कोरोना त्रास : अन्यौलमा कर्णाली प्रदेशसभाको हिउँदे अधिवेशन

A+ A A-

कोरोना भाइरस (कोभिड–१९) कारणले कर्णाली प्रदेशसभाको हिउँदे अधिवेशन अन्यौलमा परेको छ । कोरोनाका कारणले देश लकडाउनमा भएका कारणले हिउँदे अधिवेशन अन्यौलमा परेको हो ।

गत माघ २४ गते बाट शुरु भएको कर्णाली प्रदेशसभाको पाँचौ अधिवेशनका ६ वटा बैठक बसेका थिए । ६ वटा बैठक बसिरहेका बेला कोरोना भाइरसका कारणले लकडाउन भएपछि चैत्र १३ गते प्रदेशसभाले सूचना टाँस गरेर अनिश्चितकालसम्मका लागि स्थगित गरेको हो ।

प्रदेशसभामा बैठकमा पारित गर्नका लागि ८ वटा विधेयक संसदमा पेश भएर समितिमा अध्यायनका लागि पेश भएको ती विधेयक अहिले समितिमा नै रहेको प्रदेशसभा सचिव जीवराज बुढाथोकीले बताए । ‘केही संसोधनका विधेयकहरू सभामा पेश भएका थिए’ उनले भने, ‘केही विधेयकहरू प्रदेशसभाका समितिमा अध्ययनका लागि गएका थिए ।’

प्रदेशसभाका समितिहरूमा भूमि व्यवस्था, कृषि तथा सहकारी मन्त्रालय पेश गरेको खाद्य उत्पादन अधिकार तथा सम्प्रभुता सुनिश्चित गर्न बनेको विधेयक, उद्योग, पर्यटन, वन तथा वातावरण मन्त्रालयले पेश गरेको उपभोक्ता संरक्षण गर्ने सम्बन्धमा व्यवस्था गर्न बनेको विधेयक, आर्थिक मामिला तथा योजना मन्त्रालयले पेश गरेको सार्वजनिक र निजी क्षेत्रको साझेदारीको सम्बन्धमा व्यवस्था गर्न बनेको विधेयक सामाजिक विकास मन्त्रालयले पेश गरेको प्रदेशमा स्वास्थ्य सेवा प्रवाह सम्बन्धमा व्यवस्था गर्न बनेको विधेयक उद्योग, पर्यटन, वन तथा वातावरण मन्त्रालय पेश गरेको कर्णाली प्रदेशको वातावरण संरक्षण सम्बन्धमा व्यवस्था गर्न बनेको विधेयक समितिमा अध्यायनका लागि गएको प्रदेशसभा सचिवालयले जनाएको छ ।

त्यस्तै, उद्योग, पर्यटन, वन तथा वातावरण मन्त्रालयले पेश गरेको कर्णाली प्रदेशको वातावरण संरक्षण सम्बन्धमा व्यवस्था गर्न बनेको विधेयक, कर्णाली प्रदेशभित्रको राष्ट्रिय वनको संरक्षण र सुव्यवस्था गर्न बनेको विधेयक, कर्णाली प्रदेश पर्यटन सम्बन्धमा व्यवस्था गर्न बनेको विधेयक प्रदेशसभाका समितिमा पेश भएका थिए ।

मुख्यमन्त्री तथा मन्त्रिपरिषद्को कार्यालयले पेश गरेको लोक सेवा आयोग ऐन (पहिलो संशोधन) विधेयक समितिमा अध्यायनका लागि पेश भएका थिए ।

केही विधेयक र ऐनहरू प्रदेशसभाका समिति पेश भएर पास भएर आएका ती विधेयक ऐन प्रदेशसभाका बैठकमा पास हुने अवस्थामा रहेका तर, लकडाउनका कारणले प्रदेशसभाको बैठक स्थगित भएको प्रदेशसभा सचिव बुढाथोकीले जानकारी दिए ।

हिउँदे प्रदेशसभाको बैठक अन्त्य गरेर बर्षे अधिवेशन वा बजेट अधिवेशनमा जाने बेला भइसकेको बेला कोराना महामारीका कारणले पूरै देश लकडाउन भएको र चालु अधिवेशन संचालन गर्ने वा अत्त्य गर्ने विषयमा परामर्श भइरहेको प्रदेशसभा सचिव बुढाथोकीले बताए । ‘चालु अधिवेशन सूचना टाँस गरेर अन्त्य गर्ने वा के गर्ने भन्ने विषयमा छलफल भइरहेको छ’ उनले भने, ‘अब त बजेट अधिवेशनका तयारीमा जानु पर्ने अवस्था पनि आइसकेको छ ।’

प्रकाशित मिति: मंगलबार, चैत २५, २०७६ १७:१२