३० वर्ष काम गरेको अनुभव उपयोग गर्छु : नवनियुक्त गभर्नर

A+ A A-

गभर्नर रिक्त भएको १९ दिनपछि नेपाल राष्ट्र बैंकले नयाँ गभर्नरको रूपमा राष्ट्र बैंकमै ३० वर्ष बिताएका महाप्रसाद अधिकारीलाई पाएको छ । २०४२ सालमा राष्ट्र बैंक प्रवेश गरेका अधिकारीले २०७२ पुसमा राष्ट्र बैंकको डेपुटी गभर्नरबाट अवकास पाएका थिए ।

अघिल्लो पटक पनि गभर्नरका लागि सिफारिसमा परेका अधिकारी अहिले भने गभर्नर भए ।

बैंक तथन वित्तीय संस्थाको बासलातमा राम्रो टिप्पणी गर्न सक्ने अधिकारीले घरजग्गा कर्जा सीमामा ल्याउन र हालका अर्थमन्त्री डा. युवराज खतिवडा गभर्नर हुँदा सहयोगीका रूपमा विशेष भूमिका खेलेका थिए । वित्तीय स्थायित्वलाई अघि बढाउन सक्षम व्यक्तिका रूपमा उनले पहिचान बनाएका छन् ।

केन्द्रीय बैंकमा रहँदा उनले संस्थागत सुशासन तथा बैंकिङ सुपरीवेक्षणलाई बलियो बनाउने काम गरेका थिए । ३० वर्षभन्दा बढी केन्द्रीय बैंकमा काम गरेका अधिकारीले त्रिभुवन विश्वविद्यालयबाट बिजनेस एडमिनेस्ट्रेसनमा स्नातक गरेका छन् भने सन् १९९३ मा भारतबाट चार्टर्ड एकाउण्टेन्सी गरेका थिए ।गभर्नर भएपछि उनै महाप्रसाद अधिकारीसँगै शिलापत्रका लागि भागवत भट्टराईले गरेको छोटो कुराकानी

३० वर्ष काम गरेको संस्थामा प्रमुखको रूपमा पुन: फर्कंदै हुनुहुन्छ, कस्तो अनुभूति गर्नुभएको छ ?

नेपाल राष्ट्र बैंक मैले ३० वर्ष काम गरेको संस्था हो । स्वभावैले अत्यन्तै खुसी छु । नयाँ हौसला प्रदान भएको अनुभुति गरेको पनि छु । थप र नयाँ जिम्मेवारी पाएको छु, निकै खुसी लागेको छ ।

आफूले ३० वर्ष काम गरेको अनुभव थप प्रयोग गर्ने अवसर पाएको छु । राष्ट्र बैंक र गभर्नरको प्रतिष्ठा बढाउने गरी मैले काम गर्नेछु ।

गभर्नर भएपछि तपाईंको अहिलेको चुनौती के हो र कदम के हुन्छ ?

केन्द्रीय बैंक स्वायत्त निकाय हो । उसका आफ्नै मर्म, लक्ष्य र उद्देश्‍य रहेका हुन्छन् । त्यसका लागि कार्यक्रम पनि बनाइएको छ । कदम भने कार्यान्वयन गर्ने नै हो ।

अहिलेको चुनौती भने सबैको साझा छ । विश्‍वव्यापी भएको कोरोना भाइरसको कारण अर्थतन्त्रमा ठूलो चुनौती भएको छ । असर अझै पर्न पनि सक्छ । अहिले मैले ध्यान दिने भनेको कोरोनाको प्रभावमा परेको अर्थतन्त्रलाई उकास्ने नै हो । अहिलेको मुख्य चुनौती नै कोरोनो भाइरसबाट समस्यामा परेको अर्थतन्त्रलाई उकास्नु नै हो ।

राष्ट्र बैंकले पहिलो चरणमा केही प्याकेज घोषणा गरेको छ, त्यही पर्याप्त हो कि थप घोषणा हुन्छ ?

राष्ट्र बैंकले कोरोना भाइरसका कारण अर्थतन्त्रमा परेको असरका बारेमा राहतको प्याकेज ल्याएको छ । यो तत्कालका लागि राहत हुने गरीको कार्यक्रम हो । संक्रमण कति समय लम्बिन्छ । कति गहिराइमा जान्छ, यसका आधारमा बृहत छलफल गरेर निर्णय लिन्छौँ ।

तत्कालका लागि भने प्याकेज ठीक छ ।

लगानी बोर्डमा ४ वर्ष काम गर्नुभयो । यो संस्थाको संरचनामा लिएको भूमिकाको विषयलाई कसरी लिनुहुन्छ ?

लगानी बोर्ड देशको समृद्धिका लागि आवश्‍यक पर्ने एउटा संस्थागत संरचना हो । यो अत्यावश्‍यक निकाय पनि हो । नयाँ लगानी तान्न र नयाँ योजना बनाउन यसको महत्त्वपूर्ण भूमिका हुन्छ ।

देशको समृद्धिका लागि लगानी बोर्डको छुट्टै भूमिका छ । थप सशक्त र बलियो बनाएर लैजानुपर्छ ।

प्रकाशित मिति: मंगलबार, चैत २५, २०७६ ०८:४३