूमा होम क्वारेन्टाइनमा बसेकाहरूमा पनि लक्षण नदेखिएको गण्डकी प्रदेशका स्वास्थ्य निर्देशक डा. विनोद विन्दु शर्माले जानकारी दिए ।

कतार, भारत र बंगलादेशलगायतका देशबाट आएका ३६ जनालाई पोखराको मालेपाटनस्थित कृषि तालिम केन्द्र र रूपा गाउँपालिकामा क्वारेन्टाइनमा राखिएको थियो ।

पोखरा महानगरपालिकाले बनाएको केन्द्रमा राखिएका १६ जना र रूपामा राखिएका २० जनालाई १४ दिनसम्म क्वारेन्टाइनमा राख्दा पनि कोरोनाको कुनै लक्षण नदेखिएपछि आ–आफ्नो घर पठाइएको स्वास्थ्य निर्देशक डा. शर्माले बताए ।

१४ दिनपछि घर पठाइए पनि थप एक हप्ता होम क्वारेन्टाइनमा बस्न भनिएको डा शर्माले बताए । लकडाउनपछि बाहिरबाट आउन रोकिएकाले अहिले कास्कीका सबै क्वारेन्टाइन खाली भएका छन् ।

प्रकाशित मिति: बिहीबार, चैत २७, २०७६ १२:३२