स्यान्डर्सद्वारा राष्ट्रपति उम्मेदवारको दौड परित्यागको घोषणा

A+ A A-

डेमोक्रेटिक पार्टीबाट अमेरिकी राष्ट्रपतिको उम्मेदवार बन्ने दौडमा रहेका बर्नी स्यान्डर्सले आफ्नो चुनावी अभियान समाप्त गरेको घोषणा गरेका छन् ।

यससँगै आगामी नोभेम्बरमा हुने अमेरिकी राष्ट्रपतिको निर्वाचनमा पूर्व उपराष्ट्रपति जोए बिडेन डेमोक्रेटिक पार्टीबाट उम्मेदवार बन्ने पक्का भएको छ ।

विन्कन्सिन राज्यमा मंगलबारराति मतदान भएसँगै स्यान्डर्सले उम्मेदवारीको दौड छाडेका हुन् । ७८ वर्षीय स्यान्डर्सले गएराति आफ्ना समर्थकलाई सम्बोधन गर्दै राष्ट्रपतिको उम्मेदवार बन्नका लागि जति भोटको आवश्यकता पर्छ, त्यो मत आउने अवस्था नदेखिएकाले आफूले चुनावी अभियान परित्याग गरेको घोषणा गरेका हुन् ।

प्राइमरीका सुरुवाती निर्वाचनमा अग्रता बनाएका स्यान्डर्सले पछिल्ला मतदानमा खराब नतिजाको सामना गर्नुपरेको थियो । उनले स्वास्थ्य र असमान आयलाई आफ्नो प्रमुख चुनावी मुद्दा बनाएका थिए ।

वामपन्थी विचारमा झुकाव राख्ने स्यान्डर्सले आफूलाई डेमोक्रेटिक सोसलिस्ट नेताका रुपमा आफूलाई उभ्याएका थिए । उनले चुनावी अभियानमा मुख्य गरी स्वास्थ्य नीति,क्याम्पसको पढाई निःशुल्क गर्ने, धनीका लागि कर बढाउने र न्युनतम मजदुरी गर्नेको तलव वृद्धिजस्ता मुद्दा अघि सारेका थिए ।

सन् २०१६ को निर्वाचनमा पनि स्यान्डर्सले हिलारी क्लिन्टनलाई चुनौती दिएका थिए । तर उनी सफल हुन सकेनन् । यद्यपि दुवै चुनावी अभियानमा उनले युवा मतदाताहरुको भरपुर साथ पाए ।

उनलाई युवा मतदाताको समर्थन प्राप्त भएपनि २०२० को डेमोक्रेटिक प्राइमरीमा उनले दक्षिणी राज्यमा प्रमुख अफ्रिकी अमेरिकी मतदातालाई आफ्नो पक्षमा पार्न असफल भए ।

हालै कोरोना भाइरस (कोभिड–१९) को प्रकोपका कारण अमेरिका सबैभन्दा बढी प्रभावित बनेपछि उनले लाइभ स्ट्रिमका माध्यमबाट सम्बोधन गरेका थिए ।

स्यान्डर्सले अभियान छाडेपछि डेमोक्रेटिक पार्टीबाट पूर्व उपराष्ट्रपति जोए बिडेन उम्मेदवार बन्नेछन् । उनले आगामी नोभेम्बरमा हुने राष्ट्रपतीय निर्वाचनमा वर्तमान राष्ट्रपति डोनाल्ट ट्रम्पसँग प्रतिस्पर्धा गर्नेछन् ।

स्यान्डर्सले आफ्ना समर्थकलाई लाइभ स्ट्रिमका माध्यमबाट सम्बोधन गर्दै आफ्नो अभियान अन्त्य गर्ने निर्णय आफ्ना लागि कठिन र सकसपूर्ण भएको बताए । उनले आफूलाई केही समर्थकले अन्तिम राज्यको प्राइमरी निर्वाचनसम्म मैदानमा लड्न सल्लाह दिएको पनि सुनाए ।

उनले भने, ‘यदि उम्मेवार बन्ने दौडमा अघि पर्ने सम्भावना थियो भने म निश्चित रुपमा यो अभियानलाई जारी राख्ने थिएँ ।’

स्यान्डर्सल आफ्नो सम्बोधनमा यो चुनावी अभियानले अमेरिकी जनतामा कस्तो राष्ट्र बन्न सक्छ भन्ने चेतना भर्न आफू सफल भएको दाबी गरे ।

उनले यो अभियानका साथै देशमा आर्थिक, सामाजिक न्याय, जातीय न्याय, पर्यावरणीय न्याय कहिल्यै समाप्त नहुने एक ठूलो कदम उठाएको बताए ।

उनले सम्बोधनका क्रममा उम्मेदवार बन्ने जोए बिडेनलाई बधाई दिँदै उनले आफूसँग मिलेर प्रगतिशील विचारलाई अघि बढाउन काम गर्ने विश्वास व्यक्त गरे ।

प्रकाशित मिति: बिहीबार, चैत २७, २०७६ ०८:०५