यसरी पक्राउ परे थर्मोगन कालो बजारी गर्ने अर्बपति अग्रवाल

A+ A A-

अहिले बजारमा स्वास्थ्य सामग्रीको अभाव छ । विश्वभर महामारीको रूपमा फैलिएको कोरोना भाइरस (कोभिड–१९) का कारण स्वास्थ्य सामग्रीको अभाव भएको हो ।

यही मौका छोपेर बजारमा सर्जिकल मास्कदेखि ह्याण्ड स्यानिटाइजरको कालो बजारी बढेको छ । यसबीचमा करिब २० लाख सर्जिकल मास्कसहित १२ जनालाई उपत्यकाका विभिन्न प्रहरी युनिटले पक्राउ गरिसकेको छ ।

पक्राउ पर्नेहरूमा अधिकांश बिचौलियाहरू थिए । प्रहरी यसरी महामारीको समयमा ठूला व्यापारिक घरानाका व्यत्तिबाट पनि कालो बजारी हुन्छ भन्नेमा सचेत थियो । जुन मंगलबारको घटनाले पुष्टि गर्‍यो ।

प्रहरीको ‘कोभर्ट अप्रेसन’

२ दिनअघि नै महानगरीय अपराध महाशाखामा एउटा सूचना आयो, नेपालको ठूलो व्यावसायिक घरानाका व्यक्ति नै कालो बजारीमा लागेका छन् भनेर । प्रहरीले सूचना भेरिफाइ गर्न लाग्यो ।

यसरी कालो बजारी गर्नेमा जगदम्बा ब्रान्डका कार्यकारी निर्देशक तथा नेपालका लागि किर्गिस्तानका अवैतनिक वाणिज्यदूत सुलभ अग्रवाल थिए । सूचना भेरिफाइ गरेको महाशाखाको टोलीले अग्रवालसँग ‘डिल’ सुरु गर्न थाल्यो ।

त्यसका लागि अग्रवालले मोबाइलबाट होइन, सामाजिक सञ्जाल ‘ह्वाट्सएप’ मार्फत कुरो गर्ने सर्त राखे । उनको सर्तलाई महाशाखाको टोलीले ‘ओके’ भन्यो र ‘ह्वाट्सएप’ मार्फत नै अग्रवालसँग प्रहरीले ‘डिल’ गरेको महाशाखाका प्रमुख एसएसपी सहकुल थापाले बताए ।

‘हामीलाई अर्बपति अग्रवालले यसरी महामारीका बेला मेडिकल सामग्रीमा कालो बजारी गर्लान् भन्ने लागेको थिएन,’ एसएसपी थापाले थपे, ‘जब सूचना भेरिफाइ गरेर ‘ह्वाट्सएप’मार्फत कुरा गर्ने सर्त राखे हामी कन्फर्म भयौँ ।’

यसरी परे पक्राउ

सुलभ अग्रवालसँग करिब १ सय ज्वरो नाप्ने ‘थर्माेगन’ थिए । बजारमा करिब ३ हजारदेखि ५ हजार मूल्य पर्ने ती थर्मोगनको मूल्य उनले सुरुमा प्रतिगोटा २० हजार रूपैयाँ राखेका थिए ।

जगदम्बा स्टिलका सञ्चालक सुलभ अग्रवाल पक्राउ, स्वास्थ्य सामग्री कालोबजारी गरेको आरोप

तर, मेडिल सप्लार्सको भेषमा कुरा गरिरहेका प्रहरी अधिकारीहरूले उनलाई प्रतिगोटा १५ हजारको हिसाबमा ओके गराए । लेनदेनको कुरा सुरु भयो ।

प्रहरीले चेक दिने प्रस्ताव गरे । तर, अग्रवालले मानेनन् । ह्याण्ड क्यास नै हुनुपर्ने उनको माग थियो । उता प्रहरीचाहिँ गाउँपालिका र नगरपालिकाको माग भएको भन्दै उनलाई फकाउन खोजिरहेको थियो ।

मंलगबार १ सय थान किन्न पैसा नपुगेको र १० लाख मात्र भएको भन्दै उनले प्रहरीलाई १५ हजारको हिसाबले ६७ थान थर्मोगन लिएर प्रहरीले भनेको स्थान नक्साल पुगेपछि प्रहरीले सामानसहित पक्राउ गरेको हो ।

अग्रवाल कूटनीतिक नम्बर प्लेट भएको २०९ एचसीसी १ नम्बरको गाडीसहित पक्राउ परेका हुन् । उनलाई कालो बजारी कसुरअन्तर्गत बुधबार जिल्ला प्रशासन कार्यालयमा बुझाउने महाशाखाका प्रमुख एसएसपी थापाले बताए ।

प्रकाशित मिति: मंगलबार, चैत २५, २०७६ १७:३५