जब भान्छाबाट बाको आवाज आयो...

A+ A A-

भान्छाबाट आएको आवाजले मेरो निद्रा भङ्ग गर्‍यो । यसअघि आउने आवाज र आज आएको आवाजमा केही फरक थियो । आवाज थियो- बाबा र ममीको । चर्को आवाज भए पनि मिठासपूर्ण । यस्तो आवाज यसअघि घरमा कहिल्यै गुञ्जिएको थिएन ।

‘किन भान्छामा खैलाबैला ?’

उत्सुकतासँगै प्रश्न पनि मनमा उब्जियो ।

‘के हुँदै छ भन्छामा ?’, फेरि अर्को प्रश्नले हान्यो ।

लकडाउनले ढोका लक छ । बाहिरी मान्छे आउने कुरै भएन । कोरोना भाइरसको डर र त्रासमा विश्व नै लडिरहेको छ । डर र त्रासका बीचमा हामी पनि घरभित्रै छौँ ।

‘कहिलेसम्म यसरी बस्नुपर्ने हो ?’

घरी अत्यास लाग्छ ।

‘के गर्ने ?

कि किताब पढ कि टिभी हेर कि सामाजिक सञ्जाल वा सुत्नुको विकल्प छैन ।

४ जनाको परिवार । आज भने मेरो आँखा ढिलासम्म उघ्रिएन । लकडाउनले कतै जानु र केही काम गर्नु पनि छैन । त्यसैले ढिलासम्म ओछ्यानमै पल्टिइरहेँ ।

बिहान ५ बजे नै काममा जाने बाबा-ममी धन्न बस्नुभएको छ । यदि लकडाउन नभएको हुन्थ्यो भने यतिबेला बाबा-ममीलाई यसरी बोलेर बस्ने फुर्सद नै कहाँ हुन्थ्यो र !

केही खोजेजस्तो, केही नभेटिएजस्तो भान्छाबाट बाबाको फेरि आवाज आयो ।

किन कल्याङकुलुङ गर्दै हुनुहुन्छ बाबा-ममी ! भान्छातिर लागेँ ।

ओहो ! सोचेभन्दा फरक दृश्य ।

यसअघि कहिल्यै यस्तो देखिकी थिइनँ । ममिको हातमा कफीको गिलास छ । टेबुलमा बसेेर कफी सुरुपसुरुप पार्दै हुनुहुन्छ । बाबाको हातमा चक्कु र भाँडा छ अनि र्‍याकमा मरमसला खोज्दै हुनुहुन्छ । कुन मसला कहाँ छ ? कुन भांँडामा के पकाउने ?

बालाई भान्छामा देखेर हाँसो लाग्यो । भान्छामा देखेर भन्दा पनि खाना पकाएको देखेर ।

सामाजिक सञ्जाल र समाचारहरूमा न्युज पनि आएका थिए, लकडाउनमा पनि महिलाले फुर्सद पाएनन् । घरधन्दाले थिचिएका छन् । पुरुषले पनि गरे हुने नि ! यस्तै यस्तै । तर, मेरो घरमा भने यो समाचारको ठीक विपरीत थियो ।

तर, धेरैको घरमा यो समस्या अहिले पनि छ । लकडाउनका कारण व्यापार, व्यवसाय, विद्यालय बन्द छन् । घर बस्नेको संख्या धेरै भएपछि काम पनि थपिएको छ । पकाउने, तुल्याउने, घर सफा गर्ने, लुगा धुने, बच्चाहरूको ख्याल राख्ने, पढाउने यो सबै काम आमाहरूकै काँधमा पर्छ ।

यदि घरका सबैले एउटा एउटा काम गर्ने हो भने आमाहरूलाई लोड कम पर्थ्यो । कोरोना भाइरसले डर र त्रास मात्र होइन, सिक्ने अवसर पनि दिएको छ । कहिल्यै भान्छामा नजाने पुरुष पनि भान्छामा गएर आमाहरूलाई सघाउन थालेका छन् । सँगै छोरा छोरीलाई पनि सिकाउन थालेका छन् ।

घर त्यस्तो विश्वविद्यालय हो, जहाँबाट हामीले हाम्रो भविष्य कस्तो बनाउने ? कस्तो डिग्री हासिल गर्ने, त्यो सिकाउँछ, जुन हामीले विद्यालय र विश्वविद्यालयको कोठामा गएर सिक्न सक्दैनौँ । लकडाउनले एउटा सकारात्मक दियो पनि बालेको छ ।

प्रकाशित मिति: मंगलबार, चैत २५, २०७६ ११:०६